Read Ghomala New Testament 1 KORINTO 6 Bible Online

1 KORINTO 6 - Ghomala New Testament bible

1 KORINTO 6

¹Cwə yə shɛ bɑ cəcɑ̌ po a, nwə kɑ po piŋ gɑ pɔ pyə wap tə bɑ nyənyɔ nə fyɛ' nə cwə yə pɔ dɔlɔ̌ nə́ bɑ gɔ fyɛ' a?

²Po ka zhyə gɑ pɔ dɔlɔ̌ nə́ gɔ sɔ' fyɛ' dzʉ a? Bi a pɑ gɑ wɔ nə gɔ sɔ' fyɛ' dzʉ́, bɑ a gə m gɑ́ kɑ tə po lə ku' nə fyɛ' muywə nwə cəcɑ̌ pǒ?

³Po ka zhyə gɑ pɑ gɔ sɔ' fyɛ' pɑ aŋgəle a? Tə́ mcʉ̌m sʉ'ʉ nə nwə yə̀ŋ vɔk?

⁴Po gə mu' nwə po'o jap pɔ pyə Cu'tə pɔ Kristo gwak wap a gɑ́ wap sa' lə?

⁵Sǒ pɑ ŋkhu wɔ! Jyə gɑ sɔmmo tə́ bɑ cəcɑ̌ po bɑ e ghə dəŋ fʉ́ yə bi a pɑ́ e nə fyɛ' nwə cəcɑ̌ mfɑmfɑ́ a lə?

⁶Tə mfɑmfɑ pɑ sa' mshɛ cəcɑ́ pú dzə̌ pɑ tə ghə piŋnthʉm!

⁷Kwa' nə ghə shɛ cəcɑ̌ po bɑ ǎ tsə pɔk. Po tə́ biŋ yɔ nwə yə a ka tiŋnyə́ bi po a shwə ne a? Po tə́ biŋ yɔ gɑ́ pu lɑ ywə yɔ ne shwə a?

⁸Pɑ́ wɔ nə gə nwə yə a ka tiŋnyə a, bɑ dɑ́ tsə pyə shɑ pɔ, wap piŋ bɑ mfɑ pɔ́!

⁹Po ka zhyə gɑ pɔ pyə wap tə gə nwə dəŋdəŋ a pɑ́ tə gɔ sɔ' ko nə́ Nəfo Si a? Ka mo fʉtə wɔ! Kɑ mgəgə́m, kɑ pɑ ghamtə mkətwɔk, kɑ pɑ ghə ghap, kɑ nthinthi pɔ bwapwǎ lə,

¹⁰kɑ mcǔŋ, kɑ msamshwə, kɑ mpǎm mlu', kɑ pɑ tɛmnɛ, kɑ pɑ lɑ ywə tə yap lə tə́ gɔ sɔ' ko nə Nəfo Si pɑ́.

¹¹Tsə bɔ nə nəŋ bɑ ywə yə po lə́ bɑ́ yá, kɑ shɑ́ pɔ cəcɑ̌ pó lə. Tə́ a bɑ pu lě sɔk wɔ, a bɑ pu lě shu' wɔ, a bɑ pu lě jap wɔ dəŋdəŋ shyə m nə́ tsǒ Cyəpɔ Yeso Kristo ba m nə́ Zhwenyə Si yɔk pɑ.

¹²Pɑ́ ŋ gə guŋ ywə awɛ, tə guŋ ywə awɛ tə gəm nə́ myə pɑ. Pɑ ŋ gə guŋ ywə awɛ tə pɑ ŋ də piŋ nə pɑ ŋkwɔ́ sɔmywə.

¹³Tsətsʉ bɑ tsyə vàm, vam pɑ́ nə tsətsʉ, Si piŋ bɑ gɔ sa'tə tsətsʉ pu a vàm. Tə́ nɑ́ mo tə bɑ m nə ghəm pɑ, a bɑ m nə́ Cyəpɔ, Cyəpɔ pɑ yə nɑ́ mo

¹⁴a nəŋ bɑ po'o, Si yə e lə yám Cyəpɔ nə vʉ̌ a pɑ gɔ sɔ' lɑ tʉɔ e nə yám wɔk pɑ.

¹⁵Po ka zhyə gɑ́ nɑ́ tsɔ bɑ́ bú Kristo a? Tə́ gɑ̌ gɔ lɑ bú Kristo nə ghə bú gəgəm a? Gɛ̌!

¹⁶Po ka zhyə gɑ́ mo yə e nthamtə pu gəgəm a bɑ pu e cʉ' ta' nɑ́ a? Nə pa' a bɑ pu lě bvə gɑ: Wap pɑpʉə gɔ cʉ' pɑ da' ta' nɑ.

¹⁷Tɑ mo yə e nthamtə pu Cyəpɔ a bɑ pu e cu' ta' zhwenyə.

¹⁸Po khʉ́ nwə ghap. Myə shɑ mhɔ mo bɑ m jʉmdzʉ̌ nə nɑ́ e. Tə gə ghap hɔnwə pɑ kwa' nə́ nɑ e.

¹⁹Kɑ a bɑ po ka zhyə gɑ́ nɑ tsɔ bɑ dyə Zhwenyə Dɔlɔ̌ yə a bɑ nə po a, bɑ fɑ m bi Si, nɑ tsɔ lə yɑ tsɔ a?

²⁰Mo bɑ e lě nuŋ dəŋ ŋkhap nə jo wɔ. Po lɑ nɑ́ tsɔ gu'tə Si.