Read Ghomala New Testament GALATA 4 Bible Online

GALATA 4 - Ghomala New Testament bible

GALATA 4

¹Mkwɛnyə mə̌ bɑ gɑ: Dzʉmcʉ̌' bɑ cwə yə e yɑ mu a, pu ŋkwɔ pɑ́ pɑ ta' ywə́, ba pa' e bɑ tá guŋ pǒtsə awɛ a;

²e ju'nyə bi pɑ təmtə é ba m bi pɑ lé é tə́ ŋkhəm cwə yə́ tap é lə yap a.

³Ba wɔk pɑ yɔk pɑ, cwə yə pɑ lə jɑ pó a, bɑ ju'nyə bi m nwə gʉ' dzʉ́ a, pɑ lə bɑ mkwɔ.

⁴Da' gɑ cwə lě shwə́ tə bəmtə́, Si tə́m Mu é, mjwǐ tsə é, e pɑ́ ŋkwɔ mco',

⁵tə nə jó gɑ́ pɔ pyə́ wap bɑ mkwɔ bi mco' a wap kɑ piŋ bɑ́ mkwɔ bi mco', a pɑ́ po'o tə́ a ghə pɑ cʉ' mcwəpó.

⁶Pǒ bɑ kwa' pǒ bɔ: bɑ Si lé nthəm Zhwenyə Mu é nthʉm tʉ́m pɑ gɑ́ a ghə pɑ pɑ́ shwé gɑ: Aba, a la'tə gɑ: Tá yɔ́k.

⁷O tə́ jɑ ŋkwɔ pɑ́, o bɑ mu, cwə yə o bɑ mu a, bɑ mu' dzʉmcʉ̌': a bɑ fa' Si.

⁸A lə́ bɑ dzə bɑ po ka zhyə́ Si, po pɑ mkwɔ bi msǐ tə pɑ Si.

⁹Tə́ cwəlɔ yə a bɑ pǒ zhyə Si a, yə a bɑ ě zhyə́ wɔ a, tə́ pǒ biŋ bɑnyə nə mnwə gʉ' pɔ pɔ po'o gɑ a piŋ dɑ wɔ gə mkwɔ po'o m gɑ kɑ?

¹⁰Pǒ nyəŋ dəŋ nə shɑ́ mtyɛ'dzʉ́, ba mŋwə́ dzʉ́, ba mwɔ̌ dzʉ́ pu a mgʉ' dzʉ́.

¹¹Pǒ wə gə myə pɑ́ bwɔk gɑ́ pɑtyɛ' bɑ ŋ dě fá' fà' pí bi po.

¹²Po ghiŋ pa' myə a mfɑmfɑ, nə pa' a bɑ gɑ̌ cʉ' pa' wɔ a, gɑ̌ cwyɛ'nyə wɔ. Po ka hɔ kwa' sɔmywə bəm.

¹³Pǒ zhyə kwa' pɑpuŋ gɑ a lə shyə m nə gho tə myə siŋ wɔ Cùŋ pɑpuŋ nə də̀ŋdzə̀ cʉ̌m

¹⁴tə ba tə pa' nɑ a lə bɑ cwə o bɔ bɑwə sya wɔ tə' a, po lě tə́ kyak a, myə lə nəŋ hwi wɔ pɑ̀. Gɛ̌ po lə lɑ a m pa' ta' aŋgəle Si a, pa' Kristo Yeso a.

¹⁵Kwa' ŋwɛnyə yɔ cwə o bɔ hɑ? Nə pa' gɑ̌ wə bɑ́ ŋkwinthɛ̌ gɑ: a lə pe' bɑ ywə yə pɑ́ mo ghə a bɑ po lě nthé mnyə mɔ hɑ bəm.

¹⁶Jyə gɑ́ a po'o bɑ gɑ̌ cʉ' gɛ bo yɔ pa' gɑ̌ siŋ wɔ nwə nyənyɔ a lə́?

¹⁷Sə́ŋnyə̀ yə pu wə sə́ŋnyə́ nə po a, a tə nwə pɑpúŋ pɑ́. Wap shəŋ da' nə té wɔ nə m̀ po'o gɑ po piŋ səŋnyə́ yɔ m nə pú.

¹⁸Nwə pɑpuŋ bɑ́ nə yɔ gɑ́ po səŋnyə́ nə mkwɛnyə pɑpuŋ, nə guŋ mcwə awɛ, tə da' nə cwə yə myə lə̌ cəcɑ̌ po a pɑ́,

¹⁹wɔ pó mkəcɔk po pɑ̌ pyə gɑ̌ ŋkwi' dzə́ wɔ nthʉm ghəghʉɔ m nə tsə́ sə́ a pɑ po'o tə̌ Kristo la' bɑ́ nə vɔk yɔ.

²⁰Tə́ yɔ də̀ŋ pa' gɑ̌ wə sʉ́m gɑ́ da' a pe' bɑ bə́ŋ po cwəlɔ tə jɔ kwa' gi nə gɔm nwə bi po yə a ku' nə po a, nə pa' ŋ tə́ wə jyə pa' gɑ̌ gɔ ghə nə po á pɑ́.

²¹Po siŋ á, wɔ pyə́ pǒ shəŋ nə ghiŋ nə mco' a, po tə́ ju' ywə yə mco' bɔ gɔm a pɑ á?

²²A bɑ pu və gɑ́ Abraham lə ghə pǒ pɑpʉə: yə mu' pu mjwǐ yə e lə bɑ ŋkwɔ a, gə yə mu' pu mjwǐ yə e la tə́ bɑ ŋkwɔ a pɑ.

²³Da' gɑ mú mjwǐ yə e lə bɑ ŋkwɔ a lə bɑ mu e shyə m nə bap nɑ̀, tə mu mjwǐ yə e la tə́ bɑ ŋkwɔ a pɑ́ pɑ mu e shyə m nə mka'nyə̀.

²⁴Yə̌ŋ bɑ pɑ fo'nwə̀: Pɑ jwǐ pɔ pɑpʉə bɑ mkɔ mɑbʉə. Tsyə́ a fɑ m Sinai a, dzə́ po ŋkwɔ: A bɑ́ Agar;

²⁵nə pa' kúŋgó Sinai bɑ m Arabya, Agar piŋ bɑ́ fo' Yerusalɛm cwəlɔ, yə a bɑ ŋkwɔ pu a po pyə́ a.

²⁶Da' gɑ́ Yerusalɛm yə a bɑ m thə́ kɛbəŋ a tə́ bɑ ŋkwɔ pɑ́, yʉ́ nə nəŋ bɑ má yɔk pɑ̀,

²⁷nə pa' a bɑ pu və gɑ: Ŋwɛnyə, wə ŋkhiŋ, wə yə o la tə́ dzə́ a pɑ. Togə̀ŋ ŋwɛnyə̀, wə yə ywə la m jɛ o a; nə pa' pǒ mjwǐ yə pu wa' e a yɔm shyə pyə́ mjwǐ yə ě ghə dhə a.

²⁸Ba wɔ mfɑmfɑ́, dəŋdəŋ pa' Isak a, pǒ bɑ́ po mka'nyə.

²⁹Da' gɑ dəŋdəŋ pa' mo yə pu lə́ dzə é m nə bap nɑ́ a lə shwɔ'mkwə mo yə pu lə́ dzə é m nə́ Zhwenyə a, ba m cwəlɔ a bɑ pɑ́ po'o.

³⁰Tə́ ŋwa'nyə gɔm gɑ́ kɑ? A gɔm gɑ: zhə́ŋ ŋkwɔ pú mu e, nə pa' pɑ́ mu ŋkwɔ pu mu tə pɑ ŋkwɔ lə pəmtə dzʉ́ mcʉ'.

³¹Po'o lə mfɑmfɑ pɑ tə́ bɑ po mjwǐ ŋkwɔ pɑ́, pɑ̌ bɑ̀ po mjwǐ yə e tə́ bɑ ŋkwɔ a pɑ́.