Read Ghomala New Testament FILIPO 2 Bible Online

FILIPO 2 - Ghomala New Testament bible

FILIPO 2

¹A pɑ́ gɑ Kristo nyəŋ gʉ' nə pɔ, bɑ gɑ ŋkhuŋnyə hɑ kaktʉɔ bi po, bɑ gɑ zhwenyə tamtə wɔ, bɑ gɑ po ghə cɔ̌mmtso cəcɑ̌ po,

²a pɑ nə po po'o, po kwi' yɑ ŋwɛnyə shyə m nə́ nə vɔk nə ta' ŋkhɛ. Po ghə pɑ́ ta' ŋkhuŋnyə yɑmu', gə pɑ́ ta' tʉ̌m; po cəŋ nthamtə;

³ka po lɑ twɔ'nyə nə gə sɔmywə kɑ ŋǎ'nɑ lə; da' gɑ́ po cyə́ m nə nə fi'nɑ hɑ si bɑ jɔ pyə shɑ pɔ pa' pɔ pyə wap m̀ dzə̌ po a.

⁴Ka mo pɑ jɔ pɑ da' yə́ nwə, e pɑ jɔ ba yə́ pyəshɑ pɔ.

⁵Po pɑ bvɔk po'o cəcɑ̌ po pa' pú bvɔk nə Yeso Kristo a:

⁶Yʉ́ yə e bɑ̀ pa' Si a, la' e yɔ gɑ a mɑ nwə tə' nə pɑ̀ dəŋ pa' Si a.

⁷E lě nthé guŋ e bɔ awɛ nə e dɑ vɔk e pa' ŋkwɔ a bʉɔ shʉ' pa' pɔmnəŋ a biŋ shyə m pa' e lə bɑ a pu yɔ e pa' monəŋ a;

⁸E lě fi'nɑ́ e hɑ si, ju'nyə yu'nyə tə ŋkho nə vʉ̌ vʉ́ bɛnyəpɛnyə.

⁹A ywə yə a lə ghə Si ŋa' e hɑ tə thə́ biŋ hɑ tso tsyə ǎ cyə guŋ mtso awɛ a bi e.

¹⁰Po'o gɑ nə tsǒ Yeso, guŋ mkwi'tə awɛ pɑ ŋwɔ' thə kɛbəŋ, dəmcǎ', ba m̀ nthʉ̌m ca'.

¹¹A ba guŋ mghɔm awɛ pɑ biŋ gɑ́ Yeso Kristo bɑ Cyəpɔ nə nə gu'tə Si Tá.

¹²A po'o tə wɔ pyə gɑ̌ ŋkhuŋ wɔ a, wɔ pyə po ju'nyə́ bi Si tə ŋkhəm cwəlɔ a, po kɑ́ yu'nyə pɑ da' cwə yə gɑ̌ si a pɑ́, po cəŋtə ju'nyə cwəlɔ yə ŋ tə si a pɑ́; po lɑ nə pwɔk pu a nə səŋ nə fa' nə́ ywə vɔk yɔ́.

¹³Nə pa' Si nə gə tə nə́ cə́ŋ ba nə ghə pɑ́ nə po pa' e nə jap a.

¹⁴Po ghə guŋ ywə awɛ tə vàmtə̀, tə́ fəŋnyə.

¹⁵Po'o gɑ pu kɑ kyak wɔ nə sɔmywə, po kɑ pɑ nə mnthaknyə, wɔ pyə́ pǒ bɑ́ po Si tə sɔm pap mviŋ nə po, cəcɑ̌ pɔ nə wɔ̌dzʉ́ cwəpuŋ pu nwə bɔkpɔ̌k, wɔ̌dzʉ́ yə pǒ gɔ pɑ́ nə pɑ pa' msa'sǐ ŋkha' nthʉm dzʉ̌ a,

¹⁶wɔ pyə pǒ ŋkwa Ghɔm vɔk a: a bɑ ghu'tə a nə tyɛ'dzʉ Kristo, nə pa' a tə bɑ gɑ̌ khʉdʉ́ pɑ něné pɑ́, ŋ də nəŋ jɔgo' pɑ pɔpɔ.

¹⁷Bi a mcyə́ mə̌ pɑ gɔ pfyə́ pɑ si pa' tsə pwɔ' a ba m̀ nə́ fa' piŋnthʉm yɔ, bɑ ǎ puŋ a, ŋ biŋ bɑwə ŋwɛnyə, ba guŋ yɔk pɑ awɛ.

¹⁸Ba wɔ yɔ po ŋwɛnyə pɑ pəmtə ŋwɛnyə.

¹⁹Gɑ̌ wə mɔktə́ shyə́ m̀ nə Cyəpɔ Yeso gɑ́ gɑ̌ gɔ təm Timotio bi po, po'o gɑ́ mcuŋ myə́ gɑ gɔ yu' nə po a na' ŋkwi' gʉ' nə m̀.

²⁰Ŋ kha piŋ gə sɔmmo yə e wə giŋ nə mkwɛnyə mə̌ a, sɔmmo yə ě wə shəŋtə sɔlam nə ywə yə ǎ wə dé a a.

²¹Guŋ pyə shɑ pɔ awɛ wə sɔlam pɑ́ nə yap nwə̀, wap tə̌ wə sɔlam nə yə́ Yeso Kristo pɑ̀.

²²Da' gɑ sɔ' m̀ nə yʉ́ Timotio bɑ pǒ tsə zhyə dəŋ mfa' myə́: dəŋdəŋ pa' mú bəŋ tap e a, e tamtə nə m̀ nə fa' nə Cùŋ pɑpúŋ.

²³A yʉ́ tə́ gɑ wə sɛ nə təm e bi po nə cwə yə gɑ gɔ zhyə kwa' pa' pu gɔ ghə nə m̀ a.

²⁴Ba kwa' myə wə́ shəŋtə jyə́, shyə́ m̀ nə́ Cyəpɔ gɑ̀ kwa' myə gɑ̌ wə gɔ sɔ' wuŋ sɔ' wə po.

²⁵Da' gɑ̌ yɔ gɑ́ ǎ puŋ gɑ́ nthəm fɑ́ a Epafrodito bi po, yʉ́ yə e bɑ só fa' a biŋ bɑ so shù a, yʉ́ yə po lə təm e bəm gɑ e pɑ̀ ŋkwitə a nə cwə yə a lə bɑwə shəŋ po' a.

²⁶Nə pa' nə pìŋ jɔ wɔ lə bɑwə nthəŋ e te', nə pa' a lə paknyə e nə zhyə gɑ pǒ zhyə gɑ ě gho.

²⁷A nə pɑ̌ po'o bɑ e lə ghǒ tɑ́ bvɔk vʉ́, da' gɑ Si cɔmmtso myə, tə da' myə́ pɑ́, ba mə̌, po' gɑ́ ŋ khɑ́ tə̌m nə go'o, ŋkho nə go'o.

²⁸Gɑ̌ do'nyə nə cya e bi po po'o gɑ́ po ŋwɛnyə́ nə yɔ e, ba myə piŋ na' jwenyə yɑ nə go' a.

²⁹Po cyə́ m̀ nə Cyəpɔ dɑ kwa' ŋwɛnyə dɑ e, biŋ ŋkhúŋ nthi pɔ pa' yʉ a

³⁰nə pa' a bɑ é lě bɑ́ gɔ pfʉ́ nə fa' Kristo; e lə́ yap vɔk e nə tsʉ' yə pɑ ywə ghə e a, po' tə nə gə ywə yə a lə bɑ kwa' wɔ ka ku' nə ghə bəm a.