Read Ghomala New Testament 1 TESALONIKA 5 Bible Online

1 TESALONIKA 5 - Ghomala New Testament bible

1 TESALONIKA 5

¹Sɔ' m nə cwə dzʉ̌, ba m̀ nə wɔ̌ dzʉ́ bɔ mfɑmfɑ́, po lə piŋ bɑwə́ byap gɑ́ pu və ywə nə́ bi po.

²Kwa' wɔ bɑ pǒ cəŋtə́ jyə́: Tyɛ̌'dzʉ́ Cyəpɔ gɔ sɔ' sɔ' pa' shwǔŋ sɔ' mtsʉ' a.

³Cwə yə pɔmnəŋ gɔ sɔ' pɑ́ ghɔm gɑ: Yɔ mu' hwítə! Yɔ mu' nə cyə́tə pwɔk a, a pɑ cwə o bɔ tə́ nə pɔ́ptə ko nə pú pa' ywələ̌m gəm mjwǐ tsʉ̌m a, a wap lə vɔk.

⁴Tə́ sɔ' m nə po mfɑmfɑ́, po tə́ bɑ́ m̀ nthʉ̌m jʉ́m tə̌ tyɛ'dzʉ́ bɔ sɔ' bvonyə wɔ vonyə m pá' shwǔŋ a pɑ́.

⁵Nə pa' guŋ yɔ awɛ pǒ bɑ́ pó ŋkhá', pǒ dɔdzʉ̌: Pɑ tə́ bɑ pɔ mtsʉ' kɑ pɔ jʉ́m pɑ́.

⁶A po'o tə́ ka pɑ ti pa' pyə shɑ́ pɔ a; pɑ ti tə́ tì, pɑ kɑ pam mlu'.

⁷Pɔ pyə́ wap di a di pɑ́ mtsʉ́', ba pɔ pyə́ wap bam mlu' a pɑ bam pɑ́ mtsʉ́';

⁸Tə́ wɔk pɑ pyə́ pɑ̌ bɑ́ pɔ dɔdzʉ̌ á, pɑ kɑ́ pam; pɑ lɑ piŋnthʉm pu ŋkhuŋnyə gə kʉ́' shu, dɑ mɔktə nə ywə vɔk gə co' shu.

⁹Nə pa' Si lá tə́ shwɔ' wɔk pɑ m gɑ́ yɛ̌lúŋ é ko nə́ pɑ pɑ, e lə́ shwɔ' wɔk pɑ m̀ gɑ pɑ ghə ywə vɔk shyə́ m nə́ Cyəpɔ yɔk pɑ Yeso Kristo,

¹⁰yə é lə pfʉ̌ nə pɑ po'o gɑ pɑ pɑ́ tə pɑ̌ diti kɑ bɑ́ diti lə, pɑ pɑ́ nthamtə́ pɑ́ nə e nthʉm vɔk.

¹¹A po'o tə́ po gɔ pɑ́ təmtə́ wɔ́ wɔ́ cəcɑ̌ po, pɑ kwyətə́ wɔ́ wɔ́ cəcɑ̌ po pa' pǒ ji gə a.

¹²Mfɑ̌mfɑ́, po ghə́ mku' pɔ pyə wap jɔgo' cəcɑ̌ po nə́ nə shya wɔ jʉ̌m Cyəpɔ, biŋ bɑ nthɔk wɔ a;

¹³po cyə́ m̀ nə fa' tsap ŋkhuŋ wap. Po vɔk nthʉm hwítə cəcɑ̌ po.

¹⁴Mfɑ̌mfɑ́, pyə̌ səsó wɔ: Po tɔk pɔ pyə́ wap wə́ bvɔ́k vɔk va' a, hɑ́ kaktʉɔ bi pɔ pyə́ wap ka ghə́ kaktʉɔ sak a; po tə́mtə́ pɔ bwapwǎ, bɑ nthɔm tʉ́m tsɔ nə pú.

¹⁵Po pɔmtə́ gɑ́ ka sɔmmo pa' cwəpuŋ nə́ cwəpuŋ; po pɑ shəŋ pɑ pɑpúŋ cəcɑ̌ po, bɑ pu a guŋ pɔ awɛ.

¹⁶Po pɑ bɑ́ pɑ nthʉm ŋwɛnyə guŋ mcwə awɛ.

¹⁷Bɑ shwyɛ'nyə Si tə́ pwa,

¹⁸bɑ go'tə e guŋ m cwə awɛ, nə pa' a bɑ ywə́ yə Si shəŋ bi po á shyə m̀ nə Kristo Yeso.

¹⁹Ka po cɑ́jyə̀ bi Zhwenyə,

²⁰po kɑ wak fa' pɑ ghɔm pa' mghɔm ghɔm Si.

²¹Po cəŋtə́ dé guŋ ywə awɛ: Nthɔ́m yə pɑpúŋ.

²²Po tíŋnyə jʉm nə guŋ nwə bɔk pɔ̌k awɛ.

²³A Si hwitə́ ghɔ shəŋtə́ dɔnyə wɔ pɑ́ kwa' yʉ́, biŋ byap zhwenyə yɔ, ba tʉm tsɔ́ pu a nɑ yɔ gɑ́ a sɔ' bɑ tə bya nə cwə yə́ Cyəpɔ yɔk pɑ Yeso Kristo gɔ sɔ' sɔ' a.

²⁴Mo yə é ŋkhe wɔ a tə ŋkwyəpnyə pɑ́: Pɑ́ yʉ́ nə gɔ sɔ' ghə po'o.

²⁵Mfɑ̌mfɑ́ po cwyɛ'nyə Si ba m nə pyə yɔk.

²⁶Po lɑ nə nuŋ mgho dɔlɔ̌ nə sha'tə mfɑ.

²⁷Nə tsǒ Cyəpɔ, gɑ ghɔm bi po gɑ́ po ké ŋwa'nyə yə̌ŋ bi guŋ mfɑ awɛ.

²⁸A gho' Cyəpɔ yɔk pɑ Yeso Kristo pɑ bi po.