Read Ghomala New Testament 1 KORINTO 2 Bible Online

1 KORINTO 2 - Ghomala New Testament bible

1 KORINTO 2

¹Mfɑmfɑ́, kwa' myə, cwə yə ŋ khɑ sɔ' wə po a, ŋ də lɑ́ pɑ gʉ' mghɔm kɑ fʉ̌ lə tə nə siŋ wɔ nwə cyə zhyənwə Si bi po.

²Nə pa' a bɑ gɑ̌ nyəŋ gɑ tə da' Yeso, pɑ́ da' yʉ a, ŋ tə́ gɔ piŋ zhyə sɔmywə wə́ po pɑ.

³A ywə yə a lə gə tə bɑ dzə̌ po pɑ́ bwapwǎ, bɑwə bwɔk biŋ bɑwə səŋ a;

⁴ǎ po' tə́ sɔm mghɔm nə nthənyə kɑ mghɔm fʉ́ lə la tə́ pɑ́ nə ghɔm tsɑ̌ pu a siŋ a; a lə bɑ́ pɑ́ nə la'tə wɔ nwə shyə m nə mtʉɔ̀ Zhwenyə,

⁵po'o gɑ piŋnthʉm yɔ kɑ fɑ m nə fʉ̌ monəŋ pɑ, a piŋnthʉm yɔ fɑ m nə mtʉɔ Si.

⁶Ba tə po'o pyə̌ ji'tə pɑ kwa' fʉ̌ bi pɔ Kristo pyə wap bɑ wap ghəmtə a, fʉ̌ yə a tə́ bɑ yə́ yəŋ dzʉ̌ a pɑ́, kɑ yə́ mfo nə dzʉ̌, mfo pyə pu gɔ sɔ' sa'tə wap lə.

⁷Pyə ji'tə fʉ́ yə a bɑ́ yə́ Si a, nwə cyə zhyənwə, yə a lə bɑ ǎ tʉmnyə, bɑ Si lə la' ŋkha' tə tyɛ̌' gɑ a gɔ sɔ' pɑ ghu'tə bi pɑ a.

⁸Sɔm fo yəŋ dzʉ̌ la tə́ zhyə́ yá, nə pa' wap lə pe' jyə bɑ wap lě tə́ kam Cyəpɔ ghu'tə thə bɛnyəpɛnyə.

⁹Da' gɑ a bɑ pu lě bvə gɑ: A bɑ́ ywə yə bɛtsə́ ka yɔ a, ywə yə mtə̌ŋ ka yu' a, ywə yə a ka kwɔ' nthʉm tʉ̀m sɔmmo a, guŋ ywə awɛ yə Si lə nyaptə bi pɔ pyə wap ŋkhuŋ e a.

¹⁰Tə́ Si bɑ e ghə pɑ zhyə nwə bɔ shyə m nə́ Zhwenyə. Nə pa' Zhwenyə jyə guŋ ywə awɛ ba yə a bɑ m nə si a.

¹¹Wɑ̌ cəcɑ̌ pɔmnəŋ bɑ e zhyə ywə yə́ a bɑ nthʉm mo a, tə ně da' zhwenyə mo yə a bɑ nə́ e a? A bɑ dəŋdəŋ po'o tə́ ywə yə a bɑ nə Si a, sɔmmo ka zhyə ya tə ně da' Zhwenyə Si.

¹²Sɔ' m nə pɑ, pɑ tə́ bɑ pɑ̌ kwi zhwenyə dzʉ́ pɑ́, pɑ̌ bɑ pɑ kwi Zhwenyə yə a fɑ m bi Si a, po'o gɑ pɑ zhyə gho' yə Si hɑ bi pɑ a.

¹³Pɑ tə biŋ gɔm m nə ghɔm tsyə́ fʉ̌ dzʉ́ ji'tə a pɑ, pɑ gɔm m nə tsyə́ Zhwenyə, bɑ gɔm nwə Zhwenyə m nə́ zhwenyə.

¹⁴Mo yə é bɑ yə́ pɑ nə mà monəŋthə́ a tə́ biŋ ywə yə a fɑ m bi Zhwenyə Si a pɑ. A shwə bi e m pa' pʉə a, bi a pɑ́ e lə yu', nə pa' pu dɑ pɑ zhwenyə tə nə sɛnwə.

¹⁵Mo yə e bɑ mo zhwenyə a fyɛ' guŋ ywə awɛ da' gɑ́ la' sɔmmo pɑ fyɛ' e.

¹⁶Nə pa' wɑ̌ bɑ ě zhyə mkwɛnyə Cyəpɔ tə bi a pɑ e hɑ nthɔ̌k bi e? Tə a bɑ pɑ̌ nəŋ gə mkwɛnyə Kristo.