Read Ghomala New Testament ROMA 3 Bible Online

ROMA 3 - Ghomala New Testament bible

ROMA 3

¹Yə Yudea bɑ e lɑ kɑ́ shyə pyə shɑ pɔ? Nə vo mò ŋkwitə nə kɑ ywə?

²Wap bɑ m dzə̀! Nə pa' pu lə dəŋdzə̀ hɑ nə ghə pu zhyə Si m bi pú.

³Po'o m gɑ́ kɑlə́? A pɑ gɑ́ shɑ pɔ nə pu lě tə pɑ nyənyɔ bɑ a gɔ kɔ nə pɑ nyənyɔ Si a?

⁴Gɛ̌! Pɑ gɔ zhyə gɑ Si bɑ nyənyɔ, guŋ pɔ awɛ pɑ mcwanwə dəŋdəŋ pa' a bɑ pu və gɑ: A buŋ gɑ pu zhyə o pa' mo dəŋdəŋ a nə mghɔm mǔ, bi a pu pɑ fyɛ' o o tsʉ́.

⁵Tə a bi a yɔk pɑ nwə nə cyətə pɑ dəŋdəŋ ká' nwə dəŋdəŋ Si hɑ thə, gɑ gɔ ghɔm gɑ kɑ̀? Si tə shyə́tə pɑ dəŋdəŋ nə pɑ̀ nə lɑ yɛluŋ é shwɔ wɔk pɑ a? Gɑ gɔm po'o m nə pa' monəŋthə́ nə jɔ a.

⁶Tə́ gɛ̌! Nə pa' a pɑ po'o bɑ Si gɔ sɔ' fyɛ' dzʉ́ m gɑ́ kɑ?

⁷Tə́ à cyə m̀ nə́ mcwanwə mə̌ nyənyɔ Si la'tə pa' e bɑ́ a nə ghu'tə é bɑ pu gɔ piŋ nyəŋ shɛ thə m pa' gɛ mhɔ a m gɑ́ kɑ?

⁸Tə nwə kɑ́ pɑ lə ghə nwə cwəpùŋ tə nwə pɑpuŋ təm pa' shɑ pɑ tɛmnɛ gɔm a? Nə nyəŋ shɛ thə pɔ bɔ bɑ ǎ ku' nə pú.

⁹Tə́ kɑ? Wɔk pɑ pɑ Yudea bɑ pɑ̌ pìŋ gə kɑ nə nə́ shyə pyə shɑ pɔ? Tə́ sɔmywə pɑ́! Nə pa' á bɑ pɑ tsə́ yɔ̌ gɑ́ guŋ pɑ Yudea awɛ pa' pɑ Grikia a bɑ pɑ mghɛ mhɔ.

¹⁰Dəŋdəŋ pa' a bɑ pu və gɑ́: Sɔmmo dəŋdəŋ tə bɑwə pɑ́, bǎ ta' mo.

¹¹Sɔm jyənwə tə̌ wə́ pɑ́, bǎ ta' mo nə cə́ŋ Si.

¹²Wap bɑ wap hɔ məjyə guŋ yap awɛ, bɑ wap pɔptə awɛ. Sɔmmo nə pu lə pɑ gə nwə pɑpuŋ bǎ ta' mo.

¹³Nthʉm ghak yap bɑ pa' thəsì yə pu ghyɛ' a: Wap dɑ tʉm yap dzə mfʉ̀m jəŋ nɔk mtìŋ pɑ́ nə mkwɔptəshwə̀ map.

¹⁴Shwə yáp bɑ ǎ lo nə mdo pu a nwə dzə́zə́.

¹⁵Mkwə map ŋkhʉdʉ́ nə pfyə mcyə;

¹⁶nə sim pu a ghəghʉɔ bɑ nə məjyə yap.

¹⁷Bɑ wap ka zhyə tsap məjyə hwitə.

¹⁸Sɔm nə pwɔk Si tə bɑ dzə mnyə map pɑ́.

¹⁹A nəŋ nə pɑ̌ po'o bɑ pɑ zhyə́ gɑ ywə yə́ mco' gɔm a, a gɔm bi pɔ pyə wap bɑ nthʉm mco' a, po'o gɑ́ guŋ mshwə pɔ awɛ cɑ, tə pu zhyə gɑ guŋ dzʉ̌ awɛ bɑ ǎ hɔnwə dzə̌ Si.

²⁰A ywə yə́ a gə tə sɔmmo lə ghɔ sɔ' pɑ dəŋdəŋ dzə e, cyə m nə mfa' mco' a; nə pa' mco' gə mo zhyə pɑ mhɔ.

²¹Da' gɑ́ cwəlɔ, a bɑ pu zhyə nwə dəŋdəŋ Si, la' pu cyə ba m nə mco'; mco' pu a mghɔm ghɔm Si bɑ mkwǐnthɛ myə.

²²A bɑ nwə dəŋdəŋ Si shyə m nə piŋnthʉm nə Yeso Kristo bi guŋ pɔ pyə wap biŋ a. Wap bɑ pɑ ta' ywə.

²³Guŋ yap awɛ bɑ wap lě hɔnwə, la' ghu'tə Si yɑ bi pú.

²⁴Da' gɑ bɑ a lé shyə m nə pa' Yeso Kristo lə kwi pɔ a pu lɑ wap gə pɔ dəŋdəŋ, tə wap hɑ sɔmywə, shyə m nə gho' Si.

²⁵Si bɑ e lě dɑ e nuŋpwɔ' shyə m nə mcyə myə, shyə m nə piŋnthʉm, nə nə́ da'tə ywə yə nwə dəŋdəŋ lə bɑ ya a, pa' e lə tak mhɔnwə pɔ nəŋ tə nyəŋ shɛ thə pu nə cwə dzə, cwə yə e lə bɑ e tɔm tʉm tsyə a.

²⁶E da'tə nwə dəŋdəŋ e cwəlɔ, po'o gɑ e pɑ dəŋdəŋ tə jap mo yə e bvɔk m nə piŋnthʉm nə Yeso Kristo a dəŋdəŋ.

²⁷Tə bi a pɑ mo nə ŋa' nɑ e a? Gɛ̌, shyə m nə̀ kɑ? M nə mfa' lə? Gɛ̌, da' m nə piŋnthʉm.

²⁸Pyə zhyə gɑ mo shyə m nə́ piŋnthʉm tə bɑ dəŋdəŋ. E tə shyə m nə fa' mco' pɑ.

²⁹Kɑ Si bɑ pɑ da' Si pɑ Yudea? E tə́ bɑ ba Si pɑ tə pɑ pɑ́ Yudea a? Bɑkɔ! E bɑ ba Si pɑ tə pɑ́ pɑ Yudea

³⁰nə pa' Si bɑ pɑ yɑmu' yə e dɑ pɔ pyə pu vo wap a ba pɔ pyə pu ka vo wap a nə gə pɔ dəŋdəŋ a.

³¹Tə pɑ dɑ piŋnthʉm nthé də̀ŋ nə mco' a? Gɛ̌, pɑ nyəŋ pɑ dəŋ nə mco'.