Read Ghomala New Testament 2 KORINTO 7 Bible Online

2 KORINTO 7 - Ghomala New Testament bible

2 KORINTO 7

¹Pa'a bɑ pɑ̌ ghə mɔ mka'nyə a, wɔ pyə gɑ̌ ŋkhuŋ wɔ pɑpuŋ a, pɑ lɔnyə nɑ tsɔk pɑ nə guŋ mviŋ awɛ nə bap nɑ́ ba m nə́ zhwenyə, pɑ miŋ nə lɔnyə nɑ́ tsɔk pɑ nthʉm nə pwɔk Si.

²Po ghə ta' tsʉ' bi pyə nthʉm mtʉm mɔ́; pyə kɑ hɔnwə bi sɔm mò; pyə ka tsʉ́ sɔm mò, pyə kɑ lɑ ywə sɔm mò.

³Ŋ tə gɔm po'o bɑ nə nyəŋ pɑ́ shɛ thə po pɑ́ nə pa' a bɑ ŋdě da' siŋ wɔ: Po bɑ nthʉm tʉm pyə nə vɔk ba nə vʉ̌.

⁴Yɑ nə yap tʉm nə po bɑ a ghu' té', dəŋ pa' gɑ̌ dɑ wɔ fyə́ a bɑ a ghu'; gɑ bɑ gɑ ló nə Zhwyətə, yɑ nə ŋwɛnyə̀ nthʉm ghəghʉɔ ghu' tə'.

⁵Nə pa' pyə lə ŋwak Makedonya pyə lə ghə bǎ muywə ŋwɛnyə, pyə lə yɔ pɑ nthinthi ghəghʉɔ: Shù pɑ́ dzʉ́, pwɔk pɑ dyə.

⁶Da' gɑ Si yə e jwyətə pɔ pyə wap fi'nɑ́ tsap hɑ si a, lə́ lɑ̌ pa' Tito sɔ' a nə jwyətə wɔk,

⁷tə da' pa' e lə sɔ' a pɑ, m nə́ kaktʉɔ yə po lə hɑ bi a; e lə siŋ wɔk dəŋ pa' a lə bɑwə nthəŋ wɔ a, siŋ wɔk shyətsə yɔ, yɔ nə ŋkhʉ́dʉ̌ nə fa', siŋ wɔk po'o tə biŋ ŋwɛnyə nə dɑ m dzə̀.

⁸Əŋ, a pɑ́ gɑ́ ŋwa'nyə a lě gə po yɛluŋ bɑ ŋ tə̌ wə́ di' pɑ́. Bi a nəŋ bɑ gɑ́ gɑ̌ wə dǐ', pa' gɑ nə jyə́ gɑ́ ŋwa'nyə bɔ lə ghə po yɛluŋ a,

⁹bɑ gɑ̌ wə ŋwɛnyə cwəlɔ, la' ŋwɛnyə m pa' a lə ghə po yɛluŋ a pɑ, ŋwɛnyə m pa' a lə ghə po pʉɔtʉm a. Nə pa' yɔ nə yɛluŋ lə bɑ yə Si; a po'o tə nə yɔk nə pɑ́, pyə lě tə ghə sɔmywə bɔk pɔ̌k nə po.

¹⁰Nə pa' nə yɛluŋ yə Si shəŋ a, gə mo pʉɔtʉ̌m yə a shya mo nə ywə vɔk, la' a ghə mo ti' pi a. Yɛluŋ yə a bɑ yə́ dzʉ́ yəŋ a hɑ vʉ́.

¹¹Po yɔ pɑ ywə yə nə yɛ́luŋ pa' Si shəŋ á gə nə po: Mu'nthi nə lo'nyə! Mu'nthi nə tɛ nɑ́ tsɔ́! Mu'nthi kuso! Mu'nthi pwɔk! Mu'nthi nə cəŋ nə yɔ! Mu'nthi kaktʉɔ! Mu'nthi nə nyəŋ shɛ! Pǒ la'tə pɑ kwa' wɔ gɑ́ po la tə́ bɑ pó hɔ sɔmywə pɑ̀.

¹²Nə cyətə ywɔk nə́, a bi a pɑ́ gɑ ŋ dě bvə bi po, bɑ a lá tə́ bɑ nə nə ŋkham shɛ kɑ m̀ nə mo yə pu ŋkham e a pɑ́. Ŋ də nə gə gɑ kwa' wɔ zhyə dzə̌ Si dəŋ e po nə ŋkhaktʉɔ nə pyə a.

¹³Yəŋ bɑ ywə yə a jwyətə wɔk a. Mu' piŋ ŋkwi' nə nə zhwyətə̀ bɔ gɑ̀ pyə̌ cəŋtə ŋwɛnyə́ nə zhyə́ gɑ nthi pa' po lə nə gə nə Tito a le ŋwɛ́nyə tʉm tsyə́.

¹⁴Bi a pɑ̀ gɑ kwa' myə lě dɑ wɔ fyə́ dzə̌ e, bɑ sǒ kɑ kú a, nə pa' cwə yə́ pyə gɔm pɑ nwə nyənyɔ bi po a, yɑ nə lɑ wɔ fyə́ dzə Tito lə bɑ kwa' nə tsʉ' é.

¹⁵Nə pa' cwə yə́ e ŋkhamtə pa' po lə́ nə́ ju'nyə́ é nə guŋ mnwə awɛ, ŋkhamtə yɔ nə pwɔk bɑ nə səŋ tə nə́ dɑ é po'o a, biŋ shəŋtə ŋkhuŋ wɔ.

¹⁶Gɑ̌ wə ŋwɛnyə nə zhyə gɑ nə guŋ mnwə awɛ pɑ̀ nə bəmtə́ bɑ́.