Read Ghomala New Testament EFESO 4 Bible Online

EFESO 4 - Ghomala New Testament bible

EFESO 4

¹Myə yə gɑ̌ bɑ gɛ cɛ̌ a m nə Cyəpɔ, gɑ̌ səso wɔ gɑ po vɔk m nə nthi pa' pu nə ŋkhe wɔ a.

²Nə fi' nɑ hɑ sì, nə byanyə́, nə nə́ kyəp tʉ̌m, bɑ bəmtə ŋkwa mnwə mɔ nthʉm ŋkhuŋnyə̀.

³Po kaktʉɔ nə tɔ̀m ŋkwishwə zhwenyə shyə m̀ nə dʉ́ hwitə̀.

⁴Nə bɑ pɑ́ yɑmu', ba Zhwenyə pɑ́ pɑ yɑmu'; a po' tə a bɑ pu ké wɔk pɑ nə ta' mɔktə̀ yɑmu',

⁵ta' Cyəpɔ, ta' piŋnthʉm, ta' kwǐshyə yɑmu';

⁶nə ta' Si biŋ bɑ Tá guŋ pɔ awɛ, bɑ sa' guŋ pɔ awɛ, bɑ shyə m̀ nə guŋ pɔ awɛ fǎ' biŋ bɑ shwə́ nə guŋ pɔ awɛ.

⁷Gho' bɑ bi ba ya mo lə́ nə pɑ̀ nə dəŋ pa' Kristo nə hɑ bi a.

⁸A po' tə pu gɔm gɑ́: E lě ŋkwɔ' tə thə́ gəm mghɛ cɛ́; e lě hɑ tsə bi pɔmnəŋ.

⁹E lě ŋkwɔ'! A bɑ gɑ́ kɑ̀ tə pɑ̌ gɑ a bɑ ě piŋ fi' tə ŋkhəm dəmcǎ'?

¹⁰Mo yə e lə fi' tə si a, bɑ mo yə e lě kwɔ' tə thə́ shyə guŋ mkɛbəŋ awɛ tə́ donyə́ nə guŋ dzʉ̌ awɛ a.

¹¹Yʉ́ nə shwɔ' shɑ pɔ nə gə mghɛ nthəm, dɑ shɑ́ gə mghɔm ghɔm Si dɑ shɑ gə pɑ siŋ cùŋ, biŋ dɑ shɑ gə mpyapdzə́, pɑ zhi'tə pɔ ywə

¹²E gə po'o gɑ pɔ dɔlɔ̌ ku' nə fa' fá' nə ŋkwɑ nə Kristo,

¹³po'o tə̌ pɑ la' nthamtə́ guŋ yɔk pɑ awɛ nthʉm piŋnthʉm, ba nə zhyə Mú Tá pa' pɔ pyə́ wap ku'nyə pɔ a, bɑ́ nthə́ Kristo nə guŋ lonyə awɛ.

¹⁴A gɔ pɑ́ po'o, pɑ̀ lə piŋ bɑ pomkəcɔkpo, pyə́ wap bvʉ mghə́ŋ mghə́ŋ a pɑ́, pɑ́ ghiŋ nə ŋkhɛ cwəpúŋ, bɑ shʉmjʉ̌m gùŋ mghɔm awɛ, pɔmnəŋ pu a mfʉ́ map pɑ dɑ wap fyə́, wap hɔ məjyə̀.

¹⁵Da' gɑ́ pɑ pɑ́ biŋ nwə nyənyɔ nthʉm ŋkhùŋnyə bɑ pɑ̌ gɔ kwyə́ nə guŋ ywə awɛ jʉ̌m mo yə e bɑ thə nwə: Kristo.

¹⁶A shyə m nə é tə guŋ nɑ́ awɛ pɑ nthamtə́ giŋ ŋkwi ŋkhɛ shyə m nə mzhəŋ myə́, bǎ ya zhə̀ŋ lə pɑ́ fa' tsyə fa' pa' a ku' nə e a, tə gùŋ nɑ́ awɛ nə ŋkwyə́, bɑ ŋkwɑ nthʉm ŋkhùŋnyə̀.

¹⁷Ywə yə gɑ̌ gɔm bi po biŋ bíŋ nə Cyəpɔ á yəŋ gɑ̀: Ka po kwi' bvɔk pa' pɑ tə pɑ̀ pɑ Yudea bvɔk a, wap pyə́ zhyənwə yáp dɑ wap gɔ m nə tsʉ' pɔpɔ a.

¹⁸Mkwɛnyə map bɑ pɑ ywə jʉ́m, wap piŋ bɑ mghʉɔ nə vɔk Si, shyə m̀ nə fʉmnyə̀ yáp yə tʉm sɔk sɔk tsap hɑ bi pú a

¹⁹Nthʉm nə cyətə́ sɛnwə yap, wap lě hɑ nɑ́ tsap nə nwə ghàp, tə guŋ ŋkho nə guŋ bɔkbɔk nwə tə dhə e.

²⁰Sɔ' m̀ nə po po la tə zhi'tə nə Kristo po'o pɑ̀.

²¹A ghɔ bɑ gɑ́ po lě jú' pu ghɔm pɑ́ kwa' yʉ bi po, bɑ gɑ́ pu lə́ zhi'tə pɑ́ kwa' yʉ́ bi po, ji'tə kwa' m nə nyənyɔ yə a bɑ́ nə Yeso a,

²²po kəŋnyə vɔk yɔ yə a lə bɑ a, yə a lə cyə a, sya bvo mò yə a bɔptə shyə m nə fʉtə ghi'nyə a.

²³Po sɑnyə̀, ŋkwyəpnyə zhyənwə yɔ shyə́ m nə zhwenyə.

²⁴Ŋkwa mo sə́ nə po pa' dzə́ a, mo yə pu pəm e pa' Si shəŋ a, nthʉm dəŋdəŋ ba dɔlɔ̌ yə a fɑ bi nyənyɔ.

²⁵Pǒ bɑ pú té cwanwə̀ nə po: bǎ wɑlə́ ghɔm pɑ nwə nyənyɔ bi mo yə e bəŋ e, nə pa' pɑ bɑ́ pɑ bǔ ta' nɑ.

²⁶Po yɛlúŋ, po kɑ́ hɔnwə; a nam kɑ́ nə pi po yɑwə jɛ́lúŋ.

²⁷Po kɑ hɑ sɔm sɔ̀ bi sata.

²⁸Mo yə e kɑ jʉ́ a wa' cwúŋ; e kaktʉɔ dɑ bu myə́ fa'fà' dəŋdəŋ tə́ gə ywə yə pu mo yə e ka ghə ywə a gɔ ghap a.

²⁹A sɔm ghɔ̀m bɔkpɔ̌k kɑ təm shwə̌ po, po pɑ gɔ ghɔmnwə po ghɔm pɑ́ nwə pɑpúŋ, ghɔm nə ŋkwɑ́, ghɔm tsyə a gɔ lɑ hwitə sɔ' bi pɔ pyə wap yu' ghɔm bɔ a.

³⁰Po kɑ ghə Zhwenyə Dɔlɔ̌ lǎ', Zhwenyə Dɔlɔ̌ yə Si lə nə gə mtiŋ nə po, pa' stam a nə nə byap tyɛ'dzʉ́ yə Si gɔ vɔk wɔk pɑ a.

³¹Nə səm, nə kam shɛ, nə yɛlúŋ, nə ŋa' gi, mcap mǐ cəcɑ̌ po, ba guŋ nthi nə cɔk awɛ.

³²Po ghə tʉ́m pɑpuŋ cəcɑ̌ po, po ghə tʉ́m pɑpuŋ, po pɑ́ dɑ mhɔ mɔ shwyɛ' wɔ cəcɑ̌ po dəŋdəŋ pa' Si bɑ e lɑ mhɔ mɔ shwyɛ' wɔ shyə m nə Kristo a.