Read Ghomala New Testament 1 KORINTO 12 Bible Online

1 KORINTO 12 - Ghomala New Testament bible

1 KORINTO 12

¹Mfɑmfɑ́, sɔ' m nə tsə́ tsyə Zhwenyə hɑ a, ŋ tə gɔ tak wɔ pa' mkəkhʉɔ a pɑ.

²Pǒ zhyə gɑ́ cwə yə́ po lə́ jɑ pɑ pɑ tə́ pɑ pɑ Yudea a, pu pɑ fəŋ wɔ nə gɔ pa' pɑ tə zhyə́ jyə̀ a bəŋ mkətwɔk pyə wap tə gɔmnwə a pɑ́.

³A po'o tə gɑ siŋ wɔ gɑ́ pɑ sɔmmo lə cyə m nə́ Zhwenyə Si gɔm gɑ́: Dò nə Yeso. Bi a pɑ́ sɔmmo lə nə́ŋ gɔm gɑ: Yeso bɑ́ Cyəpɔ tə́ cyə pɑ nə Zhwenyə Dɔlɔ̌.

⁴Tsə́ tsyə́ Zhwenyə hɑ á bɑ nthinthi da' gɑ́ Zhwenyə bɑ́ pɑ́ yɑmu'.

⁵Mfa' bɑ́ nthinthi da' gɑ Cyəpɔ pɑ́ pɑ yɑmu',

⁶nə ghə pɑ́ nthinthi da' gɑ́ pɑ da' ta' Si nə pɑ́ gə guŋ ywə awɛ nə guŋ pɔ awɛ.

⁷Bǎ yá mo lə́ ŋkwi ywə yə Zhwenyə hɑ bi a nə nə fa' pɑpuŋ bi guŋ pɔ awɛ.

⁸Zhwenyə hɑ ghɔm fʉ́ bi mu' mo, biŋ hɑ ghɔm zhyənwə bi yə mu' mo.

⁹Pɑ Zhwenyə bɔ nə hɑ nə ghə piŋnthʉm bi mu' mo biŋ hɑ nə yɛ́ mgho bi yə mu' mo

¹⁰pɑ Zhwenyə bɔ nə hɑ tʉ̀ɔ nə gə msyà bi mu' mo, biŋ hɑ nə ghɔ́m ghɔm Si bi yə mu' mo, hɑ nə zhyə tiŋtə mzhwenyə bi mu' mo, hɑ mghɔm nthinthi bi yə mu' mo, biŋ hɑ nə tútə mghɔm bɔ bi mu' mo.

¹¹Da' gɑ́ guŋ e bɔ awɛ, pɑ da' ta' Zhwenyə nə́ gə biŋ gaptə, hɑ bǎ yə nə pɑ wɑ̌lə pa' e nə jɔ a.

¹²Pɑ̌ zhyə́ gɑ nɑ́ bɑ yɑmu' biŋ bɑ́ bɑ e ghə mkamtə jɔmyɔ̌m; tə́ mkamtə nɑ yɔm pɑ gɑ́ kɑlə́ bɑ wap bɑ pɑ́ nə́ ta' nɑ́ yɑmu' a bɑ́ dəŋdəŋ po'o nə Kristo.

¹³Nə pa' guŋ yɔ̀k pɑ̀ awɛ, pɑ̀ lə ŋkwishyə pɑ nə ta' Zhwenyə yɑmu', nɑ nəŋ bɑ́ ta' nɑ́ yɑmu': Kɑ pɑ̌ bɑ́ pɑ́ yə Yudea kɑ yə Grikia lə, kɑ ŋkwɔ kɑ tə pɑ ŋkwɔ lə, a piŋ bɑ́ bɑ pu lě dɑ pɑ́ ta' Zhwenyə nwɔk wɔk pɑ̀.

¹⁴Nɑ tə́ bɑ da' ta' kam pɑ̀, a bɑ́ mkam mkàm.

¹⁵A bi a kwə́ mo ghɔm gɑ: Pa' ŋ tə bɑ pu mo a pɑ, ŋ tə nə́ nɑ mo pɑ, bɑ e tə́ jɑ́ nə́ nɑ mo a?

¹⁶A bi a tə̌ŋ mo ghɔm gɑ: Pá' ŋ tə bɛtsə mo a pɑ́, ŋ tə yɑ̌ nə́ nɑ́ mo pɑ bɑ́ e tə́ jɑ́ nə́ nɑ́ mo a?

¹⁷Guŋ nɑ́ mo awɛ lǎ' pe' e bɑ pɑ́ bɛtsə́, bɑ tə̌ŋ bɑ m hɑ́? Bi a guŋ e awɛ lǎ' pe' bɑ pɑ tə̌ŋ bɑ mtsə́ mo bɑ m hɑ́?

¹⁸Tə́ Si bɑ é lě jap bǎ ya kam nɑ́ lə́ nə nɑ́ pa' ě nə jɔ a.

¹⁹Guŋ e awɛ lǎ' pe' e bɑ pɑ́ ta' kam bɑ nɑ mo bɑ m hɑ?

²⁰Mkam nɑ́ mo bɑ ǎ yɔm tə́ nɑ mo pɑ pɑ́ yɑmu'.

²¹Pɑ́ bɛtsə lɑ ghɔm bi pǔ mo gɑ: Nwə o tɑ̌ nə m̀ pɑ̀. Kɑ thə́ mo nə ghɔm bi mkwə myə gɑ: Nwə yɔ tɑ̌ nə m̀ pɑ̀.

²²A nə́ pɑ̌ po'o mkam nɑ́ mo myə a shwə́ pa' myə́ bwapwǎ a nə pɑ myə a ŋkwitə́ te'te' a,

²³a piŋ bɑ́ po'o myə pɑ jɔ gɑ mku' tə́ gyɛ' bɑ nə a pɑ nə́ pɑ myə pɑ̌ nyəŋ mku' nə te'te' a. Myə́ tə dəŋ nə bɑ́ myə́ pɑ̌ nyə́ŋ dəŋ nə a.

²⁴Myə́ mkam nɑ́ myə dəŋ bɑ nə a tə jwɔk shəŋ pɑ́ gɑ pu fa' nə pɑ́. Tə́ Si bɑ e lě nə nyaptə nɑ mo shəŋtə́ nyəŋ mku' nə́ yə kam yə mku' tə̌ nə́ a pɑ́,

²⁵po'o gɑ́ ŋkyɛ́'nyə kɑ́ pɑ̌ nə́ nɑ́ mo, tə́ mkam nɑ myə pɑ shɔm dzənyə́.

²⁶Ta' kam nɑ mo pɑ́ jɔgo' bɑ pu a guŋ mkam nɑ mo awɛ bəmtə́ jɔgo'; bi a ta' kam nɑ mo pɑ nə mku' bɑ pu a guŋ mkam nɑ awɛ bəmtə́ ŋwɛnyə.

²⁷A nəŋ bɑ́ po'o po pɑ nɑ́ Kristo, biŋ bɑ mkam nɑ́ myə́, bǎ yá mo lə́ nə́ yə zhəŋ.

²⁸Pɔ pyə Si bɑ ě yap wap dzə̀ nthʉm cu'tə pɔ Kristo a dəŋdzə bɑ mghɛ nthəm, bɔtə bɑ mghɔm ghɔ̀m, biŋ bɔtə bɑ pɔ pyə́ a bɑ e yap wap gɑ́ wap pɑ́ ji'tə pɔ ywə a; nthəm jʉ̀m cwəlɔ bɑ pɔ pyə a bɑ pu hɑ nə ghə msyanwə bi pu a, ba nə́ yɛ́ mgho, ba nə kwitə, ba nə́ cya pɔ, biŋ gə nə ghɔm mghɔ̀m.

²⁹Guŋ yap awɛ bɑ pɑ́ mghɛ nthəm a? Guŋ yap awɛ gə msya a?

³⁰Guŋ yap awɛ bɑ wap kwi nə yɛ mgho a? Guŋ yap awɛ gɔm mghɔm a? Guŋ yap awɛ nthútə́ mghɔm a?

³¹Po cə́ŋ ywə hɑ hɑ̌ yə pɑpúŋ. Gɑ̌ gɔ piŋ la'tə wɔ kwa' məjyə yə ǎ tə dzə a.