Read Ghomala New Testament GALATA 1 Bible Online

GALATA 1 - Ghomala New Testament bible

GALATA 1

¹Myə Polo, bɑ gɛ nthə̌m, la' bɑ gɛ nthə̌m pɔmnəŋ kɑ yə mu' mo pɑ́. Gɑ̌ bɑ́ gɛ nthə̌m m nə Yeso Kristo pú Si Tá yə é lə yam e nə vʉ̌ a,

²pyə a guŋ mfɑ̌mfɑ́ pyə́ pyə a pú bɑ a, bi mcu'tə pɔ Kristo myə́ ǎ Galata a:

³Gho' pú hwitə pɑ́ bi po shyə́ m nə Si, Tá yɔk pɑ, bɑ m nə Cyəpɔ Yeso Kristo,

⁴yʉ́ yə e lə hɑ̌ thə́ nɑ e nə́ mhɔ mɔk pɑ, tə́ nə ŋkwi wɔk pɑ bi yəŋ dzʉ́ cwəpuŋ a, dəŋdəŋ pa' Si yə e bɑ Tá yɔk pɑ á shəŋ a.

⁵Ghu'tə pɑ́ bi e nə mgu' nə gu'. Amɛn.

⁶Nwə̌ zhʉm á nə nthi pa' po nə nthəm nə mo yə e lə kě wɔ shyə m nə gho' Kristo, nthəm po'o gɔ m nə mu' Cuŋ pɑpúŋ a.

⁷A tə́ bɑ m gɑ́ mu' Cuŋ pɑpúŋ bɑwə pɑ́; da' gɑ shɑ́ pɔ bɑ cəcɑ̌ po bɑwə má' và' biŋ bɑwə shə́ŋ nə́ kwyəpnyə́ Cuŋ pɑpúŋ Kristo.

⁸Da' gɑ mu' mo, kə nə pyə́, kə aŋgəle fɑ kɛbəŋ lə́ siŋ wɔ́ mu' Cuŋ pɑpúŋ, tə́ a bɑ́ yə pyə lə́ sǐŋ wɔ a, bɑ dǒ thə́ e!

⁹Pyə lě da' gɔ̌m, bìŋ ŋkwi' bɑwə gɔm cwəlɔ gɑ mo siŋ wɔ mu' Cuŋ pɑpuŋ tə a bɑ yə po lə la' ju' a bɑ dǒ thə́ e!

¹⁰Nə pa' cwəlɔ, gɑ̌ shəŋ pɑ́ nə puŋ pɔmnəŋ kɑ nə́ púŋ Si? Gɑ̌ shəŋ nə puŋ pɔmnəŋ a? Ŋ də pe' bɑ shəŋ pɑ́ nə́ puŋ pɔmnəŋ bɑ ŋ tə́ jɑ gɛfa' Kristo pɑ.

¹¹Nə pa' gɑ̌ wə́ siŋ wɔ mfɑ̌mfɑ́ gɑ́ Cuŋ pɑpúŋ yə gɑ̌ siŋ wɔ a, a tə́ fɑ m bi monəŋthə́ pɑ́,

¹²bɑ pu lá tə nəŋ shyə́ m nə mo tə ji'tə a kə tə́ hɑ bəm pɑ́; Yeso Kristo nə́ gə tə́ myə zhyə́.

¹³Nə pa' po lə yǔ' pu ghɔmnwə nə tsɑ̀ ghiŋ pa' ŋ də nə gə́ nə nə́ piŋ pɑ Yudea a: nthi pa' ŋ də lɑ Cu'tə pɔ Si jɔgo' biŋ bɑ shəŋ nə sa'tə yá a.

¹⁴Ŋ də dɑ yɑ́ nə piŋ pa' pɑ Yudea biŋ a, nə gɔ pɑ́ dzə̀, tə shyə bo'gwyə ŋkhɛ yɔk ba pɔ nə gwya yɔk nə nə́ səŋnyə nə kyəp ma mtá pɑ̌ a.

¹⁵Da' gɑ mo yə́ e lə ci a tə jɑ vǎm ma á, e gho' a á lə cwə̌ tə jɔ gɑ́ a puŋ gɑ́

¹⁶e ghə ŋ jyə́ Mu é, po'o gɑ siŋ e bi pɑ tə́ pɑ́ pɑ Yudea, ŋ gúŋ dusi, tə hə̌ŋtə nthɔk monəŋthə́ pɑ́,

¹⁷la' nəŋ bʉɔ Yerusalɛm bəŋ pɔ pyə́ wap lə bɑ mghɛ nthəm m dzə̌ m̀ a pɑ́. Ŋ də ghɔ Arabya, biŋ bɑnyə Damasi.

¹⁸A lə pǐŋ nə cyə́ gu' tá ŋ bʉɔ gɔ Yerusalɛm nə yɔ Kefas. Ŋ dɑ́ pǐŋ shwə́ bəŋ e tyɛ' shwɔp tɔ mghǎm

¹⁹tə yɔ sɔm gɛ nthə̌m tə́ ně da' Yakop fɑ́ Cyəpɔ.

²⁰Ywə yə gɑ̌ bvə bi po a, gɑ̌ wə gɔm po'o dzə̌ Si, a tə́ bɑ cwanwə pɑ̀.

²¹Ŋ də pǐŋ gɔ nə ghə̌ŋ mgùŋ Siria ba m̀ Kilikia.

²²Da' gɑ a lə́ bɑ mcu'tə pɔ Kristo Yudea ka zhyə́ sə a pɑ́.

²³Wap lə bɑ wap yu' yap da' pa' pu gɔm gɑ: Mo yə e lə cwɔ'mkwə mɔk pɑ a cwəlɔ bɑwə siŋ piŋnthʉm yə e lə sa'tə cwə o bɔ a.

²⁴Biŋ bɑ gu'tə Si nə thə́ a.