Read Ghomala New Testament KOLOSAI 3 Bible Online

KOLOSAI 3 - Ghomala New Testament bible

KOLOSAI 3

¹Pa' a bɑ po a Kristo yám nə vʉ̌ a, po cə́ŋ pɑ ywə yə a bɑ m thə́, tsʉ' yə Kristo bɑ nə, bɑ ě cwə nə ghə́ŋ tʉɔ Si a.

²Ywə yə pǒ shəŋ a bɑ m thə́, a tə bɑ m̀ sǐ dəmcǎ' pɑ́.

³Nə pa' a bɑ pǒ pfʉ́, vɔk yɔ pu Kristo pɑ́ bɑ ǎ tʉmnyə nə Si.

⁴Cwə yə́ Kristo yə e bɑ vɔk yɔ a gɔ sɔ' tə́m pu yɔ e a, ba wɔ yɔ po a pu pəmtə nthəm pu yɔ wɔ po a pú nə ghu'.

⁵Po ghə ywə yə a bɑ nə po bɑ yə́ dəmcǎ' a, a pfʉ́: Nwə ghap, mvíŋ, nə yap tʉ̌m nə ywə, nə cəŋ ywə bɔkpɔ̌k, ba ghi'nyə yə a bɑ nə ghamtə kətwɔk a.

⁶A bɑ ywə yə a gə Si yɛluŋ a.

⁷A bɑ pa' po lə giŋ a, bɑ vɔk yɔ cwə bɔ.

⁸Kwa' cwəlɔ ba wɔ yɔ təm nə tsə bɔ: nə yɛlúŋ, nə kamshɛ, nə tʉm shɔkcɔ̌k, nə mcaptə pu a mghɔm nɔm myə a nthəm shwə̌ po a.

⁹Cwanwə kɑ́ piŋ bɑ cəcɑ̌ po nə pa' a bɑ pǒ sya bvo mo nə pó pu a mgənyə nwə myə́,

¹⁰biŋ ŋkwa mo sə́ nə po, mo yɑ yə e nə kəm nə zhyə̌nwə bɑ ŋkwyəpnyə guŋ mcwə awɛ pa' gɛ pəm é a.

¹¹A bɑ nə́ pu lə piŋ bɑ jyə́ yə Grikia kə yə Yudea lə, kə mo yə pu vo e kə mo yə pu ka vo e a lə, kə gʉɔ, kə yə Skita lə, kə ŋkwɔ kə tə pɑ ŋkwɔ lə; pu jyə da' Kristo, e pɑ guŋ ywə awɛ bi guŋ pɔ awɛ.

¹²Pa' a bɑ Si ci wɔ, dɔnyə́ wɔ, ŋkhúŋ wɔ a, po ghə tʉm cɔmmtso, tʉm nwə pɑpúŋ, gə nə fi' nɑ́ hɑ́ si, tʉ́m bwatə pwatə gə nə kyəp tʉ̌m.

¹³Po pɑ bəmtə́ ŋkwa mnwə mɔ cəcɑ̌ po, bi a pɑ gɑ́ mo la' fɑ e nə ywə, po lɑ mhɔ mɔ́ shwyɛ' wɔ wɔwɔ; dəŋdəŋ pa' a bɑ Cyəpɔ lɑ mhɔ mɔ́ shwyɛ' wɔ a, ba wɔ yɔ́ pɑ́ ghə pɑ po'o.

¹⁴Nə guŋ e awɛ po ŋkwa ŋkhuŋnyə nə po pa' dzə́ a; a bɑ dʉ̀ dɔlɔ̌.

¹⁵A hwítə Kristo yə pu lə kě wɔ nə nə́ gə ta' nɑ́ a pɑ sa' mtʉm mɔ́. Po vɔk nthʉm gho'tə.

¹⁶A Ghɔm Kristo pɑ shwə́ cəcɑ̌ po nə guŋ fʉ' yə a bɑ nə́ awɛ: Po pɑ ji'tə biŋ bɑ nthɔknyə wɔwɔ nə fʉ̌, po pɑ jwɔp nə go'tə Si nthʉm mtʉ́m mɔ, jwɔp mzhwɔp ghamtə ba mzhwɔp myə a fɑ m̀ bi Zhwenyə a.

¹⁷Bǎ kə́lə́ yə pɑ́ po ghə kə gɔm a lə, po ghə pɑ nə́ tsǒ Cyəpɔ Yeso, bɑ shyə m nə e go'tə Si Tá.

¹⁸Pɑ jwí, po yu'nyə mthə́ pɔ́ dəŋdəŋ pa' pu ju'nyə bi Cyəpɔ a.

¹⁹Mthə́, po kuŋ pɑjwǐ pɔ, po kɑ pɑ̌ gə tʉm shɔkcɔ̌k nə pu.

²⁰Pɑkhʉ, po pɑ́ ju'nyə bi pɑ tsə wɔ nə guŋ mnwə awɛ. Yə̌ŋ bɑ ywə yə Cyəpɔ bɑwə byap bi po a.

²¹Pɑ tsə́ pó, ka po pɑ dwɔp luŋ po pɔ́, po' gɑ wap kɑ pwa.

²²Mkwɔ, po pɑ ju'nyə́ bi mtá pɔ nə bap nɑ́. Po kɑ fa' bi pu m pa' pu wə dé wɔ a kə m pa' po shəŋ nə puŋ pɔmnəŋ a lə, po fa' bi pu m pa' pɔ pyə wap bwɔk Cyəpɔ a.

²³Fa' tsɔ pɑ pɑ́ gɑ́ kə́lə́ po lɑ tʉ́m pɑpúŋ fa' a, fa' pa' pǒ fa' m bi Cyəpɔ a, po kɑ fa' m pa' bi pɔmnəŋ a.

²⁴Po zhyə́ gɑ pǒ gɔ sɔ' kwi mcwɔ'fa' bi Cyəpɔ pa' mcʉ̌' a. Tá fa' bɑ Kristo; po fa' pa' a m bi e.

²⁵Mo yə e da'tə pɑ nwə yə a tə́ dəŋdəŋ a pɑ́ gɔ sɔ' kwi mcwɔ'fa' nwə yə a tə dəŋdəŋ a pɑ, a bɑ pɑ po'o tə la' a tak sɔmmo.