Read Ghomala New Testament 1 KORINTO 10 Bible Online

1 KORINTO 10 - Ghomala New Testament bible

1 KORINTO 10

¹Mfɑ̌mfɑ́ pɑ́ ŋ də tʉ́m wɔ: Guŋ mtá pɔk pɑ lə bɑ nthʉm mlwa, guŋ yap awɛ lə cyə́ nthʉm shyə lɑpʉə,

²biŋ shyə m nə Mosɛ ŋkwishyə guŋ yap awɛ nthʉm mlwa ba nthʉ̌m shyə lɑpʉə.

³Guŋ yap awɛ lə tsʉ pɑ ta' ywə tsʉ́ zhwenyə.

⁴Biŋ nwə́ guŋ yap awɛ pɑ́ ta' shyə zhwenyə, nə pa' wap lə nwə́ shyə bɔ a pɑ nthəm nə ghǔ gwɔ' zhwenyə yə a lə bɑwə giŋ jʉ̌m pu a: Ghǔ gwɔ' bɔ lə bɑ́ Kristo.

⁵Tə ba tə́ po'o, bo'gwyə́ pɔ nə pú lě tə puŋ Si nə pa' mpfə map lě sa ghakgo.

⁶Guŋ mnwə mɔ awɛ lə nthəm po'o gɑ pɑ lɑ́ fo' nə́, po'o gɑ pɑ kɑ́ ghi'nyə cwəpùŋ pa' wap lə ghi'nyə cwəpùŋ a.

⁷Ka po zhi pɑ ghamtə̀ kətwɔk pa' shɑ́ pɔ cəcɑ̌ pu a, dəŋdəŋ pa' a bɑ pu və gɑ: Pɔmnəŋ lə cwətə si dzʉ́ ywə biŋ nwə́, biŋ dú si ŋwɛnyə.

⁸Ka pɑ hɑ nɑ tsɔk pɑ nə gəgəm pa' shɑ́ pɔ cəcɑ̌ pu lə ghə a: Wap lə pfʉ̌tə pɔ sha' shwɔptɔ mgham bʉə nə ta' tyɛ̌'.

⁹Ka pɑ nəŋ dəŋtə́ Cyəpɔ pa' shɑ́ pɔ cəcɑ̌ pu lə́ ghə a: Mnɔ́k lě gə wap pfʉ́tə.

¹⁰Ka po ghə kùkùnthúŋ pa' shɑ pɔ cəcɑ̌ pu lə ghə a: gɛ si'nyə pɔ lé gə wap pfʉ́tə.

¹¹Guŋ mnwə mɔ awɛ lə nthəm nə pú po'o ba fo', pu piŋ bvə po'o gɑ a tɔk wɔk pɑ, wɔk pɑ pyə pɑ po'o bɑ nə jʉɔjʉ̀m cwə dzʉ̌ a.

¹²Pa' ǎ pɑ po'o a, mo yə ě wə ŋkwɛ́ gɑ́ e tiŋnyə thə́ a pɔmtə gɑ e kɑ vʉ̀si.

¹³Mləŋtə myə a lə ləŋtə wɔ a lə bɑ ǎ ku' nə mo. Si bɑ̀ nyənyɔ; e tə́ gɔ piŋ gɑ mləŋtə myə a cyə́ gʉ' yɔ a ko nə po pɑ́. Nə mləŋtə, e gɔ hɑ jyə nə nthəm nə́ ba gʉ' nə ŋkwǎ.

¹⁴A po'o tə wɔ pyə gɑ̌ ŋkhuŋ wɔ a, po kʉ́ nə ghamtə kətwɔk.

¹⁵Gɑ̌ gɔm bi mzhyənwə; po sɛ nwə pɑpuŋ nə ywə yə gɑ̌ gɔm a.

¹⁶Nthu' byǎnyə yə pɑ nyəŋ byanyə nə a tə bɑ yɔk pɑ nə tamtə nə mcyə Kristo a? Msɛ myə pɑ bo' a tə bɑ́ yɔk pɑ nə tamtə nə nɑ́ Kristo a?

¹⁷Pa' msɛ̌ bɑ́ pɑ yɑmu' a, pɑ bɑ guŋ yɔk pɑ awɛ pɑ́ ta' nɑ yɑmu'; nə pa' guŋ yɔk pɑ awɛ nthamtə pɑ́ nə da' ta' msɛ̌ bɔ.

¹⁸Po yɔ pɑ Israɛl, pɔ pyə wap pfɑ bap tsə pwɔ' mkətwɔk a tə nthamtə nə tsʉ' to tsə pwɔ' a?

¹⁹Gɑ̌ po'o bɑ gɔm gɑ́ kɑ? Gɑ́ bap nə nuŋpwɔ' bi mkətwɔk kɑ mkətwɔk lə ku' mu' ywə lə́?

²⁰Gɛ̌! Tə pa' pu nuŋpwɔ' bɔ m bi mzhwenyə cwəpuŋ, la' pu pɑ nuŋ m bi Si a pɑ, ŋ kha kuŋ gɑ po a mzhwenyə cwəpuŋ tamtə́.

²¹Bi a pɑ́ po lə nwə nthu' Cyəpɔ pu yə mzhwenyə cwəpuŋ ŋkwi cʉ̌m pɑ́.

²²Kɑ pɑ́ bɑwə shəŋ nə sitə yɛ̌luŋ Cyəpɔ? Pɑ̌ bɑ pɑ̌ ghə gʉ' shyə́ é a?

²³Pɑ́ mo ghə guŋ ywə awɛ, tə́ guŋ ywə awɛ tə gəm nə pɑ pɑ. Pɑ́ mo ghə guŋ ywə awɛ tə́ guŋ ywə awɛ tə kwitə pɑ.

²⁴Sɔmmo kɑ cəŋ pɑ́ da' yə nwə, e cəŋ ba yə pyə shɑ́ pɔ.

²⁵Guŋ tsə tsyə pu fiŋ sim a po pfɑ tə́ ywɔk sɔlam nə piŋnthʉm,

²⁶nə pa' dəmcǎ' pu a guŋ tsə tsyə a bɑ nə́ a bɑ pɑ tsə́ Cyəpɔ.

²⁷Mo yə e tə mo Kristo pɑ ké o, o piŋ gɔ ywə́ é, o ko dzʉ́ bǎ kɑlɑ́ yə e hɑ bu a tə ywɔk sɔlam nə piŋnthʉm.

²⁸Tə mo ghɔm bu gɑ: Yəŋ bɑ́ bap tsə pwɔ' mkətwɔk, o kɑ pfɑ, shyə m nə mo yə e siŋ o a ba m nə piŋnthʉm.

²⁹Ŋ tə gɔm tsɔ' po'o m nə piŋnthʉm o pɑ́, gɑ gɔm m nə yə́ mo bɔ. Nə pa' a gɔ ghə m gɑ kɑ̀ tə piŋnthʉm mo tebya nə yɑ nə cyətə pɑ ŋkwɔ̌.

³⁰Ŋ nə tsʉ̌ ywətsʉ hɑ gho'tə bɑ nwə kɑ mo gɔ cɔk a gɑ́ gɑ̌ hɑ gho'tə?

³¹Kɑ́ po dzʉ́ pɑ ywə́ lə, kɑ́ po nwə́ pɑ ywə lə́, kɑ a bɑ pɑ́ kɑ́ lə́, po ghə guŋ ywə awɛ nə́ nə gu'tə Si.

³²Ka po pɑ́ bi sɔmmo bɑ ywə fa'tə̀, kɑ bi yə Yudea lə, kɑ bi yə Grikia lə, kɑ bi Cu'tə pɔ Si lə.

³³A po'o tə kwa' myə gɑ̌ ŋkhaktʉɔ nə puŋ guŋ pɔ awɛ nə guŋ ywə awɛ, nə cyətə cəŋ pɑ da' yɑ̌ pɑ, nə cəŋ yə́ pɔ jɔmyɔ̌m, po'o gɑ wap vɔ̌k.