Read Ghomala New Testament KOLOSAI 2 Bible Online

KOLOSAI 2 - Ghomala New Testament bible

KOLOSAI 2

¹Gɑ̌ shə́ŋ gɑ́ po zhyə́ shu nthʉɔtʉɔ yə gɑ̌ do' nə po a, nə pɑ Laodikia, ba nə bo'gwyə́ pɔ pyə wap la m jɔ kwa' myə a.

²Gɑ̌ shəŋ po'o gɑ wap ghə kaktʉɔ nthʉm tʉ́m pú, biŋ nthamtə nthʉ́m ŋkhuŋnyə, shə́ŋtə́ gə yap zhyənwə nə jyə́ nwə cyə zhyənwə yə a bɑ yə́ Si a:

³Kristo yə a bɑ guŋ fʉ' ba guŋ fʉ́ awɛ bɑ ǎ tʉmnyə nə é, ba zhyə̌nwə a.

⁴Gɑ̌ gɔm po'o gɑ ka sɔmmo lɑ shɑ mghɔm pɑpúŋ fʉtə́ wɔ.

⁵Gɑ̌ wə la' bɑ cəcɑ̌ po nə bə̌ŋ nɑ a, da' gɑ pɑ nə bəmtə́ bɑ nə zhwenyə, bɑwə́ ŋwɛnyə nə yɔ́ gɑ pǒ wə nthɔm yɔ tsʉ' kwa' pɑpúŋ, piŋnthʉm yɔ nə Kristo piŋ bɑwə dɛ́tə́.

⁶Po pɑ dɑ yɔ nə ghiŋ jʉ̌m Kristo Yeso yə e bɑ Cyəpɔ a nə gɔ pɑ́ dzə, pɑ kwa' pa' po lə nə ŋkwi e a.

⁷Po cə́ŋ mgɛ biŋ ŋkwɑ vɔk yɔ nə e, biŋ shəŋtə́ gə́ piŋnthʉm pɑ kwa' pa' pu lə nə ji'tə wɔ a, bɑ go'tə tə dhə.

⁸Po pɔmtə́ nə vʉ nə yo' msɛnwə, yə a bɑ pɑ fʉtə, bɑ pɑ nwə nə mà pɔmnəŋ, bɑ pɑ nwə gʉ' dzʉ́, la' a pɑ́ mnwə Kristo a.

⁹Nə pa' guŋ pa' Si nə bɑ a bɑ ǎ lonyə nə yʉ́ Kristo nə nɑ é,

¹⁰ba wɔ yɔ pɑ́ bɑ pǒ lonyə nə mo yə e bɑ tadyə̌ nə guŋ nə sa'dzʉ́ ba nə guŋ tʉɔ awɛ a.

¹¹Pǒ shyə́ m nə e bɑ pɔ pyə́ a bɑ pu vó wap m nə yə nthi nə vo mo yə pǔ mo tə bɑ nə a pɑ́, bɑ yə bɔ nə vo mo lě sya nɑ bap yə a bɑ nə po a: A bɑ yə nə vo mo Kristo.

¹²A bɑ pu lě bəmtə́ nthə́ŋ wɔ po a pú nthʉ́m kwishyə, po a pú piŋ bəmtə́ jam nə vʉ̌, nə pa' a bɑ pǒ piŋ gʉ' Si yə a lə yam é nə vʉ̌ a.

¹³Biŋ sɔ' m nə wɔ pyə́ a lə bɑ pǒ pfʉ́ shyə́ m nə mhɔnwə mɔ ba m̀ nə pa' a lə bɑ pu ka vo wɔ nə bapnɑ yɔ a, Si bɑ ě hɑ vɔk bi po a pú: E bɑ ě lɑ mhɔ mɔk pɑ shwyɛ' wɔk pɑ.

¹⁴E lě gə ŋwa'nyə nə butə wɔk pɑ mi. Ywə yə mco' lə nə butə wɔk pɑ á e lě gə a símnyə. E lě ŋkham yɑ́ thə́ bɛnyəpɛnyə.

¹⁵E lě gə pɑ sa' pu a yap nə sa' lə piŋ bɑ sɔmywə, ŋkwi gʉ' nə sa' pu a mtʉɔ zhwenyə bi pú, dɑ wap shyə sim, fə́ŋ wap si nə ŋkhɛ pɑ cyə́shù bɛnyəpɛnyə.

¹⁶Tə fɑ po'o, sɔmmo kɑ piŋ nyəŋ shɛ thə po nə nwə ywə tsʉ́ kə nə ywə nwə́nwə̌ kə nə cwə la'nwə nə thə́ ŋwə́, kə nə sabat lə.

¹⁷Guŋ tsə bǎ awɛ bɑ pɑ́ ciŋnyə ywə yə a lə́ bɑ gɔ la' sɔ' a; da' gɑ kwa' ywə bɔ nyənyɔ bɑ m̀ nə́ Kristo.

¹⁸Ka po piŋ gɑ zhwənyə ko nə po shyə m nə yə nə cyəshú pɔ pyə́ wap ŋkhak yap tʉɔ pɑ nə cu'tə nə se pɑ aŋgəle a. Wap ŋkho pɑ nə mkwɛnyə nwə map, bɑ ŋa'tə pɑ nə zhyə̌nwə monəŋthə́ yap.

¹⁹Wap tə́ bɑ wap kwɑ nə Kristo yə e bɑ thə́ nə nɑ, guŋ nɑ awɛ yə mzhəŋtə́ pu a gɛ bɑ nə, a pɑ ŋkwyə m nə ŋkwyə yə Si hɑ a pɑ́.

²⁰Cwə yə a bɑ po a Kristo pfʉ́, a piŋ bɑ́ bɑ pǒ təm nə mnwə gʉ' dzʉ́ a, nwə kɑ po piŋ giŋ nə nthinthi mco' dzʉ́ pa' cwə yə vɔk yɔ jɑwə bɑ m nə dzʉ̌ a?

²¹Nə ghɔm gɑ: Kɑ pě ywə ki, kɑ zhwi'tə́ ywə ki, kɑ kwak ywə ki,

²²guŋ é awɛ po'o nə tsə́ simnyə sǐmnyə; a pa' a bɑ pɑ́ mco' pɔmnəŋthə́ pu a mnwə map.

²³A pɑ gɑ tsə bǎ hwə́ fʉ́: Nə piŋ, nə kaktʉɔ nə piŋ, nə zhyə̀ nə tsʉywə, sɔm nwə nthʉɔ tə bɑ nə pɑ́, a ŋkwitə pɑ da' nə nə gə gɑ bap nɑ́ pɑ ŋwɛnyə.