Read Ghomala New Testament 1 KORINTO 14 Bible Online

1 KORINTO 14 - Ghomala New Testament bible

1 KORINTO 14

¹Po cə́ŋ ŋkhuŋnyə; shəŋ tsə́ tsyə Zhwenyə hɑ a, shə́ŋ te'te' shəŋ nə́ ghɔm ghɔm Si.

²Nə pa' mo yə e gɔm mghɔm dyɛ' a, tɑ́ gɔm m bi pɔmnəŋ pɑ, e gɔm m bi Si: Sɔmmo tə́ ju' ywə yə́ e gɔm a pɑ́. Zhwenyə e pɑ gɔm ywə́ cyə zhyə̌nwə.

³Tə́ mo yə e gɔm ghɔm Si a, gɔm nwə bi pɔmnəŋ, bɑ nə ŋkwyətə wap, səso wap, hɑ kaktʉɔ bi pú.

⁴Mo yə e gɔm mghɔm dyɛ' a ŋkwyətə pɑ da' thə́ nɑ́ e, tə́ mo yə e gɔm mghɔm Si a ŋkwyətə́ guŋ cu'tə awɛ.

⁵Kɑ miŋnyə̀ m myə̀ bɑ guŋ yɔ awɛ gɔm mghɔm dyɛ' da' gɑ́ gɑ cwɔ' m gɑ́ po ghɔm ghɔm Si. Mo yə́ e gɔm ghɔm Si a bɑ e cyə́ mo yə e gɔm mghɔm dyɛ' a, tə́ ně da' yə ě tútə mghɔm bɔ gɑ a kwyətə́ cu'tə a.

⁶Mfɑmfɑ, po nyəŋ gɑ́ gɑ̌ sɔ' jɔ́ wɔ gɔm mghɔm dyɛ' bi po: A pɑ gɑ ghɔm tsɑ̌ ka ghə́ po zhyə́ sɔmywə, kɑ zhyə̌nwə, kɑ ghɔm Si lə́, kɑ ywə ji'tə zhi'tə lə bɑ gɑ̌ kwitə́ wɔ m kɑ̀?

⁷Pɑ lɑ fo' nə tsə́ nə bu' ywə pa' dǔŋ kɑ bətu' lɑ: A pɑ gɑ́ bǎ ya lə ka ghi nə yə nthi bɑ pu tə gɔ zhyə ywə yə́ dǔŋ nthuŋ a pɑ́, pu lə zhyə́ ywə yə́ bətu' bu' a.

⁸A bi a lwɔp nəŋ bɑ tə́ ghi pa' lwɔp a, bɑ wɑ̌ gɔ nyaptə́ shù?

⁹A bɑ dəŋdəŋ po'o nə po. A bi a ghɔm tsɔ pɑ́ tə́ pɑ ghɔm tsyə pu zhyə́ tsá a bɑ pu gɔ yu' ywə yə po gɔm a m gɑ́ kɑ̀?

¹⁰Mshwə́ ghɔm bɑ nthʉm dzʉ́ tə mo lə zhyə́ də̀ŋ e. Bǎ yɑ shwə́ ghɔm lə́ pɑ́ bɑ ǎ ghə nwə yə a gɔm a.

¹¹Tə bɑ́ tə zhyə̌ ywə yə shwə́ ghɔm bɔ gɔm a bɑ gɑ̌ bɑ bi mo yə́ a bɑ́ ghɔm tsyə́ a bɑ gʉɔ gɛ ghɔm bɔ piŋ bɑ́ bəm bɑ gʉɔ.

¹²A pɑ́ dəŋdəŋ po'o nə po: Po cə́ŋ nə cəŋtə ju' tə gɔ̌m, pa' ǎ wə buŋ wɔ nə́ ghɔm mghɔm dyɛ' a. Da' gɑ a pɑ́ nə́ nə ŋkwyətə cu'tə̀.

¹³A po'o tə mo yə́ e gɔm ghɔm dyɛ' a gɔ pɑ́ cəŋtə cwyɛ'nyə Si gɑ e hɑ nə tùtə mghɔm bɔ bi e.

¹⁴Ŋ bɑ shwyɛ'nyə Si nə mghɔm dyɛ' bɑ zhwenyə a wə shwyɛ'nyə Si da' gɑ zhyənwə a lə́ pɑ́ nə́.

¹⁵Tə́ gə gɑ́ kɑ? Gɑ gɔ lɑ zhwenyə a cwyɛ'nyə da' gɑ piŋ lɑ ba zhyə̌nwə a cwyɛ'nyə. Gɑ gɔ lɑ zhwenyə a zhwɔp da' gɑ piŋ lɑ ba zhyə̌nwə a zhwɔp.

¹⁶Nə pa' a bi a da' zhwenyə o nə pɑwə fa' nə cwə yə o nyəŋ byanyə a, bɑ mo yə e bɑ yə si cəcɑ̌ pɑ yu' pɑ da' nə yú' a gɔ nə ghɔm gɑ amɛn nə mcwyɛ'nyə mǔ bɑ ě zhyə́ gɑ o ghɔm gɑ́ kɑ?

¹⁷Pɑ́tyɛ' bɑ mcwyɛ'nyə mǔ cəŋtə buŋ te'te', da' gɑ a lə kwi' sɔmywə bi yə mu' mo.

¹⁸A shyə nə gho' Si bɑ gɔm mghɔm dyɛ' tə shyə́ guŋ pɔ awɛ.

¹⁹Da' gɑ nthʉm cu'tə, gɑ̌ lɑ nə́ ghɔm ghɔm mshwə nthɔ myə pu gɔ yu', a tɔk pyə shɑ pɔ a, shyə nə ghɔm mghɔm dyɛ' sha' ghǎm.

²⁰Mfɑmfɑ́ ka po sɛ nwə̀ pa' pǒ mkəcɔk po a, da' gɑ sɔ' m nə nwə cwəpuŋ po pɑ́ pa' pǒ mkəcɔk po a. Tə sɔ' m nə́ nə sɛ nwə po pɑ́ mghətsó.

²¹A bɑ pú və nə́ mco' gɑ: Gɑ̌ gɔ sɔ' cyə m nə́ pɑ ghɔm mu' mghɔm dyɛ' tə ghɔmnwə bi pɔ́ pɔ gɑ, piŋ cyə m nə mkwɔptəshwə mghʉɔ; a pɑ po'o wap lə yu' ywə yə gɑ̌ gɔm a; Cyəpɔ nə gɔm po'o.

²²A bɑ po'o tə la' mghɔm dyɛ' pɑ mtiŋ bi pɑ piŋ pɑ̀, a bɑ mtiŋ m bi pɑ tə piŋ: Ghɔm gɔm ghɔm Si lə pɑ́ mtiŋ bi pɑ tə piŋ pɑ, a bɑ mtiŋ m bi pɑ piŋ.

²³A bi a guŋ pɔ Kristo awɛ cu'tə si, guŋ yap awɛ pɑ gɔm pɑ mghɔm dyɛ', bɑ pɔ pyə́ wap sɔ' da' nə yu', pu a pɔ pyə wap ka wuŋ biŋ a tə́ gɔ kwɛ m gɑ pǒ pʉə a?

²⁴Tə guŋ yap awɛ piŋ bɑ gɔm pɑ́ ghɔm Si, bɑ mo yə e ka wuŋ biŋ a, kɑ mo yə e sɔ' yə da' nə yu' yǔ' a gɔ yɔ gɑ guŋ pɔ awɛ bɑwə gɔm nwə bi e, bɑwə nthe bya nə e,

²⁵nthú ywə yə a bɑ ě tʉ́m nthʉ́m tʉ́m e a, bɑ e gɔ vʉ́si, mpfɔptə́ sə é si ghamtə́ Si, nəŋ piŋ ghɔm gɑ Si bɑ cəcɑ̌ po kwa' nyənyɔ.

²⁶Mfɑ̌mfɑ́ tə̌ pɑ ghə gɑ kɑ̀? Cwə yə́ po shu'tə a, bǎ ya mo lə́ nə́ po ghə̀ nə zhwɔp ta' zhwɔpshyə, dɑ ta' ywə ji'tə zhi'tə kɑ yə da'tə la'tə lə nə́ sɔ̌', kɑ gɔm mghɔm dyɛ', kɑ nthutə lə. Da' gɑ guŋ e awɛ pɑ́ gɑ po nə ŋkwyə cəcɑ̌ po.

²⁷Sɔ' m nə́ nə ghɔm mghɔm dyɛ̌', da' pɔ pɑpʉə́ nə ghɔ̌m kə́ pɔ pɑtá lə; a mu' mo nəŋ nthutə.

²⁸A pɑ gɑ mo yə e gɔ tútə a tə̌ si pɑ́, yə bɔ fɑ lɛ́tə nthʉm cu'tə. E ghɔm pɑ da' bi tʉ́m tsyə́ ba m bi Si.

²⁹Sɔ'm nə mghɔm pɑ ghɔm ghɔ̀m Si pɔ pɑpʉə kə pɔ pɑtá lə lɑ ghɔm. Pyə́ shɑ pɔ sɛ nwə nə́.

³⁰Bi a pɑ gɑ mu' mo yə ě sɔ́' yə́ bɑ si a kwi ywə yə e gɔ ghɔm a, yə mo yə e ji bɑwə gɔm a lɛ́tə.

³¹Pɑ guŋ yɔ awɛ ghɔ́m ghɔ̀m Si, da' gɑ́ gɔm mkhɛ, bǎ ya mo lə́ nə́ yə́ cʉ́m, po'o gɑ a tɔk guŋ pɔ awɛ, biŋ hɑ kaktʉɔ bi guŋ pɔ awɛ.

³²Gɔm ghɔm Si nə gə zhwenyə ghɔm Si yə a bɑ nə e a.

³³Nə pa' Si tə́ bɑ Si va' pɑ, e bɑ Si hwitə.

³⁴Dəŋdəŋ pa' pu gə nə guŋ mcu'tə pɔ dɔlɔ̌ a, pɑ jwǐ lɛtə́ nthʉm cu'tə; pu ka piŋ gɑ wap ghɔmnwə pɑ; wap yu'nyə pa' mco' gɔm a.

³⁵Wap pɑ gɔ həŋtə́ ywə yə wap ka yu' a wap ko m dyə máp tə́ həŋtə mthə́ páp. A ka puŋ gɑ mjwǐ ghɔmnwə nthʉm cu'tə́.

³⁶Ghɔm Si lə ntho' fɑ wə po a? A bɑ da' wɔ nə lě ŋkwi ghɔm Si bɔ.

³⁷Mo yə e kwɛ gɑ e bɑ gɔm ghɔm Si a, kɑ m gɑ ywə bi e fɑ bi Si a, e zhyə́ gɑ ywə yə́ gɑ̌ bvə́ bi po a bɑ mco' Cyəpɔ.

³⁸Mo pɑ tə zhyə po'o bɑ Si ka zhyə e.

³⁹Pa' ǎ pɑ po'o a, mfɑ́mfɑ, po yɛ́nɑ́ nə nə́ ghɔ̀m ghɔm Si da' gɑ po kɑ kɔ gɑ pu kɑ ghɔm mghɔm dyɛ',

⁴⁰da' gɑ́ guŋ ywə awɛ cyə́ pɑ́ pɑpuŋ, giŋ nə ŋkhɛ.