Read Ghomala New Testament 1 KORINTO 8 Bible Online

1 KORINTO 8 - Ghomala New Testament bible

1 KORINTO 8

¹Sɔ' m nə bap yə pu nə nuŋpwɔ' bi mkətwɔk á, a nyənyɔ gɑ a bɑ guŋ yɔk pɑ̀ awɛ ghə zhyənwə. Da' gɑ Zhyə̌nwə nyəŋ ŋa'nɑ nə mo, tə́ ŋkhuŋnyə ŋkwyə piŋnthʉm mo.

²Mo pɑwə sɛ gɑ́ e zhyə ywə́ bɑ́ e bɑ̀ e ka wuŋ shəŋtə́ jyə́.

³Tə́ mo kùŋ Si, bɑ Si bɑ ě zhyə́ e.

⁴A po'o bi a pɑ mo pfɑ bap yə pu nə núŋ pwɔ' bi mkətwɔk a? Pɑ̌ zhyə́ gɑ́ sɔm kətwɔk tə́ bɑ nthʉm dzʉ́ pɑ́, ba mu' si lə piŋ bɑwə tə́ né da' Si do é.

⁵Nə pa' ba pá' pu sɛ́ gɑ́ shɑ́ msi bɑ́ kɛbəŋ ba m dəmca' a, ba pa' nthinthi msi ba nthinthi mcyəpɔ bɑwə a,

⁶pɑ bɑ pɑ̌ zhyə da' ta' Si, Tá yə guŋ ywə awɛ fɑ́ pɑ bi e, guŋ yɔk pɑ awɛ piŋ bɑ gɔ pɑ́ m bi e a, ba ta' Cyəpɔ Yeso Kristo yə guŋ ywə awɛ bɑ pɑ́ nə e, pɑ piŋ bɑ bi e a.

⁷Tə́ guŋ pɔ awɛ bɑ wap ka ghə zhyənwə. Shɑ́ pɔ pyə wap kɑ́ guŋ jɑwə́ gɔ pɑ dyə mkətwɔk, pfɑ̀ bap mkətwɔk bɑ pa' cwə yə́ pu hɑ po'o kwa' bi mkətwɔk a, a viŋ piŋnthʉm yap yə a bɑ pwatə́ piŋnthʉm a.

⁸Tə́ sɔm ywətsʉ nə gɔ sɔ' fʉ'tə wɔk pɑ̀ nə ghɔ bə́ŋ Si pɑ́: Nə pa' pɑ pɑ́ tə́ pfɑ́ bɑ pɑ tə gɔ sonyə pɑ, nəŋ biŋ pfɑ́ bɑ pɑ tə́ gɔ pɑ́ dzə pɑ.

⁹Da' gɑ́ po pɔmtə gɑ́ yɔ nə cyətə pɑ ŋkwɔ kɑ pɑ ywə fa'tə bi pɔ bwapwǎ.

¹⁰Nə pa' pu la jɔ o, wə yə a bɑ ǒ zhyənwə a, bɑ o cwə dyə mkətwɔk bɑwə dzʉywə, bɑ nwə bɔ yə a puŋ bu a tə́ gɔ ghə gɑ́ mo bwapwǎ pfɑ bap pwɔ' mkətwɔk a lə?

¹¹A piŋ shyə m nə yu zhyə̌nwə mo bwapwǎ yəŋ yə Kristo lə́ pfʉ̌ nə́ e a e pfʉ́?

¹²O hɔnwə po'o nə mfɑ pǔ, bo' fiŋ nə piŋnthʉm yap yə bwapwǎ, bɑ o hɔnwə po'o pɑ bi Kristo.

¹³A po'o tə a bi a ywətsʉ pɑ gɔ fa'tə fɑ a bɑ gɑ gɔ kəŋnyə nə pfɑ́ bap shyə́ nə fa'tə fɑ a bɔ e vʉsi.