Read Ghomala New Testament FILIPO 1 Bible Online

FILIPO 1 - Ghomala New Testament bible

FILIPO 1

¹Myə Polo pyə Timotio, mkwɔ Yeso Kristo, bi guŋ pɔ dɔlɔ̌ awɛ nə Yeso Kristo pyə wap Filipo a, bi pɑ lé wap pu a mghɛ fa' pap:

²A gho' ba hwitə̀ pɑ bi po shyə m̀ nə Si Tá yɔk pɑ̀ ba m̀ nə Cyəpɔ Yeso Kristo.

³Guŋ mcwə awɛ myə gɑ̌ ŋkhamtə́ wɔ a, gɑ̌ hɑ pa'lə́ bi Si a;

⁴nə pa' nə guŋ nə cwyɛ'nyə yə gɑ̌ shwyɛ'nyə nə po awɛ a, gɑ dɑ pɑ́ ŋwɛnyə̀ shwyɛ'nyə́.

⁵Gɑ̌ dɑ ŋwɛnyə shwyɛ'nyə́ po'o, a cyə m̀ nə́ dəŋ pa' po lə nə fa' yɔ́ nə Cuŋ pɑpúŋ tə fɑ́ nə́ dəŋdzə́ tyɛ'dzʉ́ gɔ ŋkhəm cwəlɔ a.

⁶Gɑ̌ cəŋtə́ jyə́ gɑ: Mo yə e lə to' fa' pɑpúŋ nə po a gɔ lɑ nə ghɔ dzə̀ tə la' myəŋ nə tyɛ'dzʉ́ Yeso Kristo.

⁷A bɑ nwə dəŋdəŋ bəm gɑ́ myə ghə tʉ́m pɑpuŋ nə guŋ yɔ awɛ, nə pa' po bɑ pɑ́ nthʉm tʉm m, wɔ pyə́ gɑ̌ nə pɑ dyəcɛ̌ piŋ pɑ lo'shù gɑ pu cəŋtə́ nthɔm Cùŋ pɑpúŋ po pɑ nthamtə yɔ nə gho' yə Si gə nə m̀ a.

⁸Əŋ, Si bɑ ŋkwinthɛ̌ a gɑ́ gɑ̌ byɛ'tə wɔ guŋ yɔ awɛ nthʉm ŋkhuŋnyə Yeso Kristo.

⁹Mcwyɛ'nyə mə̌ bɑ́ gɑ kùŋnyə yɔ pɑ gɔ pɑ́ dzə̀, po'o gɑ po zhyə nə yɔ biŋ jyə́ nwə nyənyɔ,

¹⁰tə́ jyə́ ywə yə a bɑ ǎ ku'nyə̀ a, po'o gɑ́ po sɔ' bɑ dɔlɔ̌, pu lə kyak wɔ nə sɔmywə nə tyɛ'dzʉ́ Kristo.

¹¹A pɑ́ tyɛ' o bɔ bɑ pǒ lo nthɔ́m nwə dəŋdəŋ myə a sɔ' bi pɑ̀, shyə́ m̀ nə Yeso Kristo nə́ nə gu'tə Si biŋ jwɔp tso tsyə́ a.

¹²Mfɑ̌mfɑ́, gɑ̌ shəŋ gɑ́ po zhyə gɑ́ nwə yə a nthəm nə m̀ a bɑ ǎ ghə pɑ gɑ́ Cùŋ pɑpuŋ ghɔ dzə̀.

¹³Nə pa' nə gùŋ buŋdyə̌ awɛ ba nə guŋ mtsʉ' awɛ cwəlɔ pu cəŋtə́ jyə́ gɑ́ pu gəm a po'o nə Kristo,

¹⁴ba bo'gwyə mfɑ̌ pyə cɛ a hɑ kaktʉɔ bi pu a wə nthégʉ' nə nə́ siŋ Ghɔm nə gɔ pɑ́ dzə̀ tə pwɔk sɔmywə.

¹⁵A nyənyɔ gɑ́ shɑ pɔ gə po'o m nə ghi'nyə pu a twɔ'nyə, da' gɑ́ pyə̀ shɑ́ pɑ́ sìŋ Kristo pɑ́ kwa' nə mkwɛnyə pɑpúŋ.

¹⁶Pɔ bɔ̌ fa' po'o m nthʉm ŋkhùŋnyə̀. Wap bɑ wap zhyə́ gɑ́ gɑ̌ bɑ́ tsɔ'ɔ gɑ́ bɑwə do' gɑ Cùŋ pɑpùŋ ghɔ dzə̀.

¹⁷Pyə shɑ́ pɔ bɑwə dɑ pɑ́ zhwenyə twɔ'nyə tə́ nə siŋ Kristo. Yap ywə yə a hɑ̀ gu' bi pu a tə́ pɑpuŋ pɑ́; wap bɑwə́ ŋkwɛ́ gɑ́ wap gɔ ghə cɛ́ a cəŋtə́ dzɑ́ a.

¹⁸Da' gɑ́ a tə́ shɛ pɑ́? Nwə̌ wə bɑ́ gɑ́ kɑ́ nə mkwɛnyə cwəpùŋ kɑ myə pɑpuŋ lə pú siŋ Kristo bi pɔmnəŋ. A ywə yə gɑ̌ ŋwɛnyə nə nə́ gɔ dzə̀ a.

¹⁹Nə pa' gɑ̌ zhyə gɑ́ ywə bɔ gɔ sɔ' miŋ nə ywə vɔk á, shyə m nə mcwyɛ'nyə mɔ ba m̀ nə zhwenyə Yeso Kristo.

²⁰Kwa' pa' gɑ̌ wə nə byap ba nə́ yɑ mɔktə a, sǒ tə́ gɔ sɔ' kú a pɑ́, nə pa' gɑ̌ wə shəŋtə́ jyə nə pa' cwəlɔ nɑ a gɔ nyə́ŋ dəŋ nə Kristo cyə m nə vɔk a kɑ nə vʉ́ tsɑ̌ lə́.

²¹Nə pa' sɔ' m nə́ m̀, vɔk bɑ Kristo vʉ̌ nə́ŋ bɑ bəm bɑ yɑ pè.

²²Da' gɑ́ a pɑ̀ gɑ́ nə vɔk dəmcǎ' po'o gɔ ghə gɑ́ fa' ghɔ́ dzə̀, bɑ ŋ kha zhyə yə ghə̌ŋ yə gɑ gɔ cwɔ' a

²³Gɑ si cwəlɔ mnwə mɑbʉə pɑwə fəŋnyə a: gɑ bɑwə sʉm nə ghɔ gɑ pyə Kristo pɑ bəmtə bɑ, a pɑ kwa' yə gɑ̌ wə dəŋdzə shəŋ a,

²⁴da' gɑ shyə m nə thə́ yɔ dzə̀ pɑ gɑ shwə pɑ dəmcǎ'.

²⁵A po'o tə bɑwə jyə gɑ́ ŋ tə gɔ wuŋ ghɔ pɑ́, gɑ́ gɑ gɔ pɑ cwə pɑ bəŋ po, guŋ yɔ awɛ po'o gɑ po kaktʉɔ nə piŋnthʉm, ba nə ŋwɛnyə̀ nthʉ́m piŋnthʉm.

²⁶Po'o gɑ a cyə m nə m̀ cwə yə gɑ̌ pɑnyə bə́ŋ po a, yɔ nə ghu'tə Yeso Kristo ghɔ dzə̀.

²⁷Da' gɑ́ po vɔk nthi vɔk yə a ku'nyə nə Cuŋ pɑpúŋ Kristo a, po'o gɑ ŋ dá sɔ́' pɑ́ nə yɔ wɔ́ kɑ nthak tak lə, nwə yə pɑ́ ju' pu ghɔm nə po a, a pɑ́ pɑ́ gɑ́ pǒ wə nthɔm a tʉɔ nthʉm ta' zhwenyə yɑmu', bɑwə bəmtə́ dɑ ta' tʉ̌m tsɑmu' do' kwa' pa' ǎ pùŋ nə piŋnthʉm nə Cuŋ pɑpúŋ a;

²⁸po lə piŋ gɑ mghɛ bo hɛ wɔ nə sɔmywə, a pɑ́ bi pu bɑ mtiŋ gɑ wap gɔ simnyə, biŋ bɑ bi po bɑ mtiŋ ywə vɔk yɔ́: a fɑ m bi Si

²⁹nə pa' a bɑ Si ghə gho' nə po shyə m nə Kristo tə da' gɑ pǒ piŋ é pɑ, ba m gɑ́ po yɔgo' nə e.

³⁰Bɑ do' pɑ nthi shù yə po jɔ́ ŋ bɑwə do'; bɑ pǒ nəŋ jyə gɑ́ gɑ ŋ gɔ tə kwi' lo' a.