Read Ghomala New Testament 1 KORINTO 1 Bible Online

1 KORINTO 1 - Ghomala New Testament bible

1 KORINTO 1

¹Myə Polo yə Si ŋkhe a pa' yʉ́ nə ŋkhuŋ a nə gə gɛ nthəm Kristo Yeso, pyə Sostɛnə, fɑ́ yɔk pɑ:

²Bi cu'tə Si yə a Korinto, bi pɔ pyə pu lɔnyə wap nə Kristo Yeso, wap ghɔ pɑ́ pɔ dɔlɔ̌ pu a pɔ pyə wap ŋkhe tso Cyəpɔ yɔk pɑ Yeso Kristo, Cyəpɔ yap ba yɔk pɑ a;

³gho' ba hwitə pɑ bi po shyə́ m nə́ Si Tá yɔk pɑ ba m nə Cyəpɔ Yeso Kristo.

⁴Gɑ̌ go'tə Si guŋ mcwə awɛ nə po nə gho' Si yə e lə ghə bi po shyə m nə Yeso a.

⁵Nə pa' Si bɑ e lé shyə m nə é hɑ guŋ fʉ' awɛ bi po, guŋ fʉ' nə ghɔ̀m ba guŋ fʉ' nə zhyə.

⁶A bɑ kwǐnthɛ Kristo kwyə nə po,

⁷tə́ sɔmywə yə Si hɑ bi mo a lə yɑwə jak bi po, wɔ pyə po bɑwə byap gɑ́ pu ghə po zhyə Cyəpɔ yɔk pɑ Yeso Kristo a.

⁸Yʉ́ nə gɔ pɑ kwyətə́ wɔ tə kəm nə́ nə miŋ po'o gɑ́ po sɔ' bɑ tə bya nə tyɛ'dzʉ Cyəpɔ yɔk pɑ Yeso Kristo.

⁹E bɑ nyənyɔ, yʉ́ Si yə e ŋkhe wɔ gɑ po a Yeso Kristo Cyəpɔ yɔk pɑ Mu e tsʉnyə a.

¹⁰Tə́ gɑ wə səso wɔ mfɑmfɑ́ shyə m nə tsǒ Cyəpɔ yɔk pɑ̀ Yeso Kristo gɑ: Po pɑ ŋkwishwə, a ŋkhyɛ'nyə kɑ pɑ cəcɑ̌ po; po cəŋtə nthamtə́ nthʉm ta' zhwenyə, ba m nthʉ̌m ta' ŋkwɛnyə.

¹¹Nə pa' a bɑ pɑ Kloe siŋ a mfɑmfɑ gɑ́ fəŋnyə cəcɑ̌ po.

¹²A pɑ́ gɑ́ bǎ ya mo lə cəcɑ̌ po bɑwə gɔm gɑ: Gɑ̌ bɑ́ mo Polo, myə pɑ́ mo Apolos, myə pɑ́ mo Kefas, myə pɑ́ mo Kristo.

¹³Kristo bɑ ě ghaptə a? Pu lə́ ŋkham pɑ́ Polo thə́ bɛnyəpɛnyə nə thə yɔ a? Po lə́ ŋkwishyə m nə tsǒ Polo a?

¹⁴Ca'nyə Si gɑ́ ŋ dě tə nu' sɔmmo yɔ shyə tə ně da' Krispo pu Gayo.

¹⁵A po'o tə pɑ sɔmmo lə ghɔm gɑ́ po lə ŋkwishyə nə tso tsɑ̌.

¹⁶Əŋ ŋ də kwi' nu' tuŋdyə Stefana shyə. Sɔ' m nə pyəshɑ́ pɔ, bɑ ŋ kha zhyə gɑ́ gɑ̌ kwi' nu' mu' mo shyə pɑ́.

¹⁷Nə pa' Kristo la tə́ nthəm a gɑ́ gɔ nu' pɔ shyə pɑ́, e lə nthəm a m gɑ gɔ siŋ Cùŋ pɑpuŋ, siŋ po'o tə́ cyə m̀ nə́ fʉ̌ mghɔm pɑ̀, bɑ bwɔk nə lɑ bɛnyəpɛnyə Kristo sɑnyə ywə pɔpɔ.

¹⁸Ghɔm bɛnyəpɛnyə bɑ pʉə bi pɔ bipǐ da' gɑ bi pɔ pyə wap wə gɔ vɔk a, bi pɑ̌, a pɑ́ mtʉɔ Si.

¹⁹Nə pa' a bɑ pu lě bvə gɑ: Gɑ gɔ sɔ' sa'tə fʉ́ pɑ zhyə fʉ́, simnyə zhyənwə mzhyənwə.

²⁰Jyəfʉ̌ hɑ́? Tadyə mco' hɑ? Sɛnwə nə yəŋ wɔ̌dzʉ́ hɑ? Si tə́ bɑ e pʉɔ fʉ́ dzʉ́ nə gə pʉə a?

²¹Pa' dzʉ̌ lé shyə m nə fʉ̌ la' e zhyə Si nthʉm fʉ́ si a, Si bɑ e cyə m nə pʉə nə́ siŋ Cuŋ pɑpúŋ tə́ jɔ gɑ e gɔ vɔk pɔ pyə wap piŋ a.

²²Pɑ Yudea həŋtə́ msya, pɑ Grikia pɑ shəŋ fʉ́.

²³Tə́ sɔ' m nə pyə, pyə̌ siŋ Mesia yə pu lə kam e thə bɛnyəpɛnyə a, ywə fa'tə bi pɑ Yudea biŋ bɑ pʉə bi pɑ tə pɑ́ pɑ Yudea;

²⁴Da' gɑ sɔ' m bi pɔ pyə a bɑ pu ké wap a, kɑ pɑ Yudea, kɑ pɑ Grikia lə, bɑ́ Kristo, mtʉɔ Si, ba fʉ́ Si.

²⁵Nə pa' ywə yə a bɑ pʉə Si a, a bɑ fʉ́ yə a bɑ ǎ cyə monəŋ, ywə yə a biŋ bɑ nə pwa Si a a pɑ bɑ ǎ tʉɔ shyə monəŋ.

²⁶Mfɑmfɑ pǒ zhyə́ pɔ pyə pǒ bɑ wap a, wɔ pyə Si bɑ é ke wɔ po piŋ a: Pɑ zhyə́ fʉ́ nə mnyə pɔmnəŋ tə ghyɛ̌' bɑ cəcɑ̌ po pɑ́, kɑ pɔ nthʉɔtʉɔ lə, kɑ pɔ nə mtuŋdyə gwyəgwyə lə.

²⁷Tə ywə yə a bɑ pʉə bi dzʉ̌ a Si bɑ e cwɔ' yá nə nə jʉ́m mzhyə́fʉ́; ywə yə́ a bɑ ywə bwapwǎ bi dzʉ́ a, Si pɑ bɑ ě cwɔ' ya nə nə jʉ́m ywə nthʉɔtʉɔ.

²⁸Ywə yə a bɑ nthʉm dzʉ́ bɑ ywə tə́ dəŋ pu piŋ bɑ gwak a, ywə yə a bɑ ywə tə ywə a, Si bɑ e cwɔ' ya nə nə dɑ ywə yə a ywə a gə mzhʉm.

²⁹Po'o gɑ sɔmmo yə Si lə nyaptə e a kɑ ŋa' nɑ e dzə Si.

³⁰A shyə m nə E tə́ po pɑ nə́ Kristo Yeso yə e bɑ bi pɑ bɑ́ fʉ́ yə a fɑ m bi Si a, nwə dəŋdəŋ, lɔ́nyə, nə vɔk mo.

³¹Po'o gɑ́ dəŋdəŋ pa' ywə yə pu lə və a gɔm a gɑ: mo yə e gɔ ŋa' nɑ e a ŋa' nɑ e m nə Si.