Read Ghomala New Testament ROMA 6 Bible Online

ROMA 6 - Ghomala New Testament bible

ROMA 6

¹A po'o bɑ da'tə́ gɑ kɑ? Pɑ gɔ wuŋ pɑ nthʉm mhɔ tə gho' yɔm a?

²Gɛ̌! Cwə yə a bɑ pɑ̌ pfʉ́ nə mhɔ a, pɑ̌ gɔ piŋ vɔk nthʉm mhɔ m gɑ́ kɑ?

³Kɑ pǒ bɑwə dʉɔnyə gɑ guŋ yɔk pɑ̌ awɛ pyə́ pɑ lə kwishyə m̀ nə Yeso Kristo a, pɑ lə ŋkwishyə po'o nə vʉ́ é?

⁴A shyə m nə kwishyə, nə vʉ e, bɑ pú lé nthə̀ŋ wɔk pa pú, po'o gɑ́ pa' Kristo lə yǎm nə vʉ̌ a, nə́ nə ghu' Tá a, ba wɔk pɑ̀ yɔk pɑ̀ vɔ́k m nə vɔ̀k sə́.

⁵Nə pa' a pɑ gɑ pɑ lě nthamtə nə e nthʉm vʉ́ é, bɑ pa pú gɔ sɔ' piŋ tamtə pɑ́ po'o nthʉm nə yam nə vʉ́ e.

⁶Pɑ cəŋtə ju' nwə yə̌ŋ: A bɑ pu lə ŋkham e pu a bvo mo yə a bɑ nə pɑ̀ a thə́ bɛnyəpɛnyə po'o gɑ nɑ́ mhɔ yɔk pɑ̀ sa'tə, tə́ pɑ lə piŋ bɑ ŋkwɔ mhɔ pɑ̀.

⁷Nə pa' mo yə ě pfʉ́ a tə́ jɑ ŋkwɔ mhɔ̀ pɑ̀.

⁸Tə́ a bi a pɑ bɑ pa Kristo pəmtə npfʉ́ bɑ pɑ̌ biŋ gɑ ba pa pu gɔ sɔ' pəmtə vɔk.

⁹Pɑ bɑ̀ pɑ̌ cəŋtə jyə gɑ́ Yeso yam nə vʉ̌, e lə ghɔ tə́ piŋ pfʉ́ pɑ́; nə pa' vʉ̌ ka piŋ gə sɔm gʉ' nə e.

¹⁰Nə pa' e nə pfʉ̌ po'o, pfʉ́ m nə mhɔ ŋkwi cʉ̌m; biŋ bvɔk cwəlɔ bɑ bvɔk m nə Si.

¹¹Ba wɔ yɔ po sɛ gɑ̀ po lě pfʉ́ nə mhɔ, biŋ bvɔk m nə Si shyə m nə Yeso Kristo.

¹²Pa' ǎ pɑ po'o a, ka mhɔ piŋ sa' nɑ tsɔ tsyə a bɑ̀ nɑ vʉ̌ a, gə po pɑ̀ ju'nyə bi e nə tsə ghi'nyə tsyə.

¹³Ka po piŋ hɑ bú mɔ bi mhɔ pa' tsə shù msɔkmsɔk mnwə myə a; po hɑ bú mɔ nə gə tsə shù nwə dəŋdəŋ, bɑ fa' bi Si pa' pɔ pyə wap yam nə vʉ̌, bvɔk a.

¹⁴Nə pa' mhɔ tə gɔ sɔ' kwi' ghə sɔm gʉ' nə po pɑ̀, nə kɑlɑ́ po tə́ jɑ m nə nwə mco' pɑ, po bɑ m nə gho'.

¹⁵Tə́ kɑ́? Tə jyə gɑ́ pɑ gɔ hɔnwə pa' pɑ tə́ jɑ m nə nwə mco' a lə́? Pa' pɑ bɑ m nə gho' a lə́? Gɛ̌!

¹⁶Po ka zhyə gɑ po piŋ bi mo gɑ po gɔ fa' bi e pa' ŋkwɔ a, pɑ yu'nyə e, bɑ po bɑ mkwɔ mo yə́ po ju'nyə e a, kɑ mkwɔ mhɔ myə a dɑ mo gɔ nə vʉ̌ a, kɑ nə yu'nyə yə a dɑ mo gɔ nə nwə dəŋdəŋ a?

¹⁷Pɑ hɑ gho'tə Si: Po lə́ bɑ mkwɔ bi mhɔ, da' gɑ po lě ju'nyə nə guŋ tʉm tsɔ awɛ nə́ ywə yə pu lə zhi'tə wɔ, nthak wɔ nə a.

¹⁸Po lě nthəm ŋkwɔ bi mhɔ, ji ŋkwɔ nwə dəŋdəŋ.

¹⁹Gɑ bɑwə gɔm pɑ ghɔm monəŋthə́ bi po, nə pa' a bɑ pǒ pwa. Dəŋdəŋ pa' a bɑ po lě hɑ bú mɔ pa' mkwɔ a bi nwə cwəpuŋ ba nə paknyə yə a gə pu tʉɔthə́ bi Si a, cwəlɔ po hɑ bú mɔ pa' mkwɔ a nə nə fa' fà' dəŋdəŋ yə a dɔnyə mo a.

²⁰Cwə yə po lə bɑ mkwɔ bi mhɔ a, nwə dəŋdəŋ pɑ bɑ a ka ghə sɔm shɛ nə́ po.

²¹Po lě jám ma nthi nthɔ̌m? So bɑwə tyɛ' ɔ ŋkhú wɔ nə, nə pa' a gɔ miŋ nə vʉ̌.

²²Tə́ cwəlɔ yə a bɑ po təm ŋkwɔ bi mhɔ biŋ shʉ' mkwɔ bi Si a, pǒ jam nthɔm myə a gɔ m nə nə lɔnyə mo a, myə a gɔ miŋ nə vɔk mama a.

²³Nə pa' mcwɔ'fa' mhɔ bɑ vʉ́; tə ywə yə Si hɑ bi mo pɑ́ néné a a bɑ vɔk mama shyə m nə Yeso Kristo Cyəpɔ yɔk pɑ̀.