Read Ghomala New Testament 1 KORINTO 13 Bible Online

1 KORINTO 13 - Ghomala New Testament bible

1 KORINTO 13

¹A pɑ́ gɑ gɑ̌ ghɔm mghɔ̀m, gɔm myə pɔmnəŋ ba myə pɑ aŋgəle tə́ tɑ́ ghə ŋkhuŋnyə bɑ gɑ̌ bɑ pɑ́ kam tʉɔ yə a wə gi a, kɑ mbak kɔm myə ǎ wə gi a lə.

²A pɑ gɑ́ gɑ̌ kwi nə ghɔm ghɔm Si, gɑ gɑ̌ zhyə guŋ ywə cyə zhyə̌nwə, jyə́ guŋ zhyə̌nwə awɛ, gə guŋ piŋnthʉm awɛ ba yə a shwɔ' mkǔŋgó a, tə́ la' ŋkhuŋnyə pɑ bəm bɑ ŋ tə sɔmywə pɑ́.

³A pɑ gɑ́ gɑ̌ ghap guŋ potsə tsɑ̌ awɛ bi mghɛ jikǔ', bɑ gɑ́ gɑ̌ tò nɑ́ a pɑ́ mɔk, tə́ la' ŋkhuŋnyə pɑ bəm, bɑ ŋ tə gɔ tsʉpè sɔmywə nə́ pɑ.

⁴Ŋkhuŋnyə ŋkhyəp tʉm; ŋkhuŋnyə fa' fà' kwitə. E tə ŋkhíŋ mo pɑ, e lə pɑ́ da'tə nɑ é, e lə pɑ ŋa' nɑ́ e.

⁵E lə pɑ gə sɔmywə yə ǎ pɔk a, e lə pɑ shəŋ pɑ yə́ fʉ', e lə pɑ́ jɛlúŋ, e lə pɑ́ dwɔ' bò.

⁶E lə pɑ ŋwɛnyə nə nwə yə a ka tiŋnyə a, da' gɑ́ bɑ ŋwɛnyə nə nwə nyənyɔ.

⁷E pfɔptə guŋ mnwə awɛ, biŋ guŋ mnwə awɛ, bɑ mɔktə guŋ mnwə awɛ, bɑ sɔk nə guŋ mnwə awɛ.

⁸Ŋkhuŋnyə tə mi pɑ́. Nə ghɔm ghɔm, pu gɔ sɔ' ghə a mi, nə ghɔm mghɔm dyɛ' gɔ sɔ' mi, zhyə̌nwə mǐ.

⁹Nə pa' zhyənwə yɔk pɑ́ bɑ a ghə dhə̀ e, ba dhə nə ghɔm ghɔm pɑ wə́.

¹⁰Da' gɑ́ cwə yə ywə dɔlɔ̌ gɔ sɔ' sɔ' a, ywə yə dhə̀ e bɑ wə a mǐ.

¹¹Cwə yə ŋ də jɑ̀ mu a, bɑ gɔm nwə pa' mu a, bɑ ŋkwɛnwə pɑ́ pa' mu a, bɑ sɛ nwə pɑ́ pa' mu a. Ŋ dé shwə́ tə bɑ gətso gwa' ywə yə a bɑ yə mu a.

¹²Cwəlɔ pɑ́ jɔ guŋ ywə awɛ m nthʉ̌m kyɛ', bɑ jɔ pɑ́ sonyə sǒnyə́, da' gɑ pɑ gɔ sɔ' yɔ kwa' dəŋdəŋ. Kwa' cwəlɔ yɑ nə zhyə́ ghə dhə̀, tə gɑ gɔ sɔ' zhyə́ pa' pu jyə́ a.

¹³Cwəlɔ, mnwə̀ mɔ gɑ́ mənthá: piŋnthʉm, mɔktə, ŋkhuŋnyə tə́ mi pɑ́, tə yə gwyə yə a bɑ́ nə́ a bɑ ŋkhuŋnyə.