Read Ghomala New Testament 2 KORINTO 8 Bible Online

2 KORINTO 8 - Ghomala New Testament bible

2 KORINTO 8

¹Pyə̌ shəŋ nə́ ghə po zhyə gho' yə Si lə nə go' mcu'tə Makedonya.

²Nthʉm ghəghʉɔ nthinthi yə a shʉ'nyə wap a, ŋwɛnyə gwyə yap pu a pə́ŋ yap tə dhə̀ lé do tə ja' nə hɑ ywə nə́ fa'.

³Wap ghə dəŋ yə wap ku'nyə nə a, tə́ a cyə ba ywə yə wap ku'nyə nə a, gə po'o pɑ cwə o cwə o,

⁴shəŋtə́ həŋtə bi pyə gho' gɑ́ wap yáp yap pu nə fa' bɔ po'o nə́ nə ŋkwitə́ pɔ dɔlɔ̌.

⁵Wap lě gə ywə yə pyə la tə́ kwɛ a, nə ləŋdzə hɑ nɑ tsap bi Cyəpɔ, ba m bi pyə, shyə m nə pa' Si lə nə jap a.

⁶A po'o tə pyə cwi'tə bi Tito gɑ́ fa' kwitə tsyə e lə tǒ' wə po a, e nə gɔ tə miŋ pɑpúŋ pa' e lə to' a.

⁷Tə́ dəŋdəŋ pa' a bɑ po ghə guŋ ywə awɛ: gə Pǐŋnthʉm, gə nə zhyə nə ghɔmnwə, gə nə ləmnyə nə fa', gə ba ŋkhuŋnyə yə á fɑ bi pyə à a yɔm a, po ghə bɑ nə fá'fa' kwítə̀ a yɔm nə́ yəŋ sɔ.

⁸Ŋ tə gɔm m̀ gɑ́ gɑ̌ yap po'o pɑ, gɑ̌ siŋ wɔ yə nə ləmnyə nə fa' pyə shɑ pɔ po'o tə a hɑ́ bi po nə la'tə gɑ́ kwa' wɔ bɑ po zhyə nə hɑ ywə.

⁹Po zhyə yə nthi nə hɑ ywə Cyəpɔ yɔk pɑ Yeso Kristo, yʉ́ yə e bɑ ě zhi da' gɑ bʉɔ shʉ' bəŋ tə́ po cyə m nə pə́ŋ e shʉ' pɔ jizhǐ a.

¹⁰Yɑ̀ pa' gɑ̌ wə nə jɔ́ a wə bɑ gɑ́: Po lə́ bɑ́ dəŋdzə nə yap fa' bɔ, biŋ gə po'o tə́ gu' po'o; a pɑ ywə yə ǎ ku'nyə nə po a.

¹¹Kwa' cwəlɔ, po miŋ nə ghə fa' tsɔ, po'o gɑ ywə pɑpuŋ yə po jap a po fa' pa' ǎ ku'nyə nə po a.

¹²A bi a ywə yə mo sɛ nə ghə a pɑ kwa' ywə pɑpuŋ, bɑ pu gɔ kwi o ba ywə yə o ghə a kwa' pɑpuŋ; tə́ sɔ' m nə yə mo ka ghə á, a lə pɑ́ shɛ.

¹³A tə bɑ gɑ pu gɔ lɑ wɔ yɔgo' tə́ pyə shɑ́ pɔ pɑ́ pɑpuŋ pɑ́, a bɑ̀ da' gɑ a kɑ tsɑ́ ŋkwi thə́.

¹⁴Nə cwəlɔ ywə yə pǒ ghə a cyə́ a gɔ cu'nyə yə wap ghə a kɔk a, po'o gɑ a la' bɑ mu' tyɛ'dzʉ́ ywə yə wap ghə a cyə a cu'nyə yə po ghə a kɔk a: Po'o gɑ nwə pɑ́ dəŋdəŋ,

¹⁵pa' a bɑ pu və gɑ: Mo yə e lə cu'tə́ tə a yɔm a la tə ghə tə a cyə; mo yə e shu'tə a kɔk a lə yak sɔmywə.

¹⁶Pa' lə́ bi Si yə e lə nyəŋ nə ləmnyə nthʉm tʉm Tito nə po a.

¹⁷E lě bíŋ pa' pyə lə nə ŋkhe e a, biŋ do'nyə, tə mo nthənyə e thə́nyə nə ghɔ wə pó.

¹⁸Pyə lě nthəm wap pu mu' fɑ̀ yɔk pɑ yə́ guŋ mcu'tə awɛ gu'tə tso tsyə nə cúŋ pɑpuŋ a.

¹⁹Pɑpúŋ kwi' bɑ gɑ́ mcu'tə nə lə́ shwɔ' e gɑ e pɑ so ghiŋ yɔk nə ghɔ nə tsɔ fa' tʉm pɑpuŋ nə hɑ ywə, fa' tsyə pyə gə po'o nə nə gu'tə Cyəpɔ ba m gɑ́ mkwɛnyə pɑpuŋ mɔk pəmtə́ a.

²⁰Pyə́ wə shəŋtə bɔmtə́ gɑ sɔm bya kɑ pɑ̌ nə pyə nə nə́ lɑ yəŋ mɑ dəŋ ŋkhap yə pu jap wɔk nə a nə fǎ'.

²¹Pyə wə shəŋ gɑ́ a pɑ pɑpuŋ nə mnyə Si ba nə mnyə pɔmnəŋ.

²²Pyə á pyə́ shɑ pɔ pyə pu shwɔ wap a pəmtə́ nthəm fɑ́ yɔk pɑ yə pyə jɔ yə nə ləmnyə nə fa' mcʉmmcʉ̌m, e piŋ bɑwə cwəlɔ ŋkwi' bɑwə da'tə a, nə pa' ě yap tʉm nə pó.

²³Tito bɑ so ghiŋ a biŋ bɑ so fa' a bəŋ po. Mfɑ pɔk pɔ gɑ pɑ́ pɔ pyə mcu'tə nthəm wap a, bɑ ghu'tə Kristo.

²⁴Po la'tə mtiŋ yɔ nthi ŋkhuŋnyə ba mtiŋ pa' pyə dɑ wɔ nə fyə́ bəŋ pu a bi pu dzə̌ cu'tə.