Read Ghomala New Testament 2 KORINTO 11 Bible Online

2 KORINTO 11 - Ghomala New Testament bible

2 KORINTO 11

¹A la' pe' bi a pɑ po na' biŋ pʉə a! Po piŋ a po'o!

²Gɑ̌ wə go' wɔ pa' Si a; ŋ də phə̌ wɔ bi mu' mbɛ pa' pu bhə́ go a, bɑ gɔ la'tə wɔ bi Kristo pa' go tə zhyə́ mbɛ a;

³tə́ gɑ̌ wə bwɔk gɑ dəŋdəŋ pa' nɔ́k lə lɑ fʉ́ é fʉ́tə Eva a, pɑ́ mkwɛnyə mɔ lə pəmtə nə yə nə fi' nɑ hɑ́ si Kristo.

⁴Nə pa' mu' mo wuŋ sɔ' siŋ wɔ mu' Yeso yə dyɛ' tə e bɑ yə pyə lə siŋ e bi po a, kɑ po kwi pɑ mu' zhwenyə dyɛ', a lə pɑ yə po lə kwi a lə, kɑ mu' Cuŋ pɑpuŋ tə a bɑ yə po lə kwi a lə, pǒ guŋ nthɔm pɑpuŋ.

⁵Tə́ gɑ̌ yɔ gɑ mu' ywə yə pɑ ya'nyə mghɛ nthəm ba ghə bɑ ŋ kha ghə a tə̌ wə pɑ.

⁶A sɔ' m̀ nə nə́ yɛshwə, pyə lə pɑ́ ywə! Da' gɑ sɔ' m nə zhyə̌nwə, bɑ pyə̌ ghə zhyənwə. Pyə la'tə bi po nə guŋ ywə awɛ.

⁷A lə bɑ mhɔ bəm nə́ fi' nɑ́ a hɑ si tə́ nə ŋa' wɔ hɑ thə shyə m nə nə siŋ wɔ Cuŋ pɑpuŋ Si tə kwǐ ywə a?

⁸Ŋ dě ŋkwi ywə bi pyə shɑ́ mcu'tə, biŋ yɑ ywə nə bvɔk bi pú tə́ nə fa' bi po.

⁹A piŋ bɑ po'o bɑ cwə yə ŋ də pɑ wə po tə ywə bəm a da tə kwi ywə bi sɔmmo, nə pa' mfɑ̌ pyə wap lə fɑ Makedonya a, lə hɑ ywə yə a lə bɑwə jak a; a pɑ́ po'o la' ŋ biŋ nə tsɑ nə po nə sɔmywə, la' bɑ gɔ ti tə́ piŋ pɑ́.

¹⁰Shyə m nə nyənyɔ Kristo yə a nə m̀ a, gɑ̌ zhyə po'o: pɑ mo lə kwi yəŋ gɑ fyə bəm wə pɑ Akaya.

¹¹Nə nwə kɑ? Gɑ ŋ kha kuŋ wɔ lə? Si nə jyə́!

¹²Ywə yə gɑ̌ gə́ a, gɑ̌ gɔ kwi' ghə tə́ nə cɑ́ guŋ msɔ awɛ bi pɔ pyə wap shəŋ ywə yə wap gɔ nə ghɔm gɑ wap bɑ pa' wɔk a.

¹³Pɔ bɔ bɑ mghɛ nthəm mfʉm, pɑ fʉtə pɔ, bɑ wap kwa dzə́ mghɛ nthəm Kristo.

¹⁴A tə bɑ pɑ nwə sya sya pɑ́, ba Sata ŋkwa dzə̀ aŋgəle ŋkha'.

¹⁵A tə́ bɑ pɑ́ gha'nwə pɑ́ gɑ mghɛ fa' bɔ fʉ́tə́ gɑ wap bɑ mghɛ fa' nwə dəŋdəŋ pɑ́. Yap nə miŋ gɔ sɔ' pɑ́ pɑ́ pa' mfa' map a.

¹⁶Gɑ̌ wə ŋkwi' gɔm gɑ́ ka mo kwɛ gɑ́ gɑ̌ pʉə́, tak po'o po piŋ gɑ́ gɑ bʉə tə ba myə na' nə ŋa'tə yɑ̌.

¹⁷Ywə yə gɑ gɔ ghɔm a, ŋ tə́ gɔm m nə tsǒ Cyəpɔ pɑ, gɑ gɔm m pa' bʉəpǒ a, kwa' pa' gɑ shəŋtə nə jyə gɑ́ gɑ̌ ghə ywə yə bi a pɑ́ ŋ nə ŋa'tə a.

¹⁸Nə pa' Bo'gwyə́ pɔ dɑ pɑ yap tsʉ' cəcɑ̌ pɔmnəŋ nə ŋa'tə, ba myə yɑ̌ gɑ̌ gɔ ŋa'tə́.

¹⁹Wɔ pyə zhyə̌nwə yɔ shəŋtə bɑwə a, po biŋ nwə bi pɔ pyə thə́ yap tə̌ wə a pɑ́.

²⁰Po biŋ gɑ pu lɑ wɔ́ gə mkwɔ, gɑ pu syatə wɔ́ npfɑ́, gɑ pu lɑ tsə tsɔ́, pu yɔ pa' mku' a gɑ pu cwɔ wɔ́ nə sə yɔ.

²¹Gɑ̌ gɔm po'o a pɑ kǔso nə pɑ, pa' cwə yə pɑ bɔk pɔk a. Ywə yə pu gɔm a, gɑ gɔm po' pa' bʉəpo a, ba myə yɑ̌ pɑ́ gɔm.

²²Wap bɑ pɑ Ebraika lə̀? Ba myə yɑ̌; pɑ Israɛl lə̀? Bɑ myə yɑ̌, gwya Abraham lə? Ba myə yɑ̌.

²³Nə pɑ gɛ nthəm Kristo lə? Gɑ gɔm ghɔm pʉə: Gɑ̌ bɑ tə́ dzə̀ nə́! Nə fa' tə bwá lə́? Bɑ́ tə́ dzə̀ nə́, nə ko cɛ̌ lə? Bɑ pɑ tə́ dzə̀ nə́. Nə mgwa mshɔm lə? A yɔm nə m̀ té', nə pɑ shwə̌ vʉ̌ lə? Bɑ nə mcʉ̀mmcʉ̌m!

²⁴Pɑ Yudea lə cwɔ a mshɔm gwa shwɔpvʉ̌' mghǎmthá mcʉ́m nthɔ.

²⁵Pu lə pǐŋ ŋkwi' shwɔ a mcʉm nthá, dɑ mghwɔ' nthamtə á ta' cʉ̌m; ŋ də fashyə mcʉ̌m nthá, jwɔk biŋ di ta' tyɛ̌' tsʉ̀m.

²⁶Dɑ ghiŋ si mcʉm jɔmyɔ̌m, bi a pɑ mta' shyə gwyəgwyə ghə ywə cwəpuŋ nə m̀, kɑ msamshwə lə, kɑ mfɑ pɑ̌ gwya yɔk lə, kɑ pɑ tə pɑ́ pɑ Yudea lə, kɑ nthʉm tisuŋ lə, kɑ ghakgo lə, kɑ shyə lɑpʉə lə, kɑ mfɑ̌ fʉtə lə.

²⁷Kɑ pwa ba gǒ' lə, kɑ nə ti tə ti lə, kɑ jìkǔ' pu jì shyə lə, kɑ nə cwə tə tsʉ̌ ywə lə, kɑ fɔ̌k kɑ pə̌ŋ lə;

²⁸tə sɛ guŋ myə shɑ mnwə awɛ, bɑ lam tsɑ̌ sɔ guŋ cwə awɛ, biŋ bɑ jwiŋ pɑ nə nwə guŋ mcu'tə awɛ.

²⁹Wɑ̌ bwa, tə la' bwa yɑ̌? Wɑ̌ vʉ̀sǐ, tə lǎ' cəŋtə jɛ a?

³⁰Bɑ gɔ ŋa'tə́ bɑ gɑ dɑ pɑ pwa a nə ŋa'tə́.

³¹Si Tá Cyəpɔ Yeso yə byanyə bɑ nə e mama a zhyə gɑ̀ ŋ tə shwanwə pɑ.

³²Ŋ də pɑ̌ Damasi, gɔpna' fo Aratas ghə pu cɑ guŋ mthə́ tisuŋ awɛ nə ghəm a.

³³Da' gɑ pu nyəŋ a nthʉm sapgó, ntwɔk a nə fǎdyə́, fi' a nə bə̌ŋ pa' shya si tə nthəm nə bú myə́.