Read Ghomala New Testament GALATA 5 Bible Online

GALATA 5 - Ghomala New Testament bible

GALATA 5

¹Kristo lə nthé wɔk pɑ nə ŋkwɔ po'o gɑ pɑ kɑ́ piŋ bɑ ŋkwɔ. Po tɔm pɑpúŋ, po kɑ piŋ bíŋ nə zhwə́ kəlo' ŋkwɔ.

²Myə Polo, gɑ siŋ wɔ: Po ghə pú vo wɔ bɑ Kristo tə́ gɔ piŋ ŋkwitə wɔ nə sɔmywə pɑ́.

³Gɑ biŋ bɑwə gɔm bǎ bi yɑ mo lə yə ě ghə pu vo e a gɑ́ e ghiŋ nə guŋ mco' awɛ.

⁴Po yap yɔ nə pɑ dəŋdəŋ pɑ nə́ mco' bɑ po a Kristo hapnyə, bɑ pǒ mi nə gho'.

⁵Tə́ sɔ' m nə pyə, pyə pɑwə mɔktə gɑ Si gɔ sɔ' ghə pyə pɑ dəŋdəŋ dzə̌ e, shyə m̀ nə Zhwenyə, nə piŋnthʉm, pyə̌ bɑwə shəŋtə byap gɑ a pəmtə́.

⁶Nə pa' a sɔ' m nə mo yə ě m nə Yeso Kristo a, nə vo e, kɑ nə cyətə vo e lə lə̀ pɑ́ sɔmywə, da' piŋnthʉm shyə m nə ŋkhùŋnyə nə bɑ nwə.

⁷Po lə bɑwə ŋkhʉdʉ́ kwa' pɑpúŋ; wɑ̌ shɑ məjyə bi po, ŋkhɔ pa' nyənyɔ fəŋ wɔ nə ghɔ a?

⁸Yə bǎ nthi nwə tə́ fɑ m bi mo yə e ŋkhe wɔ a pɑ́.

⁹Mu ywə kwɔ' msɛ̌ gə msɛ̌ kwɔ'.

¹⁰Sɔ' m nə m̀, gɑ̌ zhyə́, shyə́ m nə Cyəpɔ gɑ́ po tə gɔ cwɔ' mu' jyə dyɛ' pɑ̀. Da' gɑ́ mo yə́ e ma' va' cəcɑ̌ po a, gɔ sɔ' kwi mcwɔ'fa' myə́ kɑ e bɑ pɑ pɑ́ gɑ́ kə́lə.

¹¹Sɔ' m nə m̀ mfɑmfɑ́, a po'o bya biŋ gɔ́m gɑ pu vo mò, tə bɑ gɑ̌ jɔgo' po'o nə kɑ? A la bɑ po'o bɑ kəmnyə fa'tə bɛnyəpɛnyə mì.

¹²A pɔ pyə wap ma' va' cəcɑ̌ po a, wap ghɔ tə ja' ba shɑ mkam nə nɑ̀ tsap gwa'!

¹³Mfɑmfɑ́, pu bɑ pu lě ŋkhe wɔ gɑ́ po kɑ pɑ mkwɔ. Da' gɑ́ yɔ nə cyətə́ pɑ ŋkwɔ kɑ nyəŋ wɔ m nə mfa' bap nɑ́. Po cyə́ m nə ŋkhuŋnyə bɑ nthɔmnyə bú nə mfa' cəcɑ̌ po.

¹⁴Nə pa' guŋ mco' awɛ bəmtə pɑ́ da' nə ta' ghɔm tsɔ gɑ: O gɔ pɑ kuŋ mo yə ě bəŋ o a pa' o ŋkhuŋ thə nɑ o a.

¹⁵Da' gɑ po pɑ də́mtə́ msuŋ, bɑ pfɑtə nɑ tsɔ́ cəcɑ̌ po, po pɔmtə̀: pǒ gɔ sa'tə nɑ tsɔ pɑ́ wɔ wɔ́.

¹⁶Po yu' ywə yə gɑ̌ gɔm a: Po ghiŋ m nə Zhwenyə, po'o gɑ po kɑ piŋ fa' ywə yə́ bap nɑ́ nə́ shəŋ a.

¹⁷Nə pa' bap nɑ́ nə́ tsə tsyə e shəŋ a, bɑ gɛ bo Zhwenyə, Zhwenyə pɑ́ gɛ bo bap nɑ́, a pɑ cəcɑ̌ pu bɑ pɑ́ fəŋnyə̀; a po'o tə́ la' po pɑ́ gə ywə yə pǒ kuŋ a.

¹⁸Da' gɑ po pɑ gíŋ nə Zhwenyə, bɑ po tə jɑ̀ ŋkwɔ mco' pɑ̀.

¹⁹Mfa' bapnɑ, a bɑ pu zhyə́ má: nə cyətə tɔm nɑ́, nə viŋ nɑ́, nə ghə ghap

²⁰nə ghamtə̀ kətwɔk, nwə kɛ̀, bò, fəŋnyə, nə kíŋ mo, nə yɛlúŋ, nə twɔ'nyə, nə sa' mshɛ, sɔ́tə,

²¹nə ghi'nyə, nə nwə́ mlù', nə tsʉ́ kʉə ywə́ ba myəshɑ nthi mnwə bɔ. Pɔ pyə wap gə mɔ mnwə a, gɑ̌ siŋ wɔ pa' myə lə zhi siŋ wɔ a gɑ́ wap tə gɔ sɔ' pɑ nə Nəfo Si pɑ́.

²²Tə́ mnthɔm Zhwenyə, po yɔ má: a bɑ ŋkhuŋnyə̀, bɑ ŋwɛnyə̀, bɑ hwitə̀, bɑ nə kyəp tʉ̌m, nə ghə nwə pɑpúŋ, nə yɔ yə mu' mo pɑpúŋ, bɑ piŋnthʉm

²³bɑ nə ghə pyanyə́ nwə, bɑ nə tɔm nɑ́; mco' tə nthébya nə mɔ mnwə̀ pɑ.

²⁴Pɔ pyə wap bɑ pɔ Kristo a bɑ wap kàm bap nɑ́ thə́ bɛnyəpɛnyə pu a tsə tsyə a bùŋ e a ba tsyə e shəŋ a.

²⁵Pɑ pɑ́ bvɔk nə Zhwenyə, pɑ pɑ́ giŋ pa' Zhwenyə nə shya wɔk pɑ a.

²⁶Ka pɑ pɑ́ ŋa'nɑ́, ka pɑ pɑ́ ŋkham mshɛ́ cəcɑ̌ pɑ, ka pɑ pɑ́ gi'nyə cəcɑ̌ pɑ.