Read Ghomala New Testament 1 TESALONIKA 3 Bible Online

1 TESALONIKA 3 - Ghomala New Testament bible

1 TESALONIKA 3

¹Cwə yə́ pyə latə́ piŋ ŋkhu' nə pyap nə sɔ' wə po a, pyə sɛ́ gɑ́ pyə gɔ cwə dǒ pyə Atenya,

²a pɑ́ po'o pyə tə́m Timotio, fɑ́ yɔ, so fa' Si nə nə́ siŋ Cúŋ pɑpúŋ Kristo bi po gɑ́ e nyəŋ gʉ' nə po biŋ hɑ kaktʉɔ nə́ piŋnthʉm yɔ,

³po'o gɑ go'o yə ǎ si cwəlɔ a kɑ ghə̌ sɔmmo nə po pwa nə pa' pǒ zhyə gɑ a bɑ́ tsʉ' yə pɑ̌ gɔ m̀ nə a.

⁴Cwə yə pyə lə bɑ́ wə po a pyə siŋ wɔ gɑ́ po gɔ sɔ' yɔgo'. A gǒ' bɔ tə pǒ bɑwə jɔ cwəlɔ.

⁵A po'o tə pa' ŋ khɑ tə ŋku' nə pyap nə sɔ' wə po a, ŋ khě nthəm gɑ́ pu ghə ŋ jyə mcuŋ piŋnthʉm yɔ bɑ bwɔk gɑ pɑtyɛ' bɑ gɛ ləŋtə̀ ləŋtə́ wɔ, go' yɔk cʉ' pɔpɔ.

⁶A cwəlɔ tə́ Timotio fɑ wə po ŋwak bə́ŋ pyə; ě siŋ wɔk Cuŋ pɑpúŋ nə piŋnthʉm yɔ, ba nə ŋkhuŋnyə yɔ, biŋ siŋ wɔk gɑ́ pǒ bɑwə shə́ŋ nə yɔ wɔk pa' pyə̌ bɑwə shə́ŋ nə yɔ wɔ́ a.

⁷A po'o mfɑmfɑ́ tə pǒ pɑ́ bi pyə bɑ yɔk ywə nə gwak go' pu a ghəghʉɔ shyə m̀ nə piŋnthʉm yɔ.

⁸Pyə piŋ bɑ cwəlɔ bɑ gʉ̌' sɔ' bi pyə́ nə pa' pǒ tɔ́m Cyəpɔ kwa' pɑpúŋ.

⁹Pɑ pyə hɑ ya nthi gho'tə bi Si nə po nə guŋ ŋwɛnyə yə pyə̌ wə gə shyə m̀ nə po dzə̌ Si a?

¹⁰Nə pa' pyə̌ shwyɛ'nyə é mtsʉ́' ba m̀ mɔkcʉ, shəŋtə́ shwyɛ'nyə e gɑ́ e ghə gɑ pyə piŋ jɔ wɔ biŋ miŋ ywə yə a yɑ̌wə́ jak bi po nə́ piŋnthʉm yɔ a.

¹¹Kwa' yʉ́ Si Tá yɔk pɑ pu Cyəpɔ yɔk pɑ Yeso Kristo cyá məjyə yɔk m wə po.

¹²Á Cyəpɔ ghə ŋkhuŋnyə yə a bɑ pǒ ghə cəcɑ̌ po ba nə́ guŋ pɔ awɛ a kwyə biŋ jɔm pa' ŋkhuŋnyə yə a bɑ pyə̌ ghə nə po a.

¹³E yap mtʉ́m mɔ́ nə dɔlɔ̌ tə bya dzə̌ Si Tá yɔk pɑ̀ nə́ cwə yə́ Cyəpɔ yɔk pɑ Yeso Kristo gɔ sɔ' pu a pɔ dɔlɔ̌ a.