Read Ghomala New Testament 1 KORINTO 3 Bible Online

1 KORINTO 3 - Ghomala New Testament bible

1 KORINTO 3

¹Mfɑmfɑ́ a sɔ' m nə m̀ bɑ ŋ kha ghɔmnwə bi po m pa' bi pɔ zhwenyə a pɑ́, gɑ̌ ghɔm m pa' bi pɔ bap nɑ́ a, pa' bi pǒ mkəcɔk pó nə Kristo a.

²Gɑ̌ bɑ gɑ hɑ pɑ bʉ̌ɔ bi po gɑ po nwə́, a tə́ bɑ ywətsʉ nthʉɔtʉɔ pɑ́: Nə pa' bɑ po la tə gɔ tsʉ́ zhyə pɑ́; ba m tyɛ' ɔ pɑ po lə tsʉ́ jyə́

³nə pa' po jɑ̀ pɑ́ pɔ bapnɑ: Nə pa' nə khiŋnyə ba nə sa' mshɛ bɑ cəcɑ̌ po. Po tə́ bɑ pɑ pɔ bapnɑ biŋ bɑ giŋ pɑ pa' monəŋthə a pɑ a?

⁴Cwə yə́ mu' mo gɔm gɑ: Gɑ̌ bɑ mo Polo, yə mu' mo ghɔm yə gɑ: Gɑ̌ bɑ pɑ yə mo Apolos a, po lə pɑwə gə yɔ pɑ́ pa' pɔmnəŋ a pɑ a?

⁵Apolos bɑ wɑ? Polo pɑ wɑ́? Wap bɑ mghɛ fa' pyə po lə́ cyə m nə́ pu tə gə piŋnthʉm a. Bǎ ya mo nə pu lə́ lə fǎ' nə yə́ dəŋ yə Cyəpɔ lə́ hɑ̌ bi a.

⁶Myə ŋ dě nthʉ́, Apolos fi'tə shyə nə́, da' gɑ Si nə́ gə a kwyə.

⁷Nə pa' mo yə e nthʉ a tə bɑ ywə pɑ́, mo yə e fi' a lə pɑ ywə. Da' Si yə e gə a kwyə́ a nə́ sɛ.

⁸Mo yə e nthʉ́ a pu mo yə e fi' a bɑ pɑ ta' ywə. Bǎ ya mo lə́ nə pu pɑ gɔ sɔ' kwi myə mcwo'fa' nə də́ŋ fa' tsyə́.

⁹Nə pa' guŋ yɔk awɛ nthamtə fá' pɑ nə fà' Si, po piŋ bɑ pé yə Si dzʉ' a, pa' yə e ŋkwɑ a.

¹⁰Shyə m nə́ dəŋ gho' yə Si hɑ bəm a, dəŋdəŋ pa' gɛ və pɑpuŋ a, gɑ̌ yap to pà', mu' mo kwɑ́ pa' dəm o. Da' gɑ́ bǎ ya mo lə́ cəŋtə́ sɛ pá' e nə ŋkwɑ́ a.

¹¹Sɔ' m nə to pá', bi a pɑ sɔmmo lə piŋ jap mǔ' tə ně yə ǎ dzə́ pɑ a: Yeso Kristo.

¹²Mo lɑ pɑ́ tʉ̌ɔ gɔl kə tʉɔ ŋkhap kə mwɔ' tʉɔdəŋ, kə ŋkwyə́, kə mghě, kə pǐŋ lə́ tə́ nə ŋkwɑ́ dəm to pa' bɔ

¹³bɑ pu gɔ sɔ' cʉ'nyə bǎ tsyə fa' wɑlɑ́. Tyɛ' fyɛ' gɔ sɔ' ghə pu zhyə, nə pa' tyɛ'dzʉ́ bɔ gɔ sɔ' cyə m nə mɔ̌k, mɔk la'tə tiŋ fa' bǎ yá mo lə̀.

¹⁴Mo yə fà' tsyə́ tə gɔ sɔ' sim a pɑ́ gɔ sɔ' kwi mcwɔ'fà'.

¹⁵Mo yə fà' tsyə́ khə a tə́ gɔ sɔ' kwi sɔmywə pɑ́; kwa' yʉ́ gɔ sɔ' vɔk, tə́ vɔk m pá' mo bvɔk mɔk a.

¹⁶Po tə́ jyə gɑ po bɑ dyə́ Si, Zhwenyə Si piŋ bɑ shwə́ nə́ po a?

¹⁷Mo yə ě sa'tə dyə́ Si a bɑ Si gɔ sɔ' sa'tə e. Nə pa' dyə Si bɑ dɔlɔ̌, wɔ nə piŋ bɑ bɔ.

¹⁸Ka sɔmmo fʉ́tə nɑ e: Mo pɑ cəcɑ̌ po bɑwə ŋkwɛ gɑ e ghə fʉ m nə nthi fʉ̌ dzʉ́, e cʉ' bʉəpǒ tə gə fʉ́;

¹⁹nə pa' fʉ̌ yəŋ dzʉ̌ bɑ pʉə dzə̌ Si. Nə pa' a bɑ pu və gɑ: E dɑ pɑ́ fʉ̌ mghɛ fʉ́ tə gəm wap,

²⁰ba m gɑ: Cyəpɔ bɑ ě zhyə mkwɛnyə mghɛ fʉ́, jyə gɑ a bɑ pɔpɔ.

²¹A po'o tə sɔmmo nə po kɑ lɑ monəŋ ŋa'tə nə pa' guŋ e awɛ bɑ bi po:

²²Polo, Apolos, Kefas, dzʉ̌, vɔk kɑ vʉ̌ lə, cwəlɔ kɑ yǒ lə, guŋ e awɛ bɑ bi po,

²³da' gɑ po pɑ bi Kristo, Kristo pɑ bi Si.