Read Ghomala New Testament ROMA 5 Bible Online

ROMA 5 - Ghomala New Testament bible

ROMA 5

¹A po'o tə pɑ̌ cyə m nə piŋnthʉm bɑ dəŋdəŋ a, hwitə bɑ cəcɑ̌ pɑ a Si shyə m nə Yeso Kristo Cyəpɔ yɔk pɑ̀.

²A shyə m nə́ e, biŋ shyə m nə piŋnthʉm, yɔk pɑ tsʉ' pɑ nə gho' yə a bɑ̀ pu yap wɔk pɑ̀ nə̀ a, biŋ bɑ jap yɔk pɑ̀ nə ghə dəŋ pɑ nə mɔktə nə ghu' Si.

³Pɑ biŋ ŋkwi' jap yɔk pɑ̀ ŋa'nɑ pɑ̀ nə mghəghʉɔ mɔk pɑ jyə gɑ ghəghʉɔ hɑ kaktʉɔ

⁴kaktʉɔ pɑ hɑ nə pɑ nyənyɔ, nyənyɔ pɑ hɑ mɔktə.

⁵Mɔktə lə nəŋ bɑ fʉtə́ mo, nə pa' a bɑ ŋkhuŋnyə Si lě sɛ̀ nthʉm mtʉm mɔk pɑ shyə m nə Zhwenyə Dɔlɔ̌ yə pu lə hɑ bi pɑ a.

⁶Əŋ, cwə yə́ pɑ lə́ bɑ́ tə́ wuŋ gə gʉ' a, Kristo pfʉ́ nə cwə yə́ pu lə yap a nə thə pɔ cwəpuŋ.

⁷A tə bɑ ǎ yɛ nə piŋ nə pfʉ nə thə́ mo dəŋdəŋ pɑ́; pɑtyɛ' bi a pɑ mo piŋ bǎ nə pfʉ̀ nə thə́ mo pɑpuŋ.

⁸Tə ywə yə Si nə da'tə ŋkhuŋnyə nə pɑ a bɑ gɑ: Kristo bɑ e lə nə pfʉ̌ nə thə́ yɔk pɑ̀, pɑ̀ yɑ̀ pɑ̀ mghɛ mhɔ.

⁹Pa' a biŋ bɑ cwəlɔ bɑ mcyə myə́ lɑ wɔk pɑ gə pɔ dəŋdəŋ, tə dəŋ pa' a tə e gɔ vɔk wɔk pɑ nə yɛlúŋ Si?

¹⁰A bi á a pɑ́ gɑ́ cwə yə́ pɑ lə́ jɑ mghɛ bò Si a, pa pú lə wɔ'bvɑnyə shyə m nə vʉ́ Mú e, bɑ cwə yə́ pɑ a pu wɔ'bvɑnyə a, pɑ tə gɔ cyə m nə vɔ́k e vɔk a?

¹¹A bɑ po'o pɑ̀ pɑ́ jap yɔk pɑ ŋa'nɑ́ nə Si shyə m nə Yeso Kristo Cyəpɔ yɔk pɑ̀ yə pɑ shyə m nə e cwəlɔ ŋkwi bvɑnyə a.

¹²A po'o tə́ dəŋdəŋ pa' a lé shyə́ m nə ta' mo mhɔ ko nthʉm dzʉ a, a piŋ shyə m nə mhɔ vʉ̌ ko yə a, vʉ̌ bɑ ǎ ko nə guŋ pɔ awɛ nə pa' guŋ pɔ awɛ bɑ wap hɔnwə.

¹³Mco' lə nə sɔ' mhɔnwə pɑ pɑ́ nthʉm dzʉ́, da' gɑ bi a pɑ pu lə nyəŋ shɛ thə́ mo nə mhɔ cwə yə mco' tə wə a pɑ.

¹⁴Tə́ tə fɑ nə Adam gɔ ŋkhəm nə Mosɛ vʉ̌ pɑ pɑwə, ba nə pɔ pyə wap lě tə hɔ sɔmywə nthi pa' Adam á, yə e bɑ cyəŋnyə mo yə e lə bɑwə gɔ la' sɔ' a.

¹⁵Tə gho' Si tə bɑ pa' mhɔ a pɑ́; nə pa' a bi a pɑ̀ bɑ a lě shyə m nə mhɔ ta' mo pɔ tə́ jɔm ko nə vʉ̌, bɑ dəŋ pa' a nə gho' Si, gho' e yə e hɑ shyə m nə ta' mo, Yeso Kristo, bɑ ǎ sɛ nə dú pɔ̀ kwa' du e.

¹⁶Tə gho' bɔ tə́ bɑ pa' mhɔnwə ta' mo a pɑ: Nə pa' a bɑ a lě shyə m nə mhɔ da' ta' mo, pu fyɛ', biŋ nyəŋ shɛ thə mo, da' gɑ a piŋ shyə nə vəŋ mhɔ, gho' ghə mo pɑ dəŋdəŋ.

¹⁷Nə pa' a bi a pɑ bɑ a le shyə da' nə ta' mo, shyə m nə mhɔ da' ta' mo vʉ̌ sá' dzʉ̌, bɑ dəŋ gɑ kɑ̀, shyə m nə Yeso Kristo, pɔ pyə wap ŋkwi gho' Si ba dəŋdəŋ a gɔ sɔ' sa' nthʉm vɔk.

¹⁸A po'o tə pa' a lě shyə m nə mhɔ ta' mo pu nyəŋ shɛ thə guŋ pɔ awɛ a, a cyə m nə mfa' dəŋdəŋ ta' mo, guŋ pɔ awɛ pɑ dəŋdəŋ, dəŋdəŋ yə a hɑ vɔk a.

¹⁹Dəŋdəŋ pa' a lě shyə m nə tʉɔthə́ ta' mo du pɔ zhi mghɛ mhɔ a, a dəŋdəŋ po'o tə a gɔ sɔ' cyə m nə́ nə yu'nyə ta' mo du pɔ pɑ pɔ dəŋdəŋ.

²⁰Mco' bɑ a lě sɔ' gə gɑ mhɔ lɔmnyə́, tə tsʉ' yə mhɔ lɔmnyə nə a gho' Si bɑ ǎ sɛ tsʉ'u.

²¹Po'o gɑ pa' mhɔ lə sǎ' shyə m nə vʉ̌ a, a dəŋdəŋ cyə m nə gho' sá' nə vɔk mama shyə m nə Yeso Kristo Cyəpɔ yɔk pɑ.