Read Ghomala New Testament ROMA 8 Bible Online

ROMA 8 - Ghomala New Testament bible

ROMA 8

¹Sɔm shɛ tə bɑ cwəlɔ jɑ́ thə́ pɔ pyə wap bɑ m nə Yeso Kristo a pɑ.

²Nə pa' mco' Zhwenyə yə a hɑ vɔk shyə m nə Yeso Kristo a bɑ ɑ lě ŋkwi a bi mco' mhɔ ba m̀ bi vʉ̌.

³Ywə yə mco' lě tə ku' nə ghə, nə pa' a bɑ bap nɑ́ lě bwa mco' a, Si ghə̀: Shyə m nə pa' e nthəm Mú e nthʉm bapnɑ mhɔ pa' yɔk pɑ a, dɑ e nuŋpwɔ' nə mhɔ, e lě nyəŋ shɛ thə mhɔ, nthʉm bap nɑ́.

⁴Po'o gɑ nwə dəŋdəŋ yə mco' shəŋ a, a pəmtə́ nə́ pɑ̀ pyə pɑ tə́ jɑwə giŋ m nə bap nɑ́ a pɑ́, bɑwə giŋ m nə́ Zhwenyə.

⁵Nə pa' mo bɑ giŋ nə bap nɑ́ bɑ gə pɑ tsə bap nɑ́, da' gɑ́ bɑ giŋ nə Zhwenyə, gə ywə Zhwenyə.

⁶Bap nɑ́ gɔ m nə vʉ̌, da' gɑ Zhwenyə pɑ gɔ m nə vɔk ba m nə hwitə.

⁷Nə pa' nə yu'nyə bi bapnɑ bɑ nə tʉɔthə́ bi Si; bapnɑ tə́ ju'nyə nə mco' Si pɑ́, bɑ a ka ku' nə yu'nyə pɑ.

⁸A bɑ m nə bap nɑ́ bi a pɑ́ mo lə puŋ Si.

⁹Tə po tə jɑ bvɔk m nə bap nɑ́ pɑ́, po bɑ m nə Zhwenyə, nə pa' Zhwenyə Si shwə nə po. A pɑ́ gɑ mo ka ghə Zhwenyə Kristo, bɑ́ e tə́ mo Kristo pɑ.

¹⁰A pɑ gɑ Kristo bɑ́ nə po, bɑ ba pa' ǎ nyənyɔ gɑ́ nɑ́ bɑ ywə vʉ́ shyə m nə mhɔ a, bɑ Zhwenyə bɑ vɔk yɔ́ shyə m nə nwə dəŋdəŋ.

¹¹Bi á a piŋ bɑ́ gɑ Zhwenyə Mo yə e lə́ yam Yeso nə vʉ̌ a shwə nə po, bɑ Mo yə e lə yam Yeso Kristo a gɔ sɔ' hɑ vɔk nə́ nɑ tsɔ tsyə a bɑ ywə pfʉ̀pfʉ̌ a, cyə m nə Zhwenyə e yə a shwə nə po a.

¹²A po'o mfɑ́mfɑ́ tə a bɑ́ bɑ pɑ̌ ghə jú, la' a pɑ jú bapnɑ yə a gɔ ghə pɑ vɔk m nə bapnɑ a pɑ.

¹³Nə pa' po pɑ bvɔk a nə bap nɑ́ bɑ po gɔ sɔ' pfʉ́; da' gɑ́ po cyə m nə Zhwenyə jwə́ mfa' bap nɑ́, bɑ po gɔ sɔ' vɔk.

¹⁴Nə pa' pɔ pyə Zhwenyə Si nə shya wap a bɑ po Si.

¹⁵Pǒ bɑ po ka kwi Zhwenyə yə a dɑ wɔ gə mkwɔ, po pɑ́ bwɔk a pɑ. A bɑ po kwi Zhwenyə yə a dɑ wɔ gə mcwə po, Zhwenyə yə a gə po cwe gɑ: Aba, Ta.

¹⁶Zhwenyə bɔ biŋ bi mzhwenyə mɔk pɑ gɑ pɑ bɑ́ po Si.

¹⁷Bɑ pó biŋ bɑ mtsʉ́ mcʉ', mtsʉ̌ mcʉ' Si, pa Kristo, nə pa' pɑ ghə yɔk pɑ tsʉ' nə go' e, bɑ pɑ gɔ sɔ' ghə yɔk pɑ tsʉ' nə ghu' e.

¹⁸Gɑ zhyə gɑ gǒ' yə a si nə yəŋ gɑ́ cwə dzʉ̌ a ka ku' sɔmywə nə ghu'tə yə Si gɔ sɔ' la'tə nə pɑ a.

¹⁹Nə pa' dzʉ̌ bɑwə byap tə səŋnyə nə pa' pu gɔ ghə wap zhyə Mu Si a:

²⁰Nə pa' dzʉ̌ bɔ bɑ pu hɑ nə gʉ' simnyə, tə m pa' yʉ nə ŋkhuŋ a pɑ́, m pa' mo yə e nyəŋ e nə́ a nə ŋkhuŋ a; tə́ e yɑwə mɔktə.

²¹Nə pa' ba yʉ́ yə pu gɔ sɔ' kwi e bi ŋkwɔ vʉ̌, e ghə yə tsʉ' nə nə cyətə pɑ ŋkwɔ ba nə ghu'tə yə a bɑ yə po Si a.

²²Pyə bɑ pyə̌ zhyə́ gɑ guŋ dzʉ awɛ jɑwə cwəlɔ bɑwə pfə́ nə ywələ̌m nə dzə́.

²³A tə bɑ da' yʉ́ do e pɑ́, ba wɔk pɑ yɔk pɑ pyə a bɑ pɑ ghə zhwi'tə Zhwenyə a, pɑ bɑwə pfə̌ nthʉm tʉm pɑ, byap gɑ pɑ pɑ́ mcwə po, byap nə vɔk nɑ tsɔk pɑ.

²⁴Nə pa' a bɑ pu lě bvɔk wɔk pɑ, tə́ bvɔk wɔk pɑ po'o m nə mɔktə. Tə bi a pɑ mo yɔ ywə yə o mɔktə ya a bɑ o tə́ gɔ piŋ mɔktə pɑ: Bi a pɑ mo yɔ ywə biŋ mɔktə m gɑ kɑ?

²⁵Tə nə mɔktə ywə yə pɑ tə jɔ a pɑ́, a bɑ nə cəŋtə byap.

²⁶Zhwenyə ŋkwitə wɔk pɑ nə pwa yɔk pɑ, nə pa' a bɑ pɑ ka zhyə nə cwyɛ'nyə pa' a shəŋ a; da' gɑ́ Zhwenyə giŋkam nə pɑ̀, bɑ shwiŋ tə dhə,

²⁷bɑ Mo yə é jyə́ tʉm mo a zhyə ywə yə Zhwenyə sɛ a: nə pa' Zhwenyə bɑ giŋkam pɔ dɔlɔ̌ m pa' Si shəŋ a.

²⁸Pɑ́ piŋ jyə́ gɑ guŋ ywə awɛ nyaptə pɑ nwə pɑpuŋ bi pɔ pyə wap ŋkhuŋ Si a, pɔ pyə́ a bɑ e ke wap pa' e jap a.

²⁹Pɔ pyə a bɑ e lě dəŋdzə jyə wap a, e lě jap gɑ́ wap gɔ pɑ hwə́ pa' Mú e bɑ a, po'o gɑ e pɑ́ thə́sə mu nə dú mfɑ,

³⁰pɔ pyə a bɑ e lě dəŋdzə̀ shwɔ' wap a, a bɑ e lě ŋkhe wap; pɔ pyə e lə ké wap a pɑ́ bɑ e lě jap wap dəŋdəŋ; pɔ pyə e lə yap wap dəŋdəŋ a, a pɑ bɑ e lě gu'tə́ wap.

³¹Pɑ gɔ kwi' ghɔm gɑ́ kɑ? Si pɑ bi pɑ̀ bɑ wɑ gɔ pɔ wɔk pɑ̀?

³²Yʉ yə e lě tə́ gho' kwa' Mú e, da' gɑ e lě hɑ é nə thə́ yɔk pɑ awɛ a, a gɔ ghə m gɑ kɑ tə́ e lə hɑ guŋ ywə awɛ bi pa Mu é?

³³Wɑ̌ gɔ putə pɔ pyə Si bɑ ě cwɔ' wap a? Si nə́ jap mo dəŋdəŋ.

³⁴Wɑ̌ gɔ nyəŋ shɛ̌? Yeso Kristo bɑ e lě pfʉ́, biŋ jam nə vʉ̌; e bɑ nə ghə̌ŋ tʉɔ Si, bɑ gìŋkám nə pɑ.

³⁵Wɑ gɔ té wɔk pɑ nə ŋkhuŋnyə Kristo? Ghəghʉɔ lə? Kɑ nə zhwiŋ? Kɑ nə cwɔ' mkwə mo cwəpuŋ? Kɑ jikǔ'? Kɑ pə̌ŋ? Kɑ ywə vʉ? Kɑ nyədwɔp?

³⁶Nə pa' a bɑ pú lě bvə gɑ: A shyə m nə o pu pɑ jwɔk jwətə wɔk zhwətə; pu pɑ jɔ wɔk pɑ pa' mnɔm pyə pu dɑ wap gɔ m nə wa wap a.

³⁷Da' gɑ́ nə guŋ e awɛ pɑ̌ shyə m nə mo yə́ e lə kuŋ wɔk pɑ a, bɑ pɑ cyəshù.

³⁸Əŋ, gɑ̌ zhyə nyənyɔ gɑ: Kɑ vʉ́, kɑ vɔk, kɑ pɑ aŋgəle, kɑ nə hya mo, kɑ cwəlɔ, kɑ cwə yə a gɔ tə sɔ' a lə, kɑ mtʉɔ,

³⁹kɑ mgʉ' tə́ thə, kɑ mgʉ' tsʉ̀m, kɑ bǎ kɑ yə pu lə nyaptə a lə, pɑ́ sɔmywə lə haptə́ wɔk pɑ̀ nə ŋkhuŋnyə Si yə pu da'tə nə Yeso Kristo Cyəpɔ yɔk pɑ̀ a!