Read Ghomala New Testament 1 KORINTO 11 Bible Online

1 KORINTO 11 - Ghomala New Testament bible

1 KORINTO 11

¹Po pɑ́ pɑ fo'msə́nyə a pa' gɑ̌ fo'msə́nyə Kristo a.

²Gɑ̌ gho'tə wɔ́ nə pa' po ŋkhamtə́ a nə guŋ mcwə awɛ biŋ bɑ nthɔm guŋ ywə́ awɛ pɑ́ pa' ŋ də hɑ bi po a.

³Tə́ gɑ̌ wə́ shəŋ gɑ́ po zhyə́ gɑ́: fo bǎ yá mbɛ lə́ bɑ Kristo; fo mjwǐ pɑ́ mbɛ; fo Kristo pɑ́ Si.

⁴Bǎ ya mbɛ lə yə e pfɔptə́ thə́ e tə́ shwyɛ'nyə Si kɑ tə́ gɔm ghɔm Si a lə jəmtə́ pa' fo e.

⁵Tə́ bǎ ya mjwǐ lə́ yə e shwyɛ'nyə Si kɑ gɔ́m ghɔm tə pfɔptə́ thə́ é a jəmtə pa' fo e; nə pa' a shwə pa' ě kəm thə e a.

⁶Mjwǐ pɑ́ bɑ e tə́ gɔ kwɑ thə é a, e ghə pu yá'tə nəŋ thə́ e. Tə́ a pɑ́ kuso bi mjwǐ nə ya'tə nəŋ thə́ e kɑ nə́ kəm lə e kwɑ́.

⁷Tə sɔ' m nə mbɛ, e tə́ gɔ kwɑ́ thə́ e pɑ́: É bɑ́ cyəŋnyə Si biŋ bɑ mghu'tə myə; tə́ mjwǐ bɑ ghu'tə mbɛ.

⁸Nə pa' tə mbɛ tə́ pú lə́ nthé é nə mjwǐ pɑ́, mjwǐ tə́ pú lə́ nthé é nə mbɛ.

⁹A biŋ bɑ́ bɑ pu la tə bə́m mbɛ m bi mjwǐ pɑ́, pu lə bəm pɑ́ mjwǐ bi mbɛ.

¹⁰A po'o tə́ mjwǐ ghɔ pɑ́ yap mtiŋ thə́ é nə la'tə gɑ́ e ju'nyə mbɛ, nə bwɔk pɑ aŋgəle.

¹¹A bɑ́ po'o bi a pɑ́ pu lə haptə́ mjwǐ nə mbɛ ba mbɛ nə́ mjwǐ dzə Cyəpɔ.

¹²Nə pa' a pɑ́ gɑ́ pu lə nthé mjwǐ nə́ mbɛ bɑ mjwǐ nə dzə́ mbɛ, guŋ e awɛ fɑ́ bi Si.

¹³Kwa' wɔ yɔ sɛ, ǎ puŋ gɑ pɑ́ mjwǐ cwyɛ'nyə Si tə kwɑ̌ thə́ a?

¹⁴Ba kwa' pa' mǒ nə bɑ́ a tə wə da'tə bi pɑ gɑ́ a bɑ́ kuso bi mbɛ nə cap thə é a?

¹⁵A nə́ŋ biŋ bɑ bi mjwǐ bɑ ghu'tə nə pa' pu lə́ hɑ nəŋ thə́ bi e pa' kwɑthə́ a.

¹⁶Bi a nəŋ bɑwə buŋ bi mo pɑ́ nə tédʉ', bɑ a tə́ mɑ yɔk pɑ́ pɑ̀, a lə nəŋ bɑ́ yə́ dyə mcu'tə Si pɑ́.

¹⁷Pa' gɑ nyaptə yəŋ tə́ jap po'o a, ŋ tə́ gɔ gho'tə wɔ pɑ; mcu'tə mɔ tɑ̌ wə dɑ wɔ gɔ m dzə pɑ. A wə́ gə́ pɑ́ cwəpuŋ nə́ po.

¹⁸Dəŋdzə nwə nə wə bɑ́ gɑ́ pú siŋ a gɑ́ cwə yə́ po shu'tə a, ŋkhyɛ'nyə pɑ́ cəcɑ̌ po, bɑwə ŋkwɛ gɑ́ a nə mu' ghəŋ bɑ nyənyɔ.

¹⁹Nə pa' ǎ cəŋ gɑ́ mghaptə pɑ cəcɑ̌ po tə́ pu nə jyə́ pɔ pyə bi a pɑ́ wap lə vʉ́ nə mləŋtə a.

²⁰Da' gɑ́ cwə yə po nthamtə shu'tə a, ywə yə po dɑ a tə́ bɑ ywətsʉ Cyəpɔ pɑ.

²¹Nə pa' bǎ ya mo lə́ do'nyə pɑ́ nə tsʉ́ kwa' ywətsʉ e tə́ jikǔ' pɑwə nə yɛ pyə shɑ́ pɔ, pyə shɑ́ pɔ pɑwə bam.

²²A tə́ bɑ po ghə mdyə mɔ nə tsʉ́ywə biŋ nwə nə a? Kɑ po gwak cu'tə Si, bɑ shəŋ gɑ́ po a pɔ pyə́ wap ka ghə ywə a twɔ'nyə? Gɑ̌ gɔ ghɔm bi po gɑ́ kɑ? Gɑ̌ gɔ gho'tə wɔ lɑ? Gɛ̌ pɑ ŋ də gho'tə wɔ nə nwə yə̌ŋ.

²³Myə, ywə yə ŋ də kwǐ bi Cyəpɔ biŋ hɑ bi po a yəŋ bɑ gɑ: Cyəpɔ Yeso Kristo nə mtsʉ̌' yə pu lə́ hɑ̌ e a, lə́ pé msɛ̌

²⁴biŋ go'tə Si, bo' gɔm gɑ: Yəŋ gɑ bɑ bapnɑ a yə pu hɑ nə po a. Po ghə po'o bɑ nə ŋkhamtə a.

²⁵E lə kwi' gə pɑ́ po'o nə nthu' cwə yə́ ywətsʉ lə myə a gɔm gɑ: Nthǔ' yəŋ gɑ bɑ kɔ sə́ nə mcyə mə̌; po pɑ́ gə po'o guŋ mcwə awɛ myə po nwə́ a bɑ nə́ ŋkhamtə a.

²⁶Nə pa' guŋ mcwə awɛ myə po tsʉ́ mɔ gɑ msɛ̌ biŋ nwə yəŋ gɑ nthǔ' a, pǒ siŋ vʉ́ Cyəpɔ tə̌ e la' sɔ̌'.

²⁷A po'o tə́ mo yə e gɔ sɔ' tsʉ́ msɛ piŋ nwə́ nthú' Cyəpɔ tə́ ku'nyə nə a, bɑ ě hɔ bi nɑ́ ba bi mcyə́ Cyəpɔ.

²⁸Bǎ ya mo lə́ cəŋtə́ dyəŋtə nɑ́ e tə dzʉ́ mɔ msɛ̌ biŋ nwə yəŋ nthǔ'.

²⁹Nə pa' mo yə́ e dzʉ́ biŋ nwə́ tə tiŋtə nɑ Cyəpɔ a dzʉ́ biŋ nwə pa' yə nə nyəŋ shɛ thə́ e.

³⁰A bɑ ywə yə́ a gə tə mghɛ gho pu a mkʉ̌m yɔm cəcɑ̌ po a, bɑ ba mu' dəŋ pɔ̌ piŋ npfʉtə́ a.

³¹Pɑ pɑ́ dé nɑ tsɔk pɑ, bɑ pú tə gɔ sɔ' fyɛ' wɔk pɑ pɑ;

³²Tə́ Cyəpɔ fyɛ' wɔk pɑ nə nə nthɔk wɔk pɑ po'o gɑ pu kɑ nyəŋ shɛ thə wɔk pa dzʉ̌.

³³A po'o mfɑmfɑ́ tə́ cwə yə́ pǒ shu'tə bɑ gɔ tsʉ́ ywə a, po pyap wɔ́ wɔwɔ.

³⁴Jikǔ' yɛ́ mo é tsʉ́ywə la' e, po'o gɑ po kɑ cu'tə m nə nyəŋ shɛ thə po. Sɔ' m nə yə a shʉ' a, gɑ̌ gɔ sɔ' sɔ' tə́ ko wə po tə nyaptə.