Read Ghomala New Testament 1 TESALONIKA 4 Bible Online

1 TESALONIKA 4 - Ghomala New Testament bible

1 TESALONIKA 4

¹Mfɑ̌mfɑ́ ywə yə pyə̌ bɑwə do bi po biŋ bɑ səso wɔ nə m̀ nə́ Cyəpɔ Yeso á a bɑ́ gɑ́ pa' a bɑ po lě ji'tə pa' pǒ gɔ nə ghiŋ tə́ puŋ Si, bɑ pó jɔ bi pyə, pǒ nə́ŋ bɑwə giŋ pɑ po'o a, po kwi' ŋkhaktʉɔ m nə kak sə́.

²Pǒ zhyə́ mnthɔk myə pyə lə hɑ̌ bi po a, a fɑ m̀ bi Cyəpɔ Yeso a.

³Ywə yə Si shəŋ a bɑ gɑ po vɔ́k vɔk dɔlɔ̌ gɑ po tɔm nɑ tsɔ nə nwə ghap,

⁴gɑ bǎ yá mo lə́ nə po zhyə́ nə ghə yə mjwǐ tə bvɔk nə dɔlɔ̌ pu a mku',

⁵e kɑ́ wuŋ nthak gɑ́ ghi'nyə lɑ e gɔ pa' pɑ tə pǐŋ Si pyə a tə bɑ wap zhyə Si á gə a.

⁶A sɔmmo kɑ ghə sɔmywə yə e gɔ nə nyəŋ nwə nə fɑ e a, e kɑ nə̌ŋ gə sɔmywə yə a gɔ pɔk e a nə yəŋ nwə, nə pa' Si ba' bo nə tsə bǎ awɛ pa' pyə lə sǐŋ wɔ biŋ shəŋtə biŋ a.

⁷Nə pa' Si la tə́ ŋkhe wɔk pɑ m nə vɔk mviŋ pɑ́, e lə ŋkhe wɔk pɑ m nə vɔk dɔlɔ̌.

⁸A po'o tə mo yə ě wa' mɔ gɑ mnthɔk a bɑ e tə́ gwa' pɑ mo pɑ, bɑ e gwa' pa' Si, yʉ́ yə e hɑ Zhwenyə Dɔlɔ̌ e bi po a.

⁹Sɔ' m nə ŋkhuŋnyə mfɑmfɑ́, bɑ po tə̌ yɑ̌wə byap gɑ pu və sɔmywə nə bi po pɑ́, nə pa' a bɑ pǒ zhi'tə nə kuŋnyə cəcɑ̌ po bi Si,

¹⁰pǒ nəŋ bɑwə gə po'o nə mfɑ̌ pyə wap Makedonya a awɛ; pyə wə səso wɔ gɑ po piŋ ŋkhaktʉɔ.

¹¹Po pɑ gə nthʉ́m tʉm po nə cwə gɑ zhyə̀, bɑ fa' pɑ kwa' nə mɔ mnwə̀, biŋ bɑ dɑ bú mɔ fa' pa' pyə lə ghɔm bi po a,

¹²po'o gɑ msəm pɑ nə ghiŋ tsɔ dzə̌ pɑ dzʉ́, a po lə piŋ bɑ byap sɔmmo pɑ.

¹³Mfɑ̌mfɑ́, pyə shəŋ nə tak wɔ nthʉm fʉmnyə nə nwə pɔ pyə wap lě pfʉ a pɑ, po'o gɑ po kɑ́ pɑ̌ shwə nə zhwiŋ pa' pyə shɑ pɔ pyə wap tə́ bɑ wap ghə sɔm mɔktə a pɑ.

¹⁴Nə pa' a bi a pɑ piŋ gɑ́ Yeso lě pfʉ́ biŋ jam nə vʉ̌, bɑ a bɑ́ dəŋdəŋ po'o tə pɔ pyə a bɑ wap pfʉ́ a, bɑ Si gɔ sɔ' cyə m̀ nə Yeso yam wap pu a pú.

¹⁵Ywə yə pyə̌ gɔm, shyə m̀ nə ywə yə Cyəpɔ lə zhi'tə wɔk a bɑ gɑ: Wɔk pɑ pyə pɑ gɔ sɔ' pɑ́ pɑwə nə cwə yə́ Cyəpɔ gɔ sɔ' sɔ' a, pɑ tə́ gɔ sɔ' tamdzə̌ pɔ pyə wap lě pfʉ́ a pɑ́.

¹⁶Nə pa' cwə yə tadyə̌ aŋgəle gɔ sɔ' ghə mtiŋ, hɑ gi e thə́ pu piŋ nthuŋ nthɛ Si a, kwa' yʉ́ Cyəpɔ fi' fɑ́ kɛbəŋ: a pɔ pyə wap lě pfʉ́ m̀ nə Kristo a ləŋdzə jám,

¹⁷a piŋ bɔ́tə́, wɔk pɑ pyə́ pɑ yɑ̌ thə́ giŋ a, pu ŋa' wɔk pɑ a pú nə ŋkwɔ' dəm mlwa, po'o gɑ pa Cyəpɔ yu'tə́ nthʉm fɔk, a pɑ́ po'o pa Cyəpɔ pɑ́ bəmtə́ bɑ guŋ mcwə awɛ.

¹⁸Po pɑ dɑ ywə́ yə̌ŋ gɑ yə po ji'tə a nə nyəŋ gʉ' nə piŋnthʉm yɔ cəcɑ̌ po.