Read Ghomala New Testament ROMA 2 Bible Online

ROMA 2 - Ghomala New Testament bible

ROMA 2

¹Nə́ nə shwyɛ' o tə bɑwə pɑ́, kɑ o bɑ pɑ́ wɑ̌ lə, wə yə o fyɛ' pyəshɑ́ pɔ a; nə pa' o nə fyɛ' yə mu' mo, bɑwə nyəŋ shɛ kwa' thə o. Nə pa' o bɑwə gə yǔ pɑ́ po'o.

²Tə́ a bɑ pɑ̌ zhyə gɑ yə nə fyɛ' Si bɑ nyənyɔ nə pɔ pyə wap gə nthi mfa' bɔ a.

³O bɑwə ŋkwɛ gɑ wə yə o fyɛ' pɔ pyə wap gə po'o, biŋ bɑwə gə yǔ pɑ pa' wap a, o gɔ sɔ' vɔk nə yə fyɛ' Si a?

⁴Kɑ́ o bɑwə gwak mɑ dəŋ puŋnwə Si, ba nə kyəptʉm e pu a nə ghə pɑpuŋ? O tə bɑwə jyə gɑ puŋnwə Si bɔ bɑwə nthənyə o gɑ o pʉɔtʉm tsʉ̌ a?

⁵A bɑwə shyə m nə tʉɔthə́ o ba m nə yu nə cyə́tə pʉɔtʉm o pɑwə shu'tə́ yɛ̀luŋ Si thə o nə tyɛ' yɛluŋ, tyɛ'dzʉ́ yə́ e gɔ sɔ' fyɛ' dəŋdəŋ a.

⁶Tyɛ'dzʉ yə́ Si gɔ sɔ' pa' bǎ yə nwə wɑlɑ́ pɑ nə dəŋ mfa' myə́ a:

⁷E gɔ sɔ' hɑ vɔk mama bi pɔ pyə wap lě ŋkhaktʉɔ nə́ nə ghə nwə pɑpúŋ, bɑ shə́ŋ ghu'tə, mku' ba nə cyətə piŋ npfʉ a.

⁸Hɑ yɛluŋ ba nə ŋiŋtə sə́ bi pɔ pyə wap lə nthʉɔthə bi nwə nyənyɔ, biŋ msɔkmsɔk nwə a.

⁹Ghəghʉɔ pu a zhwiŋ bi mo yə e gə nwə bɔkpɔ̌k, də́ŋdzə ntho' nə yə́ Yudea tə́ bɔtə́ nə yə Grikia.

¹⁰Ghu'tə, mku' ba hwitə bɑ bi bǎ ya mo lə yə e gə nwə pɑpuŋ a, dəŋdzə bɑ bi yə Yudea, biŋ bɔtə bɑ bi yə Grikia.

¹¹Nə pa' nə ghap ŋkheŋ pú tə bɑ nə Si pɑ́.

¹²Guŋ pɔ pyə wap lə hɔnwə tə zhyə mco' a, wap gɔ sɔ' pfʉ pɑ tə zhyə mco'; pɔ pyə wap lə nə hɔnwə bɑ wap zhyə mco' a, pu gɔ sɔ' lɑ mco' fyɛ' wap.

¹³Tə pɔ pyə wap ju' mco' a nə bɑ dəŋdəŋ dzə Si pɑ́; pɔ pyə wap bɑ dəŋdəŋ a bɑ pɔ pyə wap ju' mco' giŋ nə a.

¹⁴A bɑ́ cwə yə pɑ tə pɑ pɑ Yudea, pɑ tə zhyə mco' gə ywə yə mco' shəŋ a, wap bɑ́ pa' mco' a nə pu, wap pyə́ wap bɑ wap ka ghə mco' a.

¹⁵Wap da'tə gɑ a bɑ pu və ywə yə mco' shəŋ a nthʉm tʉm pú; ba kwa' zhyənwə yap sa' wap po'o, ba yap nə sɛnwə nthʉm tʉm pú pɑ butə wap biŋ bɑ giŋkǎm yap.

¹⁶Yəŋ bɑ ywə yə́ a gɔ sɔ' tə́m nə tyɛ'dzʉ́ yə Cuŋ pɑpuŋ gɔm gɑ́ Si gɔ sɔ' cyə m nə Yeso Kristo fyɛ' mfa' dʉmnyətʉmnyə bǎ yá mo a.

¹⁷Tə wə yə́ a bɑ o ghə tso yə Yudea, bɑ jap tʉm tsǔ pɑ nə mco', biŋ bɑ dɑ Si o ŋa'nɑ o a,

¹⁸wə yə́ a bɑ ǒ zhyə́ ywə yə́ e shəŋ a, wə yə a bɑ mco' zhi'tə o nə cwɔ' ywə pɑpúŋ, wə yə́ o jyə yə nthʉɔ yə a bɑ nə a,

¹⁹wə yə a bɑ ǒ zhyə́ gɑ o da'tə məjyə bi mfʉ̀, bɑ ŋkhà' pɔ pyə wap bɑ nthʉ́m jʉm a,

²⁰bɑ gɛ zhi'tə pɑ tə zhyənwə, ba gɛ zhi'tə pɑkhʉ̌, nə pa' a bɑ ǒ zhyə́ ywə yə a shəŋ nə zhyə nthʉm mco', biŋ jyə́ nwə nyənyɔ...

²¹A bɑ po'o! Wə yə́ o ji'tə mo tə́ o lə zhi'tə thə nɑ o! O siŋ gɑ ka mo zhʉ, bɑ jʉ̌!

²²O sho' nwə ghap, biŋ bɑ gə ghap! O bɔ nwə nə ghamtə mkətwɔk biŋ bɑ jʉ́ mdyə map!

²³O dɑ mco' ŋa' nɑ́ o, biŋ bɑ bɔptə mco' nə nɔm Si!

²⁴Nə pa' a bɑ pu lě bvə́ gɑ: a cyə m nə po pú yəmtə tsǒ Si cəcɑ̌ pɑ tə́ pɑ́ pɑ Yudea.

²⁵Nə vo mo bɑ ǎ puŋ bɑ́ yə́ o ghiŋ nə mco' a, tə o pɑ bɔptə́ mco' bɑ pu vó o, bɑ o bɑ́ pɑ mo yə pu ka vo é a.

²⁶Tə mo yə pu ka vo é a pɑ gə ywə yə mco' həŋtə́ a, bɑ pu tə gɔ sɔ' sɛ yə nə cyə́tə vo e pa' pu vo e a pɑ a?

²⁷Da' gɑ́ yʉ yə pu ka vo é nə bapnɑ, tə e pɑ gə ywə yə mco' gɔm a, e gɔ sɔ' fyɛ' o, wə yə o bɔptə mco' bɑ pu vo o a.

²⁸Nə pa' tə ywə yə pu jɔ a nə dɑ mo gə yə Yudea pɑ̀, kɑ mtiŋ nə bapnɑ nə́ ghə mo yə pu vo e a pɑ́.

²⁹Ywə yə a dɑ mo gə yə Yudea á bɑ́ ywə dʉmnyətʉmnyə, ba nə vo mo pɑ m nə́ tʉ̌m, yə a bɑ m nə Zhwenyə, la' a pɑ m nə mco' a. Yɑ́ nə bɑ nthi mo yə e tə ŋkwi yə nə ghu'tə m bi pɔmnəŋ a pɑ, e ŋkwi m bi Si a.