Read Ghomala New Testament 1 KORINTO 15 Bible Online

1 KORINTO 15 - Ghomala New Testament bible

1 KORINTO 15

¹Mfɑ́mfɑ gɑ̌ wə ŋkhamtə Cuŋ pɑpuŋ yə ŋ də siŋ wɔ a bi po, Cuŋ pɑpuŋ yə po lə kwǐ biŋ ŋkwɑ nɑ tsɔ nə́ a,

²a piŋ bɑ́ ywə yə́ po gɔ sɔ' cyə m nə vɔk, bi a pɑ gɑ po tɔm pɑ kwa' pa' ŋ də nə siŋ wɔ a; a taktə pɑ̌ po'o bɑ po le biŋ yɔ pɑ pɔpɔ.

³Ŋ də lə́ŋdzə̀ siŋ wɔ yə́ ŋ də yu' a gɑ: Kristo bɑ ě pfʉ́ nə mhɔ mɔk pɑ̀ pa' pu lə́ və a.

⁴Pu lə təŋ e, e yam nə vʉ̌ dəŋdəŋ pa' pu lə və a.

⁵E lě da'tə nɑ́ e bi Kefas ba m bi pɔ shwɔppʉə mgham.

⁶E lə piŋ da'tə nɑ́ e bi shɑ mfɑ tə wap twɔk ŋkhətɔ ŋkwi cʉ̌m. Bo'gwyə pɔ cəcɑ̌ pu yɑ̌ pɑ wə́, bɑ shɑ́ pɔ nə pú nəŋ pfʉ̀tə́.

⁷E lə piŋ da'tə nɑ́ e bi Yakop ba m bi pyə shɑ́ mghɛ nthəm.

⁸E lə nə miŋ biŋ da'tə nɑ e ba m bəm yɑ̌, myə yə gɑ̌ bɑ pɑ pa' mú yə pú nthe e té a.

⁹Nə pa' gɑ̌ bɑ mo ŋkho' nə mghɛ nthəm, myə yə a bɑ ŋ kha ku' pa' bi a pu ké a gɑ́ gɛ nthəm a, myə yə́ ŋ də cwɔ'mkwə cu'tə pɔ Si a.

¹⁰Ywə yə gɑ̌ bɑ ya a, gɑ bɑ ya m pa' Si lə gho' a, gho' Si bɔ la tə bɑ pɑ néně bəm pɑ. Ŋ də fa' shyə guŋ pyə shɑ́ pɔ awɛ, tə́ tɑ myə nə lə fa' pɑ: Gho' Si nə lə fa'.

¹¹Po'o lə́ kɑ a fɑ pɑ m̀ bəm kɑ m bi pu lə, bɑ yə̌ŋ ywə yə pyə̌ siŋ a, bɑ ywə yə pǒ biŋ a.

¹²A bi a pu pɑ́ shyanyə gɑ́ Kristo yám nə vʉ̌, bɑ a gə́ la shɑ́ pɔ cəcɑ̌ po pɑ́ gɔm gɑ nə yam nə́ vʉ̌ tə́ bɑwə a?

¹³A pɑ́ gɑ́ nə yam nə vʉ̌ tə́ bɑwə pɑ́, bɑ ba Kristo ka yam nə vʉ̌.

¹⁴Bi a nəŋ bɑ́ gɑ́ Kristo ka yam nə vʉ̌ bɑ msiŋ mɔk tə́ ywə pɑ́, ba piŋnthʉm yɔk lə pɑ̀ ywə.

¹⁵Pyə piŋ bɑ pɑ mkwinthɛ̌ cwanwə nə Si, nə pa' pyə kwinthɛ́ cwanwə nə Si, nə piŋ gɑ́ Si yam Kristo nə vʉ̌ tə a bɑ́ gɑ e yam e nə vʉ̌, bi a pɑ́ nyənyɔ gɑ́ mpfə́ pɔ tə jam nə vʉ̌ a pɑ́.

¹⁶A pɑ́ gɑ́ mpfə́ pɔ tə́ jam nə vʉ̌ a, bɑ ba Kristo bɑ e ka yam nə vʉ̌.

¹⁷Bi a nəŋ bɑ́ gɑ́ Kristo ka yam nə vʉ̌ bɑ piŋnthʉm yɔ tə́ ywə pɑ́, po yɑ pɑ́ nthʉm mhɔnwə mɔ.

¹⁸Cwə yə ǎ pɑ́ po'o a, bɑ pɔ pyə wap pfʉ́ m nə Kristo a bɑ wap pi.

¹⁹A pɑ gɑ́ pɑ̌ yap yɔk pɑ mɔktə nə Kristo pɑ́ da' nthʉm yəŋ dzʉ̌, bɑ pɑ̌ bɑ́ kwa' dzə mghɛ ghəghʉɔ cəcɑ̌ pɔmnəŋ.

²⁰Tə gɛ̌; Kristo bɑ ě yam nə vʉ̌, bɑ də̀ŋdzə̀ mo nə pɔ pyə́ wap lě npfʉ a nə yam nə vʉ̌.

²¹Nə pa' vʉ̌ lə cyə́ m nə́ ta' mo tə́ sɔ' a, ǎ po'o tə nə yam nə vʉ̌ shyə m nə mu' ta' mo tə́ sɔ̌'.

²²Dəŋdəŋ pa' guŋ pɔ awɛ shyə m nə Adam pfʉ́ a, a dəŋdəŋ pa' guŋ pɔ awɛ gɔ sɔ' cyə m nə Kristo kwi vɔk a.

²³Tə́ bǎ ya mo lə́ gɔ sɔ' kwi pɑ́ nə yə́ cʉ́m: Mləŋdzə, a pɑ Kristo biŋ gə pɔ pyə wap bɑ pyə́ Kristo a, nə cwə yə e gɔ sɔ' sɔ' a.

²⁴A pɑ po'o jʉɔjʉm tyɛ'dzʉ sɔ̌': nə cwə yə ě hɑ nəfo bi Si Ta nə hɑ̌ po'o, bɑ e sa'tə guŋ nə hya pɔ hyǎ, guŋ nə sa' ba guŋ tʉɔ awɛ.

²⁵Nə pa' Kristo gɔ sa' tə́ kəm cwə yə Si yap guŋ mghɛ bo pyə to mkwə e a.

²⁶Jʉɔjʉ̀m gɛ bo yə e gɔ sɔ' sa'tə e a bɑ vʉ́,

²⁷nə pa' Si bɑ e yap guŋ ywə awɛ to mkwə e a. Tə cwə yə e gɔ sɔ' ghɔm gɑ: Guŋ ywə awɛ yu'nyə a, e tə́ gɔm ba Mo yə e gə pu yu'nyə e a pɑ́.

²⁸Cwə yə́ guŋ ywə awɛ gɔ sɔ' yu'nyə bi a, a pɑ po'o kwa' yʉ́ Mú yu'nyə bi Mo yə e gə pu yu'nyə bi a, po'o gɑ Si sa' guŋ ywə awɛ.

²⁹A lǎ' shyətə́ pɑ̌ m po'o bɑ pɔ pyə wap gə pu nu' wap shyə nə yə tsʉ' mpfə́ pɔ a shəŋ gɑ́ kɑ̀? A bi a pɑ gɑ́ mpfə pɔ tə jam nə vʉ̌ a bɑ nwə kɑ́ wap kwishyə nə pú?

³⁰Tə ba kwa' wɔk pɑ, nwə kɑ a pɑ guŋ mcwə awɛ pɑ pɑ́ bɑ́ pɑ́ nə tsʉ' yə pɑ́ ywə ghə wɔk pɑ nə́ a?

³¹Mfɑmfɑ́ a bɑ́ guŋ mtyɛ'dzʉ́ awɛ myə pɑ bɑ pɑ shwə̌ vʉ̌, a pɑ nyənyɔ gɑ́ pó bɑ yɑ ywə nə ŋa'tə nə Yeso Kristo Cyəpɔ yɔk pɑ̀.

³²Ŋ də pe' bɑ́ sɛnwə pɑ pa' monəŋ a, bɑ nə lo'shù nə mnɔm yə ŋ dɑ́ lo' Efeso a lě ŋkwitə a nə kɑ́? A pɑ́ gɑ mpfə́ pɔ tə jám nə vʉ̌ a, pɑ tsʉ biŋ nwə́ nə pa' pɑ gɔ ti yó pfʉ́.

³³Ka mo fʉtə wɔ: Mso cwəpuŋ bɔptə mà pɑpuŋ.

³⁴Po tak nə pam mlu' nəŋ ŋkwicʉ̌m, nthak nə hɔnwə nəŋ! Nə pa' shɑ́ pɔ cəcɑ̌ po la' wap pɑ biŋ nə zhyə́ Si; gɑ̌ gɔm po'o a pɑ kuso nə po.

³⁵Tə pu gɔ ghɔm gɑ mpfə pɔ jám nə vʉ̌ m gɑ kɑ a? Wap dɑ ya nɑ́ nə jám a?

³⁶Ŋkhəŋkhʉɔ! Ywə yə o dzə̀ si a nə sa' bɑ a pfʉ́.

³⁷Ywə yə o dzə̀ si a, a tə bɑ shʉɔ ywə yə a gɔ sa'a pɑ́, a bɑ́ tɔm gəfɑ kɑ tɔm kɑ́ ywə lə, bɑ kwɔkkwɔk e.

³⁸Si piŋ hɑ nɑ́ bi é pa' e nə jɔ a, hɑ bǎ yə ya gwya ywə lə́ nə yə nthi.

³⁹Sɔm bap nɑ́ tə bɑ pa' yə́ mu' a pɑ́. Bǎ ya lə́ bɑ pɑ́ yə nthi. Bap nɑ mo bɑ yə nthi, yə nɔ̀m pɑ yə nthi, yə səŋ pɑ yə nthi, yə bapgu pɑ yə nthi.

⁴⁰Mnɑ́ kɛbəŋ bɑwə, mnɑ dəmcǎ' a pɑwə, da' gɑ la' wap pɑ́ dəŋnyə́ dəŋ.

⁴¹Yə nə́ ləŋnyə nam bɑ do é, yə mɑŋwə́ pɑ do e, yə nə ləŋnyə sɛ pɑ do e, msɛ piŋ bɑ dəŋnyə nthinthi.

⁴²A bɑ pɑ po'o nə́ nə yam nə vʉ̌: Pu nə nyə̌ŋ nɑ si a pɑ ywə bipi, biŋ nə yǎm nə vʉ̌ bɑ ywə tə pì;

⁴³Nə nyəŋ e si a pɑ ywə gwakwǎk, da' gɑ nə yǎm nə vʉ̌ bɑ ywə gu'tə ghǔ'tə; nə nyəŋ si a pɑ ywə bwa pwǎ, da' gɑ́ nə yam nə vʉ̌ bɑ ywə gʉ̌' pɑ́ nə́;

⁴⁴nə nyəŋ si a pɑ nɑ́ bap a piŋ nə yam nə vʉ̌ bɑ nɑ́ zhwenyə. Nə pa' a pɑ́ gɑ nɑ́ bap bɑwə bɑ ba nɑ́ zhwenyə bɑwə.

⁴⁵A po'o tə́ a bɑ pú və̀ gɑ́: Dəŋdzə̀ mo, Adam lə bɑ mo bap nɑ, vɔk pɑ́ nə e, jʉɔjʉ̀m Adam pɑ mo zhwenyə yə a hɑ vɔk a.

⁴⁶Da' gɑ a dəŋdzə bɑ mo bap, a tə́ bɑ́ mo zhwényə pɑ̀; e nthəm pɑ m jʉ̀m.

⁴⁷Dəŋdzə mo yə e lə tə̌m nə cǎ' a bɑ mo dəmcǎ'. Batə̀ mǒ, fɑ m̀ kɛbə̀ŋ.

⁴⁸Pa' mo dəmcǎ' lə nə bɑ á, a dəŋdəŋ pa' pɑ dəmcǎ' nə bɑ a, a piŋ bɑ po'o, dəŋdəŋ pa' mo yə e fɑ m kɛbəŋ gɔ sɔ' nə pɑ́ a.

⁴⁹Pɑ dəŋdəŋ pa' pɑ lə hwənyə mo dəmcǎ' a, pɑ gɔ piŋ sɔ' hwənyə mo kɛbəŋ.

⁵⁰Mfɑmfɑ́ ywə yə gɑ̌ biŋ bi po a yəŋ gɑ: Bap nɑ ba mcyə tə gɔ sɔ' pɑ́ nə́ Nəfo Si pɑ́, a ywə yə a bɑ ywə bipi á lə pɑ ywə tə pì.

⁵¹Gɑ̌ gɔ ghə po zhyə mu' ta' nwə cyə zhyənwə mo. Pɑ tə́ gɔ sɔ' pfʉ́tə awɛ pɑ́, da' gɑ pɑ gɔ sɔ' sɑnyə guŋ yɔk pɑ awɛ,

⁵²pɑ kwa' ŋkwi cʉ̌m, nə ta' nyə́, nə gi lwɔ̌p. Nə pa' pú gɔ sɔ' túŋ lwɔ́p, mpfə pɔ yám tə pɑ ywə bipi, a piŋ sɔ' m nə pɑ̌, pɑ sɑnyə.

⁵³A shə́ŋ gɑ́ mo bipi kwa nɑ tə pi pa' dzə́ a, a mo npfʉpfʉ̌ kwa nɑ tə́ npfʉ.

⁵⁴Cwə yə mo bipi yə̌ŋ gɔ sɔ' kwa nɑ tə pi a, a ba mo pfʉpfʉ̌ cʉ' mo tə pfʉ́ a, a ghɔm bvə́və́ pəmtə́ gɑ: Vʉ̌ bɑ e lě nuŋtə nthʉm nə cyəshù.

⁵⁵Vʉ yu nə cyə́shu hɑ? Vʉ shyə́ syap tsʉ̌ hɑ?

⁵⁶Shyə syap vʉ́ bɑ mhɔ, gʉ' mhɔ, a pɑ mco'.

⁵⁷Pɑ gho'tə Si yə e hɑ nə cyə́shu bi pɑ shyə m nə Cyəpɔ yɔk pɑ Yeso Kristo a.

⁵⁸Mfɑmfɑ́ ŋkhuŋnyə, a pɑ́ po'o po tɔm, ka po səŋ; po kaktʉɔ nə fa' Cyəpɔ bɑ gɔ pɑ dzə, bɑ jyə́ gɑ yɔ nə yɔgo' tə gɔ sɔ' cyə́ néné nə Cyəpɔ pɑ.