Read Ghomala New Testament 1 TESALONIKA 2 Bible Online

1 TESALONIKA 2 - Ghomala New Testament bible

1 TESALONIKA 2

¹Kwa' wɔ cəŋtə jyə mfɑmfɑ́ gɑ po lě tə lɑ wɔk pɔpɔ.

²Nə pa' pǒ cəŋtə jyə gɑ́ cwə yə pyə lə lu m̀ nə yɔgǒ' Filipo, pu pɑ jəmtə wɔk a, Si yɔk pɑ̀ hɑ́ gʉ̌' bi pyə́ nə́ nə siŋ Cuŋ pɑpúŋ é bi po nthʉ́m nthinthi ŋkwà.

³A du gɑ́ ghɔm tsɔk tə́ bɑ ghɔm fʉmnyə pɑ, a lə pɑ nthəm m̀ nə nwə mvíŋ, a lə pɑ nwə fʉ́tə.

⁴Nə pa' a bɑ Si lě shə́ŋtə de wɔk tə́ hɑ Cùŋ pɑpúŋ bi pyə; ǎ po'o tə pyə̌ nə siŋ Cuŋ pɑpuŋ bɔ. Pyə tə́ shə́ŋ m nə́ pùŋ pɔmnəŋ pɑ. Pyə̌ shə́ŋ nə puŋ pɑ Si yə e jyə mtʉ́m mɔk pɑ a.

⁵A po'o tə́ pyə la m̀ gɔ́m ghɔm pyɛ'tə, pyə lə nəŋ gə mkwɛnyə fʉ' tə bɑ pǒ zhyə́, Si wə bɑ ŋkwinthɛ̌.

⁶Pyə la m̀ nə́ŋ shə́ŋ mku' bi pɔmnəŋ kɑ m̀ wə po kɑ m wə pyə shɑ pɔ lə.

⁷A nəŋ nə pɑ̌ po'o bɑ pyə lə ghə̌ nə hya wɔ pa' mghɛ nthəm Kristo a. Da' gɑ pyə lě dɑ pɑ byanyə́ nə bɑ cəcɑ̌ po, dəŋdəŋ pa' má mú shu'tə po pyə́ kəkɔp é a.

⁸Pyə lə kǔŋ wɔ kuŋ tə guŋ bɑ́ gɔ pyə lə hɑ da' Cuŋ pɑpúŋ Si bi po pɑ, pyə lə bɑ gɔ hɑ ba vɔk yɔk nə po nə pa' po lə bɑ́ bi pyə bɑ́ kwa' ywə tʉɔdəŋ.

⁹Mfɑmfɑ́, pǒ wə ŋkhamtə́ go' yɔk pu a pwa yɔk; nə pa' pyə lə fa' mtsʉ' ba m mɔkcʉ po'o gɑ́ pyə kɑ́ tsɑ sɔmmo nə́ po. Pyə lə fa' po'o tə nə siŋ Cuŋ pɑpúŋ Si bi po.

¹⁰Pǒ wə́ bɑ́ mkwinthɛ, ba Si kwi' bɑ ŋkwinthɛ̌ gɑ pyə lə ghǐŋ dzə̌ wɔ pɑ piŋ pɑ dɔlɔ̌, giŋ dəŋdəŋ, tə bya.

¹¹Pǒ nə́ŋ jyə gɑ́ pyə lə fa' bǎ nə ya mo lə́ nə po pɑ́ pa' tá fa' nə pó pyə́ a:

¹²Pyə lə səso wɔ, hɑ kaktʉɔ bi po, ŋkhe wɔ gɑ po ghiŋ nə nthi pa' ǎ ku'nyə bi Si yə é ŋkhe wɔ nə́ nəfo tsyə́ ba m̀ nə ghu'tə e a.

¹³Yɔ ywə yə a gə tə́ pyə pɑ go'tə Si nə yɔk ghəŋ tə pwa a yəŋ gɑ: cwə yə́ po lə kwi ghɔm tsyə́ pyə lə gɔm bi po a, po lə kwǐ m̀ pá' ghɔm mo a pɑ, po kwi pɑ́ kwa' pa' á shəŋtə nə bɑ a: Ghɔm Si tsyə a bɑwə fa' cəcɑ̌ wɔ pɑ piŋ a.

¹⁴Nə pa' mfɑmfɑ, po lě fo' mcu'tə́ pɔ Si myə ǎ Yudea, fo' wap po'o m̀ nə Kristo Yeso, nə pa' po lě jɔgo' bi pǒ pɑ gǔŋ po dəŋdəŋ pa' wap lə yɔ̌go' bi pyə shɑ pɑ Yudea a.

¹⁵Wap pyə wap lə zhwə̌ Cyəpɔ Yeso pu a mghɔm ghɔm Si á, wap lě biŋ shwɔ' mkwə mɔk pɑ. Wap tə búŋ Si pɑ. Wap bɑ mghɛ bo pɔmnəŋ.

¹⁶Wap ŋkhɔ gɑ́ pyə kɑ́ siŋ Cuŋ pɑpúŋ bi pɑ tə pɑ Yudea nə bvɔk wap. Wap gə po'o bɑ nə shwɔp mhɔ map. Da' gɑ a bɑ lúŋ Si lě nə miŋ jɛ́ nə pú.

¹⁷A sɔ' m nə pyə mfɑmfɑ́, pyə pɑ́ bɑ pyə̌ hap nə po nə muywə cwədzʉ̌, bɑ gʉə sʉəsʉə nə mnyə tə bɑ pɑ́ bəŋ pó nə tʉ̌m, pyə̌ bɑ pyə kaktʉɔ nə sɔ' jɔ wɔ, nə pa' nə yɔ wɔ bɑwə nthəŋ wɔk.

¹⁸Pyə lə cə̌ŋ nə sɔ' wə po mcʉm mcʉ̌m ba kwa' myə Polo tə́ Sata kɔ bi pyə.

¹⁹Nə pa' yɔk mɔktə bɑ kɑ? Yɔk ŋwɛnyə, yɔk ŋa'tə yə a gɔ sɔ' pɑ́ yɔk Co'fo dzə̌ Cyəpɔ yɔk pɑ Yeso tyɛ' yə e gɔ sɔ' sɔ' a bɑ kɑ tə pɑ̌ wɔ?

²⁰Əŋ wɔ nə bɑ yɔk ŋwɛ́nyə, yɔk ghu'tə̀.