Read Ghomala New Testament EFESO 5 Bible Online

EFESO 5 - Ghomala New Testament bible

EFESO 5

¹Po fo' Si nə pa' pǒ bɑ pó pyə é ŋkhùŋ wap a.

²Po vɔk nthʉm ŋkhuŋnyə dəŋdəŋ pa' Kristo lə kuŋ wɔk pɑ tə́ hɑ thə nɑ́ e bi Si pa' tsəpwɔ' a nə pɑ̀, pu lɑ é núŋpwɔ', pa' mwɑ́ damnyəlamnyə bɑ ǎ ghə zhwyə́ pɑpúŋ a.

³Sɔm nthi nwə ghap, kɑ bɔkbɔk nwə̀, kɑ ghi'nyə lə kɑ pɑ cəcɑ̌ po, yə̌ŋ bɑ pa' pɔ dɔlɔ̌ gɔ pɑ vɔk a.

⁴Ka po ghɔm ghɔm mnɔ̀m, kɑ ghɔm mkəkʉɔ̀, kɑ ghɔm mviŋ lə, nə pa' a ka puŋ po'o. Po hɑ nɑ tsɔ m̀ nə mcwyɛ'nyə gho'tə́.

⁵Nə pa' po cəŋtə́ jyə́ gɑ́ gə ghap, bɔkbɔk mò, dɑ ywə, yəŋ gámtə kətwɔk, pɔ bɔ bɑ pu tsə́ tě wap nə mcʉ̌' nthʉm Nəfo Kristo ba Nəfo Si.

⁶Ka sɔmmo lɑ mghɔm fʉ́ fʉtə wɔ́: Kwa' guŋ ywə bǎ nə fəŋ yɛ́luŋ Si nyəŋ nə pɑ tʉɔthə́.

⁷Ka pu a pú pɑ nə sɔmywə.

⁸Po lə bɑ dzə̀ bɑ pɑ jʉ̌m; tə́ cwəlɔ pǒ bɑ ŋkha' nə́ Cyəpɔ. Po vɔk pa' pǒ ŋkha' a.

⁹Mthɔ̌m ŋkha' bɑ cɔmmtsò, nwə dəŋdəŋ, nwə nyənyɔ́.

¹⁰Po zhyə ywə yə a buŋ bi Cyəpɔ a.

¹¹Ka po tamtə nə mfa' jʉ́m, mfa' tə yǎm nthɔ̌m, po pɑ nthé pɑ bya nə.

¹²Ywə yə pɔ bɔ gə m̀ càm a, a bɑ kuso nə ghɔm.

¹³Tə́ guŋ ywə yə pu la'tə ya a, ŋkha' da'tə ya.

¹⁴Nə pa' ywə yə pu da'tə a bɑ ywə ŋkhà', a bɑ po'o tə pu pɑ́ gɔm gɑ̀: Yam, wə yə o bɑwə di a. Lusi cəcɑ̌ mpfə pɔ̀ a Kristo ləŋnyə dəm o.

¹⁵Po cəŋtə́ diŋtə yɔ nə vɔk: Ka po ghə pu yɔ wɔ pa' mkəkʉɔ a, po pɑ pɔ pyə wap ghə zhyənwə a.

¹⁶Pɔ pyə́ wap tə bɔptə map mcwə dzʉ́ a pɑ́, nə pa' cwə dzʉ̌ ka puŋ.

¹⁷Ka po pɑ mkəkʉɔ, po cəŋtə́ jú' ywə yə Cyəpɔ jap a.

¹⁸Ka po nwə́ mlu' tə bám, a dɑ mo gɔ pɑ nə pi, da' gɑ po ló nə Zhwenyə.

¹⁹Po pɑ bəmtə́ gɔm mghɔm zhwɔp dɔlɔ̌ cəcɑ̌ po, bɑ jwɔp mzhwɔpshyə mku', ba mzhwɔpshyə́ zhwenyə; po pɑ jwɔp mzhwɔpshyə biŋ bɑ gu'tə Cyəpɔ nə guŋ tʉm tsɔ awɛ.

²⁰Nə gùŋ mcwə awɛ, nə gùŋ mnwə awɛ, po pɑ go'tə Si Tá shyə m̀ nə tsǒ Cyəpɔ yɔk pɑ Yeso Kristo.

²¹Wɔ pyə́ pǒ bwɔk Kristo a, po pɑ́ ju'nyə cəcɑ̌ po.

²²Pɑjwǐ po pɑ ju'nyə bi mthə́ pɔ pa' bi Cyəpɔ a.

²³Nə pa' dhə́ bɑ tadyə̌ bi mjwǐ dəŋdəŋ pa' Kristo bɑ tadyə̌ Cu'tə́ pɔ pyə á, yʉ́ yə e bɑ gɛvɔk cu'tə e a.

²⁴Tə́ dəŋdəŋ pa' Cu'tə́ pɔ Kristo ju'nyə bi Kristo a, pɑjwǐ pɑ́ nə guŋ ywə awɛ ju'nyə bi mthə́ páp.

²⁵Wɔ mthə́, po kúŋ pɑjwǐ pɔ dəŋdəŋ pa' Kristo lə kuŋ Cu'tə pɔ pyə tə biŋ hɑ vɔk e nə é á.

²⁶E lə shəŋ po'o nə ghə e pɑ dɔlɔ̌ tə́ dɑ shyə yə a sɔk ywə a lɔ a nə shu' é, po'o biŋ shyə́ m̀ nə́ Ghɔ̀m.

²⁷E lə shəŋ gɑ e nə yɔ e, e pɑwə dəŋnyə, tə pap sɔm mviŋ bɑ nə, tə sɔm mu ŋətə̀, tə sɔm bya.

²⁸A po'o tə mbɛ gɔ kuŋ jwi é kwa' pa' thə́ nɑ é a. Mo yə e ŋkhuŋ jwi é a ŋkhuŋ pɑ thə nɑ é.

²⁹Sɔmmo la m bɔ bap nɑ́ e; da' gɑ́ mo ŋkhim nɑ e kǐm, bɑ nyaptə e dəŋdəŋ pa' Kristo gə nə cu'tə pɔ pyə a;

³⁰pɑ tə́ bɑ mkam nɑ́ myə a lə́?

³¹A po'o tə mbɛ gɔ sɔ' təm nə tap e pu map e, a kwɑ nɑ e nə́ jwi e, a wap pɑpʉə piŋ bɑ́ pɑ ta' bap nɑ́ yɑmu'.

³²Yəŋ nwə cyə zhyənwə bɑ ǎ ghu': gɑ̌ ghɔm gɑ́ a bɑwə de Kristo pu a cu'tə pɔ pyə.

³³A bɑ po'o tə bǎ ya mo lə́ nə po gɔ pɑ kuŋ jwi e pa' thə nɑ e a, a mjwǐ nəŋ bɑ gə mku' dhə́ é.