Read Ghomala New Testament ROMA 16 Bible Online

ROMA 16 - Ghomala New Testament bible

ROMA 16

¹Gɑ̌ nyəŋ Fɛbɛ fɑ yɔk pɑ yə mjwǐ gɛfa' mfa' dyə cu'tə pɔ Kristo yə a Kɛnkrea a nə bu mɔ.

²Po cyə m nə Cyəpɔ dɑ́ mku' tə nə dɑ e kwa' pa' pɔ dɔlɔ̌ a; po kwitə e nə guŋ ywə awɛ yə e wə shəŋ gɑ po kwitə e a nə pa' e lə́ pfɔptə pɔ jɔmyɔ̌m ba myə.

³Po ca'tə Priska ba Akilas msǒ fa' pɑ̌ nə Kristo.

⁴Wap lə nə vɔk a bɑ́ gɔ hɑ thə yap; tə da' myə nə wə go'tə wap pɑ, ba guŋ mcu'tə pɔ Kristo awɛ nthʉm guŋ pɑ tə pɑ́ pɑ Yudea.

⁵Po ca'tə ba cu'tə pɔ Kristo yə a shu'tə wə pu a. Sha'tə Epainetos, gɛ ŋkhuŋ a, dəŋdzə mo nə ghə̌ŋ Azia nə piŋ Kristo.

⁶Po ca'tə Maria yʉ yə e lɑ cəŋtə dzɔp nɑ́ e nə po a.

⁷Sha'tə Androniko pu Yunyas pɔ nə ŋkhənyə a, pɔ pyə pu lə ghəm wɔk pyə a pu a. Wap bɑ mghɛ nthəm gwyə, bɑ wap lə dəŋdzə̀ bɑ bi Kristo m dzə̌ m̀.

⁸Po ca'tə Ampliatos ŋkhuŋ a te' nə Cyəpɔ.

⁹Sha'tə Urbano so yɔk pɑ nthʉm fa' Kristo ba ŋkhuŋ a Stakos.

¹⁰Po ca'tə Apelɛ yə e da'tə mfa' myə jʉ̌m Kristo a. Sha'tə pɔ pyə wap wə́ Aristobulu a.

¹¹Po ca'tə Erodion, ŋkhənyə a, sha'tə pɑ dyə Narsisə pyə wap m nə Cyəpɔ a.

¹²Po ca'tə Trifena pu Trifosa pyə wap lə cəŋtə dzɔp nɑ tsap nə Cyəpɔ a. Sha'tə ŋkhuŋ a Pɛrsi yə e kɑ cəŋtə dzɔp nɑ e nə Cyəpɔ a.

¹³Sha'tə Rufo yə pu shi e m nə Cyəpɔ a ba map e yə e bɑ ba ma ǎ lə.

¹⁴Po ca'tə Aziŋkritos, Flegos, Ermes, Patrobas ba Ermas pu a mfɑ̌mfɑ pyə pu a pu bɑ a.

¹⁵Sha'tə Filologos ba Yulia, Nɛreos pu fɑ e yə mjwǐ Olimpas pu a guŋ pɔ dɔlɔ̌ pyə pu a pu bɑ a.

¹⁶Po lɑ nə nuŋ mgho' dɔlɔ̌ sha'tə wɔwɔ cəcɑ̌ po. Guŋ mcu'tə pɔ Kristo awɛ ca'tə wɔ.

¹⁷Mfɑmfɑ, gɑ̌ səso wɔ gɑ po pɔm pɑ ma' ŋkhyɛ'nyə pu a fa'tə nə cwə yə wap fʉ'tə nɑ tsap hɑ jʉm nə ywə yə pu lə zhi'tə wɔ a; po khʉ́ wap.

¹⁸Nə pa' pɔ bǎ tə bɑwə fa' m bi Kristo Cyəpɔ yɔk pɑ pɑ̀; wap fa' m bi vam tsap; biŋ bɑwə shyə m nə́ mghɔm pɑpuŋ map pu a mghɔm zhɔ'tə fʉtə pɔ pyə a bɑ wap ghə tʉm bwapwǎ a.

¹⁹Guŋ pɔ awɛ zhyə yɔ nə yu'nyə; gɑ̌ wə ŋwɛnyə nə po, da' gɑ́ gɑ̌ wə shəŋ gɑ́ po zhyə ywə pɑpuŋ, bɔmtə́ nə ŋi'nyə nə yə cwəpuŋ.

²⁰A cʉ' muywə Si hwitə̀ tsa'tə Sata to mkwə po. A gho' Cyəpɔ Yeso yɔk pɑ pɑ́ nə po.

²¹Timotio só fa' a ca'tə wɔ ba Lukios pu Yasoŋ ba Sozipatros ŋkhənyə a.

²²Myə Tɛrtios yə gɑ bvə yəŋ ŋwa'nyə a, gɑ̌ ca'tə wɔ nə Cyəpɔ.

²³Gaios, gʉɔ a ba yə guŋ cu'tə pɔ Kristo awɛ ca'tə wɔ. Erasto gwim petə tisuŋ ca'tə wɔ, ba Kartus fɑ yɔk pɑ. [

²⁵Ghu'tə pɑ bi mo yə e gə tʉɔ nə gə piŋnthʉm yɔ kwyə́ shyə m nə Cuŋ pɑpuŋ yə gɑ̌ siŋ, bɑ shyanyə Yeso Kristo shyə m nə nə ghə ŋ jyə mu' nwə cyə zhyənwə yə pu lə la' dwɔ' tə fɑ tə tyɛ',

²⁶a pɑ cwəlɔ bɑ pu la'tə biŋ gə guŋ pɑ tə pɑ pɑ́ Yudea zhyə, shyə m̀ nə ywə yə pu lə və, a fɑ bi mghɔm ghɔm Si shyə m pa' Si lə ghɔm tə nə shya wap nə nə yu'nyə piŋnthʉm a,

²⁷bi Si da' jyənwə, shyə m nə Yeso Kristo nə mgu' nə gu'! Amɛn.