Read Ghomala New Testament KOLOSAI 1 Bible Online

KOLOSAI 1 - Ghomala New Testament bible

KOLOSAI 1

¹Myə Polo, gɛ nthəm Yeso Kristo shyə m̀ nə́ pa' Si nə jap a, ba Timotio fɑ a,

²bi pɔ dɔlɔ̌ pyə́ wap Kolosai, mfɑ̌ pyə wap biŋ Yeso Kristo a. A gho' ba hwitə pɑ́ bi po shyə́ m̀ nə Si, Tá yɔk pɑ.

³Pyə̌ wə go'tə Si Tá Cyəpɔ yɔk pɑ Yeso Kristo nthʉ́m mcwyɛ'nyə myə́ pyə tə bwa nə hɑ bi e nə po a pɑ.

⁴Nə́ pa' a bɑ pyə̌ yu' nwə piŋnthʉm yɔ nə́ Yeso Kristo ba ŋkhuŋnyə yɔ nə pɔ dɔlɔ̌,

⁵shyə m̀ nə́ mɔktə yə a wə byap wɔ kɛbəŋ a; mɔktə bɔ bɑ ghɔm nyənyɔ nə lə siŋ wɔ yá,

⁶Cùŋ pɑpuŋ yə a lə sɔ' tə ŋkhə́m bi po a; dəŋdəŋ pa' a bɑwə jam nthɔ́m biŋ bɑwə ŋkwyə́ nthʉ́m guŋ dzʉ́ awɛ a, a bɑwə gə pɑ́ po'o cəcɑ̌ pó tə fɑ́ tyɛ'dzʉ́ yə po lə kwǐ biŋ jyə́ gho' Si nthʉm nyənyɔ a,

⁷Shyə́ m̀ nə́ ywə yə Epafra lə zhi'tə wɔ a; yʉ́ yə e bɑ só fa' yɔk, biŋ bɑ bəŋ thə́ yɔk kwa' pɑpúŋ pa' gɛ nthəm Kristo a,

⁸e cəŋtə siŋ wɔk kwa' pa' Zhwenyə bɑwə gə po tʉɔ a.

⁹A po'o tə nə́ yɔk ghə́ŋ, bɑ tə́ fɑ́ tyɛ'dzʉ́ yə pyə lə́ yu' a, pyə lə pɑ́ bwa nə cwyɛ'nyə̀ Si nə po. Pyə̌ dó bi Si gɑ́ po cəŋtə́ jyə́ ywə yə e shə́ŋ a, guŋ fʉ́ awɛ ba zhyənwə yə a fɑ nə zhwenyə e a,

¹⁰po'o gɑ́ po vɔk vɔk yə ǎ ku' bi Cyəpɔ a, bɑ shə́ŋ pɑ́ ywə yə ě piŋ a. Pǒ gɔ pɑ́ fa' pɑ́ mfà' myə a bɑ myə pɑpúŋ a, a piŋ bɑ ŋkwyə́ nə guŋ mnyə awɛ, a po piŋ dɑ nə zhyə́ Si nə gɔ pɑ́ dzə.

¹¹Gʉ' ghu' Si gɔ nyəŋ gʉ' nə po, po pɑ ŋkhaktʉɔ, bɑ ŋkhyəp tʉm tsɔ́ nə guŋ go' awɛ.

¹²Po lɑ ŋwɛnyə̀ go'tə Tá yə e bíŋ gɑ po ghə yɔ tsʉ' nə mcʉ̌' pɔ dɔlɔ̌ nthʉm ŋkha' a.

¹³E bɑ e lě ŋkwi wɔk pɑ bi gʉ' jʉ̌m biŋ shya wɔk pɑ nthʉ́m nəfo Mú ŋkhuŋnyə é,

¹⁴yə é shyə m nə é ŋkwi wɔk pɑ bi mnwə cwəpuŋ dɑ mhɔ mɔk pɑ shwyɛ' wɔk pɑ a.

¹⁵E bɑ fo' Si yə pu tə́ jɔ e a pɑ, thəsə mu nə guŋ ywə awɛ yə Si lə ghə a.

¹⁶Nə pa' Si lə nyaptə guŋ ywə awɛ m nə é kɛbəŋ ba m̀ dəmcǎ', tsə́ tsyə pu jɔ a ba tsyə pu tə́ jɔ a pɑ́. Guŋ mtʉɔ zhwenyə, pɑ sa' dzʉ̌ pu a gʉ' nə sa'dzʉ́. Yʉ́ nə́ nyaptə guŋ ywə awɛ, guŋ ywə awɛ pɑ yə́,

¹⁷Yʉ́ nə́ biŋ bɑ́ dzə nə guŋ ywə awɛ; guŋ ywə awɛ bɑwə cwəlɔ pɑ́ nə é;

¹⁸yʉ́ nə́ biŋ bɑ thə́ nə nɑ́ yə a bɑ Cu'tə pɔ Kristo a. E bɑ́ nə nə́ ntho' thə́sə mu nə nə yam nə vʉ̌ po'o gɑ e pɑ nə guŋ ywə awɛ bɑ́ pɑ́ də̀ŋdzə.

¹⁹Nə pa' a bɑ a lě buŋ bi Si gɑ yʉ Si gɔ pɑ nə mu e tə miŋ.

²⁰Biŋ gwɔ'bvɑnyə nə guŋ ywə awɛ shyə m̀ nə e dəmcǎ', ba m̀ kɛbəŋ dɑ mcyə bɛnyəpɛnyə e jap hwítə.

²¹Ba wɔ pyə́ pó lə bɑ́ mghʉɔ, wɔ pyə́ mfa' mɔ myə́ cwəpuŋ lə dɑ pɑ́ shɛ sɔ' a,

²²ǎ yɑ́ bɑ Si cyə m̀ nə nɑ́ Mu é yə a bɑ nɑ vʉ̌ a, gwɔ'bvɑnyə cəcɑ̌ po shyə m nə vʉ́ e, po'o gɑ po sɔ' ŋwak dzə̌ é bɑ dɔlɔ̌, pɔ tə bya, pyə pɑ mo lə kam wap a.

²³Da' gɑ́ po cyə́ m̀ nə piŋnthʉm nthɔ́m, nthʉ̌ɔ, po kɑ səŋ, po kɑ pǐŋ gɑ́ mo fʉ'tə wɔ nə mɔktə yə po lə ghə shyə m nə Cùŋ pɑpúŋ yə po lə́ yǔ', yə pu lə sǐŋ bi guŋ pɔ awɛ mto kɛbəŋ, yə myə Polo bɑ gɑ̌ cʉ' gɛfa' nə a.

²⁴Gɑ wə jɔ yɑ ŋwɛnyə̀ cwəlɔ nə gǒ' yə gɑ̌ wə jɔ nə po á, a piŋ bɑ po'o, ywə yə a bɑwə jak nə ghəghʉɔ Kristo a, gɑ wə miŋ yá nə bap nɑ́ a, nə́ nə ŋkhúŋ nɑ́ é yə a bɑ Cu'tə pɔ Kristo a.

²⁵Gɑ̌ bɑ gɑ̌ zhi gɛfa' shyə m̀ nə fa' tsyə́ Si jap a nə́ nə po a: Fa' bɔ pɑ nə miŋ nə siŋ Ghɔm Si,

²⁶nwə cyə́ zhyənwə yə pu lə la' dʉ́m ya tə fɑ tə tyɛ̌', mgu'mgu', a piŋ bɑ tyɛ' ɔ bɑ Si la'tə yá bi pɔ dɔlɔ̌ pyə́ a.

²⁷E bɑ ě yɔ gɑ́ e gɔ ghə̌ wap zhyə́ dəŋ fʉ' ba ghu' nwə cyə zhyənwə bɔ cəcɑ̌ pɑ tə pɑ́ pɑ Yudea, a pɑ́ gɑ́ Kristo bɑ cəcɑ̌ po, bɑ mɔktə ghu'tə.

²⁸A bɑ yʉ́ Kristo tə́ pyə̌ siŋ é bi pɔmnəŋ, bɑ siŋ gɑ bǎ ya mo lə pɔmtə́, bɑ dɑ fʉ́ nthɔk bǎ ya mo lə, po'o gɑ bǎ ya mo lə pɑ́ dɔlɔ̌ shyə m nə Kristo.

²⁹A bɑ ywə yə gɑ̌ fa' nə a, ywə yə gɑ̌ dɑ gʉ' Kristo yə a fa' nə m̀ a nə do'shù nə a.