Read Ghomala New Testament 1 KORINTO 9 Bible Online

1 KORINTO 9 - Ghomala New Testament bible

1 KORINTO 9

¹Gɑ̌ bɑ ŋkwɔ a? Ŋ tə bɑ gɛ nthə̌m a? Ŋ tə bɑ ŋ dě jɔ Yeso Cyəpɔ yɔk pɑ a? Po tə́ bɑ mfa' mə̌ nə Cyəpɔ a?

²A pɑ́ bi shɑ́ pɔ ŋ də pɑ gɛ nthə̌m, bɑ gɑ̌ bɑ gɛ nthə̌m bǎ bi po; nə pa' po bɑ́ mtiŋ tsɑ fa' jʉ̌m Cyəpɔ.

³Po yɔ yɑ nə́ tɛ dzə̀ mghɛ bo pɑ̌ yəŋ gɑ:

⁴A bɑ mco' bi pyə nə tsʉ̀ ywə́ kɑ nə nwə́ lə a?

⁵A bɑ mco' bi pyə nə́ nə ghiŋ dɑ mjwǐ yə e mo Kristo a pyə a pu ghɔ pa' pyə́ shɑ mghɛ nthəm a, pa' mfɑ̌ Cyəpɔ ba Kefas a?

⁶A bɑ mco' gɑ́ bi a pɑ pu lə té wɔk pyə Barnabas nə fa' a?

⁷Wɑ̌ fa' fá' səŋwi tə guŋ bɑ́ ŋkhim e? Wɑ̌ dzʉ' mthə nə nú' mlù' tə pɑ̌ dzʉ́ nthɔm myə? Kɑ wɑ̌ byap mnɔm tə pɑ nwə́ bʉɔ map?

⁸Yəŋ bɑ́ da' nwə̀ monəŋthə́, ba mco' tə́ gɔm po'o a?

⁹Nə pa' a bɑ pu və nthʉm mco' Mosɛ gɑ: Kɑ́ kwɑ́ shwə nɔm na' yə po e bɑwə dɑ tsə́ pe a. Si shɔm pɑ́ mna' a?

¹⁰E la tə́ gɔm po'o m nə́ pɑ á lə́? Əŋ, pu lə́ bvə po'o m nə́ pɑ; nə pa' a buŋ gɑ dzʉ'né nə tsʉ̌' bɑ mɔktə, dɑ tsə́ nyəŋ dyə nə lɑ bɑ mɔktə gɑ́ pu gɔ hɑ yə́ ywə nə́.

¹¹A pɑ́ gɑ pyə tsə́ ywə pɑpuŋ zhwenyə nə po, bɑ pyə la ŋkhap nthɔm mfa' bú mɔ bɑ pyə ghənwə tə́' a?

¹²A bi a pɑ́ gɑ pyə shɑ pɔ ŋkhap nthɔm bɔ nə po, bɑ mcʉ̌m sʉ'ʉ nə pyə̌? Da' gɑ pyə kɑ kwi ywə yə a bɑ yɔk a. Pyə nthɔm nɑ́ tsɔk nə guŋ ywə awɛ po'o gɑ pyə kɑ́ nyəŋ sɔm kəlo' nə Cuŋ pɑpuŋ Kristo.

¹³Po ka zhyə́ gɑ́ pɔ pyə wap fa' Dyə Si a, Dyə Si nə ŋkhim wap a? Ba gɑ pɔ pyə wap fa' nə tsʉ' nə to tsə pwɔ' a yap ywə ba nə ywə yə́ pu hɑ nə tsə pwɔ' a?

¹⁴A bɑ́ pɑ́ po'o tə a bɑ Cyəpɔ yap gɑ pɑ siŋ Cuŋ pɑpúŋ gɔ pɑ vɔk pɑ́ nə Cuŋ pɑpúŋ.

¹⁵Tə sɔ' m nə́ myə, ŋ kha həŋtə sɔmywə nə ywə yə a bɑ yɑ̌ a, ŋ də nəŋ bɑwə bvə po'o nə həŋtə yá pɑ́. Tə cʉ' po'o ŋ pfʉ́. Pɑ sɔmmo lə kwi yə bɔ bəm.

¹⁶Nə pa' nə siŋ Cùŋ pɑpuŋ tə bɑ nwə ŋa'nɑ́ bəm pɑ, a bɑ pɑ kwa' ywə yə a cəŋ gɑ a pɑ́ a; ghəghʉɔ a nə cwə yə ŋ khá siŋ Cuŋ pɑpuŋ a.

¹⁷Myə nə lə́ pé'e tə bɑ ŋkhuŋ nə siŋ, bɑ gɑ̌ byap mcwɔ'fa'; tə́ a pɑ gɑ Si nə hya a hya bɑ a bɑ ŋkhəm bɑ pu hɑ bəm.

¹⁸Tə mə̌ mcwɔ'fa' bɑ gɑ kɑ? A bɑ nə hɑ Cuŋ pɑpuŋ yə gɑ̌ siŋ a tə kwi sɔmywə, tə́ ba yə a bɑ pu yap gɑ ŋ kwi a.

¹⁹Əŋ ŋ dě tə pɑ ŋkwɔ bi sɔmmo, da' gɑ́ ŋ dě ji ŋkwɔ guŋ pɔ awɛ tə́ nə́ fəŋtə bo'gwyə pɔ.

²⁰Ŋ dě bɑ cəcɑ̌ pɑ Yudea bɑ yə Yudea tə́ nə fəŋtə pɑ Yudea; bɑ cəcɑ̌ pɑ zhyə̀ mco' pa' jyə̀ mco' a, ba tə pa' a ŋ tə jyə̀ mco' a pɑ, tə́ nə fəŋtə pɑ zhyə̀ mco'.

²¹Bɑ cəcɑ̌ pɑ tə ghə mco' pa' tə ghə mco' a ba tə pa' ŋ tə bɑ tə ghə mco' Si a pɑ́, nə pa' Kristo bɑ́ mə̌ mco' tə́ nə fəŋtə́ pɑ tə ghə mco'.

²²Ŋ də́ bɑ pwá mo pyə a mpwǎ pɔ tə nə́ fəŋtə mpwá pɔ. Ŋ dé bɑ̀ guŋ ywə awɛ nə pyə a guŋ pɔ awɛ tə́ nə bvɔk shɑ́ pɔ̀.

²³Bɑ gə guŋ e awɛ po'o nə Cuŋ pɑpuŋ po'o gɑ ŋ gə yɑ tsʉ' nə́.

²⁴Po ka zhyə́ gɑ pɑ khʉ́dʉ̌ bɑ sim dʉ́ ŋkhʉ́dʉ́ guŋ yap awɛ tə́ da' ta' mo nə təm dəŋdzə́ a? Po khʉ́dʉ̌ m pa' po gɔ cyə́ dzə a.

²⁵Guŋ pɑ khʉ́dʉ́ awɛ nthya dzʉ kwa' pɑpuŋ. Wap gə po'o nə co'fò yə́ a mi a. Pɑ pɑ gə yɔk pɑ nə co'fò mama.

²⁶Kwa' myə gɑ̌ ŋkhʉdʉ po'o: La' gɔ m pa' fʉ̀ a pɑ́; biŋ bɑ do'mkəŋ, dɑ nɔk pɑ́ tɑ́ jyə pɑ̀.

²⁷Tə gɑ̌ shəŋtə ŋkhyəp nɑ́ a, jap e nə ŋkhɛ̀ po'o bwɔk gɑ́ ŋ khɑ tǔŋ lwɔp nə siŋ nwə pu ti nthé a nə́.