Read Ghomala New Testament EFESO 3 Bible Online

EFESO 3 - Ghomala New Testament bible

EFESO 3

¹A po'o tə myə, Polo, gɛ cɛ̌ Yeso Kristo, bi po, pɑ tə pɑ pɑ Yudea...

²Po la' pe' ju' bǎ gho' yə Si hɑ bəm nə pó tə́ ywə yə e lə yap a pəmtə á,

³ju' pa' a lə cyə m̀ nə nə́ ghə mo zhyə́, myə zhyə mnwə cyə Zhyə́nwə dəŋdəŋ pa' gɑ shwɔtə mthə myə́ bi po a.

⁴Po gɔ nə ke ŋwa'nyə a, yɔ dəŋ pa' gɑ nə jyə nwə cyə́ zhyənwə Yeso a.

⁵Nwə cyə Zhyənwə bɔ si bɑ e lě tə ghə pɑ cwədzə̀ zhyə́ ya pa' e da'tə cwəlɔ shyə m̀ nə Zhwenyə bi mghɛ nthəm dɔlɔ̌, ba bi mghɔm ghɔ̀m Si a.

⁶Ba pɑ tə pɑ́ pɑ Yudea bɑ pu piŋ wap nə tsə mcʉ', dɑ wap gə mkam nɑ́ nə ta' nɑ́, nthamtə́ wap nə ta' mka'nyə nə Yeso Kristo, shyə́ m̀ nə Cùŋ pɑpuŋ.

⁷Si bɑ e lě dɑ á nə gə gɛfa' nə bɑ a shyə m nə tʉɔ e nə́ gho'.

⁸Myə yə́ gɑ̌ bɑ jʉɔjʉ̀m nə guŋ mzhʉɔjʉ̀m pɔ dɔlɔ̌ awɛ a, Si bɑ e lě go' a, dɑ a gə gɛ siŋ mɑ fʉ' gwyə́ Kristo bi pɑ tə pɑ́ pɑ Yudea.

⁹Biŋ da'tə pa' Si gə nwə cyə zhyənwə yə e lə la' dʉm pɑ nə é tə fɑ tə tyɛ' a, a pəmtə a.

¹⁰A po'o tə́ tə fɑ cwəlɔ, pɑ Sa' pu a Mtʉ̀ɔ kɛbəŋ shyə m nə Cu'tə pɔ Kristo jyə́ nthinthi mfʉ́ Si,

¹¹Shyə m nə mka'nyə mama myə e gə́ a pəmtə̀ nə Yeso Kristo Cyəpɔ yɔk pɑ̀ a.

¹²Nə Kristo, pɑ shyə m̀ nə piŋnthʉm nə é gə nə fʉ'tə nɑ tsɔk pɑ̀ hɑ bə́ŋ é tə pwɔk sɔmywə.

¹³A po'o tə gɑ̌ wə gɔm bi po gɑ́ ka po tak mɑ gǒ' gwyə yə gɑ wə jɔ nə po a ghə po pwa. A bɑ yɔ ghu'tə.

¹⁴A po'o tə gɑ̌ wə ŋkham mkwitə dzə̌ Tá,

¹⁵yʉ yə́ tsǒ bǎ ya tuŋdyə́ lə́ nthəm pɑ bi, kɛbəŋ bɑ m dəmcǎ' lə.

¹⁶É ghɔ gɔ́ shyə m nə dəŋ ghu'tə e, nyəŋ gʉ' nə po shyə m nə́ Zhwenyə, po'o gɑ mo nthʉ̌m nɑ pɑ nthʉɔ tʉ́ɔ, gɔ pɑ́ dzə.

¹⁷E ghə Kristo ghɔ bɑ shwə́ nthʉm tʉ̀m po shyə m nə piŋnthʉm; po kwigɛ́ biŋ bɑ ŋkwɑ nthʉ̀m ŋkhuŋnyə̀.

¹⁸A po ghə gʉ' nə ju' pu a pyə shɑ́ pɔ dɔlɔ̌ dəŋ pa' a bɑ nthə e yɔm, lɔm e yɔm, dəŋ nthə e pa' a bɑ ǎ sak gɔ thə́ biŋ shú gɔ si...

¹⁹Biŋ jyə́ ŋkhuŋnyə̀ Kristo yə a bɑ ǎ cyə́ guŋ zhyə̌nwə awɛ, po'o gɑ Si ghɔ dó nə po.

²⁰Ghu'tə pɑ bi mo yə a bɑ ě ku' nə ghə gùŋ ywə awɛ shyə m nə tʉɔ e yə a bɑ nə pɑ a, gə tɑ nthwɔk dəŋ yə pɑ do bi biŋ sɛ a.

²¹Ghu'tə pɑ bi e nthʉm Cu'tə pɔ Kristo bɑ m nə Yeso Kristo nə gùŋ mwɔ̌dzʉ́ awɛ, nə mgu'nəgu'. Amɛn.