Read Ghomala New Testament GALATA 2 Bible Online

GALATA 2 - Ghomala New Testament bible

GALATA 2

¹A lə pǐŋ shyə́ gu' shwɔppfʉə mghǎm, ŋ bʉɔ gɔ Yerusalɛm, pyə Barnabas; ŋ də nə ghɔ dɑ́ ba Tito.

²A lə́ dú m nə ywə yə Zhwenyə Si lə ghə ŋ jyə́ a tə́ bʉɔ wə́ nə la'tə wap Cuŋ pɑpúŋ yə ŋ də bɑwə siŋ bi pɑ tə pɑ́ pɑ Yudea a bi pú; ŋ də piŋ da'tə ya bɔ bi pɔ pyə́ pu lə bɑwə shəŋtə́ nyəŋ də̀ŋ nə pú a, po'o bɑ bwɔk gɑ ŋ khɑ khʉdʉ́ kɑ m gɑ a kɑ́ pɑ́ bɑ gɑ̌ khʉdʉ́ néné lə́.

³Da' gɑ pú la tə thə́nyə bǎ Tito, só ghìŋ a yə e bɑ yə Grikia a gɑ́ pu vó e pɑ́.

⁴Pú lə pé'e gə po'o, bɑ a lə bɑ fɑ m bi mfǎ fʉtə̀ pyə a lə bɑ wap twɔk ŋkho cəcɑ̌ pyə́, bɑwə sa' wɔk nə yɔk nə cyətə́ pɑ ŋkwɔ yə pyə́ gə shyə m nə Yeso a, bɑ shəŋ nə lɑ wɔk gə mkwɔ.

⁵A lə pɑ̌ po'o la' pyə yu'nyə wap bǎ mu ywə pɑ́, po'o gɑ̀ pu tɔm nyənyɔ Cuŋ pɑpuŋ bi po.

⁶Da' gɑ́ sɔ' m nə́ nwə pɔ gwyə́: pa' Si tə́ dé pɑ dəŋ mo a pɑ́, bi a pɑ wap lə lɑ sɔmywə hyá a pɑ.

⁷Wap lə yɔ m gɑ́ a bɑ pu hɑ nə siŋ Cuŋ pɑpuŋ bi pɔ pyə pu ka vo wap a bəm pa' a bɑ pu hɑ nə siŋ Cuŋ pɑpuŋ bi pɔ pyə pu vo wap a bi Pɛtrɔ a.

⁸Nə pa' mo yə é lə lɑ Pɛtrɔ gə gɑ nthəm pɔ pyə pu vo wap a lě gə gɑ ba myə yɑ̌ pɑ gɛ nthə̌m pɔ pyə́ wap tə bɑ pɑ Yudea a pɑ́.

⁹A lə pɑ̌ po'o Yakop, Kefas ba Yohane pyə́ wap bɑ mgak a zhyə́ gho' yə Si hɑ bəm a, hɑ pú yap bəm ba m bi Barnabas, a pɑ́ mtiŋ gɑ́ pyə a pu pɑ ŋkwishwə po'o gɑ pyə nə ghɔ m bə̌ŋ pɔ pyə́ pu ka vo wap a, wap ghɔ yap m bə̌ŋ pɔ pyə́ pu vo wap.

¹⁰Tə ywə pɑ̀ da' gɑ pyə pɑ ŋkhamtə mpə́ŋ, a nə́ŋ bɑ ywə yə gɑ̌ gə gùŋ mcwə awɛ a.

¹¹Da' gɑ́ Kefas lə sɔ' Antiokia myə vá é sɔsɔ̌, bɑ ě hɔnwə.

¹²Nə kəlɑ́ pɔ nə pɔ pyə́ pu a Yakop lə bɑ́ a lə nə sɔ', Kefas pu a pɑ tə pɑ́ pɑ Yudea pɑ dzʉnyə; da' gɑ́ wap lə cwə̌ tə́ sɔ̌' e to' nə pɑ́ jyə̌ wap, bɑ ŋkhʉ́ wap, bɑ bwɔk pɔ pyə a bɑ pu vó wap a.

¹³Ba pyə́ shɑ́ pɑ Yudea lə́ to' yap nə ghə pa' yʉ a, tə ba Barnabas ko yə nə nə fʉtə yap.

¹⁴Da' gɑ́ cwə yə ŋ də yɔ gɑ́ wap tə̌ wə giŋ dəŋdəŋ nə́ nyənyɔ Cuŋ pɑpuŋ a pɑ́, ŋ gɔm bi Kefas dzə̌ guŋ pɔ awɛ gɑ: A pɑ gɑ́ wə yə́ o bɑ yə Yudea a, ǒ wə́ bvɔk pa' pɑ tə pɑ́ pɑ Yudea a, la' o vɔk m pa' yə Yudea a, bɑ o gɔ piŋ thə́nyə pɑ tə́ pɑ́ pɑ Yudea gɑ wap vɔk pa' pɑ Yudea a m gɑ kɑ̀?

¹⁵Pɑ̌ bɑ́ pɑ Yudea pa' pu nə dzə wɔk pɑ a. Pɑ tə bɑ́ pɑ tə pɑ́ pɑ Yudea, mghɛ mhɔ pɑ̀.

¹⁶Pɑ̌ bɑ pɑ̌ zhyə gɑ tə mfa' mco' nə gə mo pɑ́ dəŋdəŋ pɑ́, da' nə piŋ Yeso Kristo nə́ gə mo pɑ́ dəŋdəŋ; ba wɔk pɑ yɔk pɑ bɑ pɑ lě biŋ Yeso Kristo po'o gɑ pɑ cyə́ m nə nə́ piŋ Yeso Kristo bɑ dəŋdəŋ; a lə cyə́ m nə mfa' mco' pɑ, nə pa' sɔmmo tə gɔ sɔ' cyə m nə mfa' mco' pɑ́ dəŋdəŋ pɑ́.

¹⁷Tə́ a pɑ gɑ́ pɑ lě shəŋ nə pɑ́ dəŋdəŋ m nə́ Kristo, pu yɔ gɑ́ pɑ̌ bɑ́ mghɛ mhɔ̀, bɑ á da'tə gɑ́ Kristo fa' bi mhɔ a? Tə́ gɛ̌.

¹⁸A pɑ gɑ́ gɑ̌ piŋ ŋkwɑ ywə yə ŋ də sa'tə a, bɑ myə nə́ bɑ́ gɛ pɔptə mco'.

¹⁹Nə pa' kwa' myə, a lə́ shyə pɑ́ nə mco' tə myə pfʉ́ nə mco', po'o gɑ́ biŋ bvɔk m̀ bi Si. A bɑ pyə Kristo pfʉ́ thə́ bɛnyəpɛnyə;

²⁰Gɑ bɑwə bvɔ̌k, da' gɑ a tə́ jɑ̌ a pɑ́, Kristo nə bɑwə bvɔk nə m̀. Nə pa' kwa' vɔk a cwəlɔ nthʉm bap nɑ́, gɑ̌ bɑwə bvɔk yá m nthʉ̌m piŋnthʉm, piŋnthʉm nə Mú Si yə e lə kùŋ a tə hɑ vɔk e nə thə a lə.

²¹Pɑ ŋ də ghə gɑ́ gho' Si pɑ́ pɔpɔ; nə pa' pu cyə m nə mco' tə bɑ dəŋdəŋ bɑ Kristo lě pfʉ́ pɑ pɔpɔ.