Read Ghomala New Testament GALATA 3 Bible Online

GALATA 3 - Ghomala New Testament bible

GALATA 3

¹Wɔ pɑ Galata, mfʉmnyə́ pɔ, wɑ̌ fɛ́ wɔ? tə bɑ pú lə nə̌ŋ shəŋtə da'tə Yeso Kristo thə bɛnyəpɛnyə dzə̌ po nə mnyə mɔ?

²Po siŋ a yəŋ nwə̀: Po lə́ shyə pɑ m nə́ nə ghiŋ nə́ mco' tə́ ŋkwi Zhwenyə, kɑ m pa' po lə yu' ŋkhʉɔ piŋnthʉm a?

³Wɔ pɑ Galata, pǒ fʉmnyə tə́ dəŋ pa' a? Wɔ pyə́ po lə ləŋdzə ntho' m nə Zhwenyə á, já bap nɑ́ nə gɔ ghə tə́ po pɑ́ pɔ lə̀?

⁴Po yɔ́ dəŋ fa' e a gɔ cyə fé! Kwa' fě!

⁵Mo yə́ é hɑ Zhwenyə bi po biŋ bɑ gə msya cəcɑ̌ po á, e gə po'o pɑ́ nə pa' pǒ ghìŋ nə mco' a kɑ́ m pa' pǒ yu' ŋkhʉɔ piŋnthʉm a?

⁶Pa' Abraham lə́ ghə piŋnthʉm nə Si, Si yap gɑ́ e bɑ dəŋdəŋ bi á,

⁷po cəŋtə́ ju' gɑ pɔ pyə́ wap ghə piŋnthʉm a nə bɑ́ pó Abraham.

⁸A nə pɑ̌ po'o bɑ Ŋwa'nyə lə la' nə yɔ̌ gɑ Si gɔ sɔ' cyə m nə piŋnthʉm ghə pɑ tə pɑ́ pɑ Yudea cʉ' pɔ dəŋdəŋ siŋ Cuŋ pɑpuŋ yəŋ bi Abraham gɑ: Gùŋ mguŋ awɛ gɔ sɔ' cyə m nə o ghə byanyə́.

⁹A po'o tə́ pɔ pyə wap biŋ a pɑ́ bɑ wap ghə byanyə́ pu a Abraham gɛ piŋ.

¹⁰Nə pa' guŋ nə fá'fa' mco' awɛ bɑ nwə dò, nə pa' bɑ pu və gɑ: Dǒ bɑ́ thə́ mo yə e tə́ ŋkhaktʉɔ giŋ nə guŋ mco' awɛ myə́ a bɑ pú və nthʉ́m ŋwa'nyə mco' a pɑ́.

¹¹A nəŋ bɑ́ nyənyɔ gɑ́ sɔmmo tə́ bɑ́ dəŋdəŋ dzə̌ Si shyə́ m nə́ mco' pɑ, nə pa' mo dəŋdəŋ nə piŋnthʉm bɑ mo yə e gɔ sɔ' vɔk a.

¹²A nə pɑ̌ po'o, mco' pu piŋnthʉm lə pɑ́ ta' ywə pɑ́. Mo yə e fa' pa' mco' gɔm a gɔ sɔ' vɔk pɑ́ nə mco'.

¹³Kristo bɑ e lě jó nə ŋkwi wɔk pɑ bi dò mco', nə kwǐ wɔk pɑ po'o bɑ e pʉɔ shʉ' dò nə pɑ, nə pa' a bɑ pu və gɑ: dǒ bɑ thə́ mo yə pu ciŋ e thə́ a.

¹⁴Po'o gɑ́ byanyə Abraham kə́m nə pɑ tə́ pɑ pɑ́ Yudea, shyə m nə Yeso Kristo, a piŋ bɑ́ po'o pɑ cyə́ m nə́ piŋnthʉm ŋkwi Zhwenyə, ywə yə pu lə ka' a.

¹⁵Mfɑ̌mfɑ́, pɑ lɑ fo' nə́ mnwə myə mo gə a: sobo mka'nyə myə́ mǒ ŋkha' tə npfʉ́ a pɑ́ nə ŋkhɛ bɑ pu tə́ gwa' pɑ́, pu lə nəŋ ŋkwi' sɔmywə nə pɑ́.

¹⁶Tə́ Si lə hɑ mka'nyə̀ bi Abraham ba m bi gwya e; a tə bɑ pu ghɔm m gɑ́ bi mgwya pɑ́ cwə yə́ a bɑ́ mgwyǎ yɔm a, a bɑ nwə ta' gwya yɑmu': bi gwya o. Yəŋ la'tə gɑ Kristo.

¹⁷Kwɛnyə a bɑ́ gɑ: Si bɑ ě ləŋdzə jap ta' kɔ m nə ŋkhɛ. Mco' myə a biŋ nthəm jʉm nə gu' pǒtá mŋkhə pfʉ̀ə a, ka vɑnyə kɔ bɔ pɑ, po'o gɑ́ mka'nyə kɑ cyə fé.

¹⁸Nə pa' a pɑ gɑ́ pú shyə m nə mco' tə́ gə mcʉ', bɑ a tə́ biŋ bɑ́ m nə mka'nyə pɑ. A nəŋ nə pɑ̌ po'o bɑ Si lə shyə pɑ́ m nə mka'nyə tə hɑ gho' e bi Abraham.

¹⁹Tə fɑ po'o mco' biŋ sɔ' m nə ghə gɑ́ kɑ̀? A sɔ' kwi' tə́ nə pɔptə mco' cəŋtə bɑwə́ tə bɑ nə byap gwya yə mka'nyə bɑ myə́ a. Pɑ aŋgəle nə lə gə pu zhyə́ mco' bɔ, shyə m nə pǔ ta' giŋjyə̀.

²⁰A nəŋ bɑ po'o, giŋjyə̀ bɔ lə pɑ̀ da' yə ta' mo. Si piŋ bɑ́ da' yʉ do e.

²¹Tə́ mco' gɔm ywə dyɛ' nə mka'nyə Si a? Gɛ̌. A lə pé'e bɑ gɑ́ pu lě hɑ ta' mco' myə a bɑ ǎ ghə tʉɔ nə gə mo vɔk a, bɑ nwə dəŋdəŋ fɑ nə mco'.

²²Tə́ ŋwa'nyə bɑ a lě nyəŋ mhɔ nə guŋ ywə awɛ, nə tamtə bɑ́ ŋkwɔ, po'o gɑ́ a cyə m nə piŋnthʉm nə Yeso Kristo, mka'nyə pəmtə́ bi pɑ piŋ.

²³Pǐŋnthʉm lə́ nə sɔ' bɑ pɑ lə bɑ mkwɔ bi mco' tə bɑ nə byap piŋnthʉm yə pu lə bɑ gɔ la'tə wɔk pɑ a.

²⁴A po'o tə mco' lə bɑ gɛ lé wɔk pɑ̀ tə́ bɑ nə byap Kristo, po'o gɑ́ pɑ pɑ́ pɔ dəŋdəŋ shyə m nə piŋnthʉm.

²⁵Da' gɑ cwə yə́ piŋnthʉm sɔ' a, pɑ tɑ jɑ́ nə bǔ gɛ lé pɑ.

²⁶Nə pa' gùŋ yɔ awɛ shyə m nə piŋnthʉm bɑ pó Si shyə m nə Yeso Kristo.

²⁷Əŋ, guŋ yɔ awɛ pyə́ po lə kwishyə nə Kristo a, a bɑ po lě ŋkwa Kristo nə po.

²⁸A pɑ po'o yə Yudea lə yɑwə́ kə yə Grikia lə; ŋkwɔ lə yɑwə́ kə tə́ pɑ ŋkwɔ lə; mbɛ lə yɑwə́ kɑ mjwǐ lə; nə pa' guŋ yɔ awɛ bɑ pɑ̀ yɑmu' m nə́ Yeso Kristo.

²⁹Bi a po piŋ bɑ m bi Kristo, bɑ a da'tə gɑ po bɑ̀ gwya Abraham; a cyə m nə mka'nyə po pɑ́ pɑ tsʉ mcʉ'.