Read Ghomala New Testament 2 KORINTO 10 Bible Online

2 KORINTO 10 - Ghomala New Testament bible

2 KORINTO 10

¹Kwa' myə̀ Polo gɑ wə dɑ byanyə́ ba tʉm pɑpuŋ nə Kristo nə həŋtə wɔ, myə̀ yə gɑ fi' nɑ́ a hɑ si cwə yə gɑ̌ cəcɑ̌ po a tə bɑ́ gɛ ŋʉ'tə nə yɔ nwə cwə yə gɑ̌ bɑ gʉə sʉəsʉə a;

²Gɑ̌ səso wɔ, a ka puŋ gɑ́ cwə yə gɑ̌ pɑ́ cəcɑ̌ po a dɑ ŋʉ'tə bɔ ŋkho nə pɔ pyə wap jɔ yap gɑ pɑ nwə monəŋthə́ nə shya wɔk pɑ a.

³Ba pa' pyə bɑ pɑ pɔmnəŋthə́ a, pyə tə do'shù m pa' monəŋthə́ a pɑ́.

⁴Gɛ̌, tsə shù tsɔk tə fɑ m bi monəŋthə́ pɑ, gʉ' tsə shù tsɔk fɑ m bi Si nə nə́ sa'tə pɔ pyə wap sɛ gɑ a bɑ wap ku' a. Pyə sa'tə msɛnwə ŋa'nɑ́,

⁵ba guŋ tʉɔ ŋa'nɑ́ yə a ŋkhɔ nə zhyə Si a. Pyə gəm guŋ kwɛnyə awɛ, gə gɑ a yu'nyə Kristo,

⁶biŋ nə cwə̌ bɑ byap nə nyəŋ shɛ thə guŋ nə cyətə yu'nyə nə cwə yə po gɔ la'tə gɑ po yu'nyə kwa' pɑpuŋ a.

⁷Po le nwə pɑ kwa' dəŋdəŋ. Mo yə e sɛ́ gɑ́ e bɑ m̀ bi Kristo a, e zhyə po'o ŋkwi cʉ̌m gɑ e pɑ bi Kristo bɑ ba wɔk yɔk bɑ bi Kristo.

⁸A pɑ́ gɑ gɑ̌ wə ŋa' nɑ a nə tʉɔ yə́ Cyəpɔ hɑ bi pyə nə nə ŋkwyətə wɔ, tə́ la' a pɑ nə nə gə cwəpuŋ nə po, bɑ sǒ tə wə ŋkhú a pɑ́.

⁹Ŋ tə bɑwə shəŋ m nə́ lɑ mŋwa'nyə mə̌ hɛ́ wɔ pɑ̀.

¹⁰Nə pa' pu gɔm gɑ́ mŋwa'nyə bɔ tsɑ́ biŋ nthʉɔ té', da' gɑ cwə yə ě si a, e pɑ mo bwapwǎ, ba ghɔm tsyə́ lə pɑ sɔmywə.

¹¹Tə mo bɔ cəŋtə jyə́ gɑ́ pyə pɑ gʉɔ sʉəsʉə bɑ pɑ́ gɑ kɑlə́ nə ghɔm tsɔk nə mŋwa'nyə, bɑ pyə gɔ sɔ' tə pɑ́ si pɑ́ pɑ po'o nə mfà' mɔk.

¹²Pyə tə́ bɑwə shəŋ nə fo' shɑ pɔ kɑ nə pɑ́ pa' wap a pɑ́, shɑ pɔ pyə wap da'tə nɑ́ tsap pɑ wap; bɑ jɔ nɑ tsap pa' fo guŋ ywə awɛ a, wap bɑ mpʉə pó!

¹³Sɔ' m nə pyə̌, pyə tə gɔ fyə́ tə twɔk dhə̀ pɑ̀; pyə gɔ fyə́ pɑ nə dəŋ fo' pa' Si hɑ bi pyə tə pyə sɔ' tə ŋkhəm bi po a.

¹⁴Nə pa' pyə tə́ gɔ twɔk yɔk dhə̀ pa' cwə yə a bɑ pyə ka sɔ' tə́ ŋkhəm wə po a pɑ́. A nyənyɔ gɑ wɔk nə dəŋdzə̀ dɑ Cuŋ pɑpuŋ Kristo nə sɔ' ywə po.

¹⁵Pyə tə bɑwə dɑ pɑ́ fa' mo dyɛ' fyə pɑ́. Pyə bɑwə mɔktə́ m gɑ́ pyə gɔ cyə m nə́ nə lɑ yɔ piŋnthʉm gɔ dzə̀ kwyə́ nə po, nə yɔk nthi fo', kwyə nə ghɔ m̀ dzə̀,

¹⁶po'o nə lɑ Cuŋ pɑpuŋ gɔ tə ntwɔk yɔ dhə̀; tə́ tə lɑ mfa' mo dyɛ' ŋa' nɑ yɔk.

¹⁷Mo yə e gɔ ŋa'tə nɑ e a lɑ Cyəpɔ ŋa'tə́

¹⁸mo yə e da'tə nɑ e pɑ yʉ a tə bɑ e ghə ywə tə bi a pɑ mo yɔ pɑ́; mo yə Cyəpɔ da'tə e a nə bɑ mo yə e ghə ywə a.