Read Ghomala New Testament 2 TESALONIKA 1 Bible Online

2 TESALONIKA 1 - Ghomala New Testament bible

2 TESALONIKA 1

¹Polo pu Silvano ba Timotio bi Cu'tə pɔ Kristo pɑ Tesalonika yə a bɑ m̀ nə Si, Tá yɔk pɑ ba m̀ nə Cyəpɔ Yeso Kristo a.

²Gho' ba hwitə̀ pɑ́ bi po shyə m̀ nə Si Tà ba m̀ nə Cyəpɔ Yeso Kristo.

³Pyə̌ gɔ pɑ́ gho'tə Si nə́ po guŋ mcwə awɛ mfɑmfɑ́, a piŋ bɑ nwə dəŋdəŋ nə pa' piŋnthʉm yɔ wə gɔ m dzə̀, ba ŋkhùŋnyə yə a bɑ pǒ ghə cəcɑ̌ po a piŋ bɑwə ŋkwyə bǎ nə ya mò lə́ nə po awɛ

⁴tə́ po pɑ yɔk ŋa'tə cəcɑ̌ mcu'tə Si, shyə́ m̀ nə́ yɔ nə́ kaktʉɔ ba nə piŋnthʉm yɔ nthʉm nə cwɔ'mkwə pu a ghəghʉɔ.

⁵A bɑ mtìŋ fyɛ' dəŋdəŋ Si; a bɑ po'o tə́ nə ghə gɑ po pɑ́ pɔ pyə́ wap ku' nə́ Nəfo Si yə po bɑwə jɔgo' nə a.

⁶A bɑ nwə dəŋdəŋ gɑ́ Si pa' ghəghʉɔ nə ghəghʉɔ bi pɔ pyə wap bɑwə dɑ wɔ jɔgo' a,

⁷biŋ hɑ hwitə̀ bi po, wɔ pyə́ pú hyá wɔ a, ba m̀ bi pyə nə cwə yə Cyəpɔ Yeso Kristo gɔ sɔ' sɔ' a, e gɔ sɔ' fɑ kɛbəŋ pu a pɑ aŋgəle nə nthʉɔtʉɔ

⁸nthʉm mɔk ghə̀mghə̀m, sɔ' po'o nə pa' bò nə pɔ pyə́ wap tə bɑ wap zhyə Si a, la' wap pɑ ju'nyə Cùŋ pɑpuŋ Cyəpɔ yɔk pɑ Yeso a.

⁹Shɛ yə a gɔ sɔ' ko thə́ pu a gɔ sɔ' pɑ́ nə pɔptə mama, bɔptə po'o gʉə sʉəsʉə nə sə Cyəpɔ ba nə ləŋnyə ghu' e,

¹⁰cwə yə e gɔ sɔ' sɔ', nə tyɛ'dzʉ́ bɔ, gɑ pɔ dɔlɔ̌ pyə́ ghu'tə e, pu piŋ jɔ e biŋ e shyə m̀ nə́ guŋ pɔ awɛ pyə́ wap bɑ wap lě biŋ a: a nə̀ŋ bɑ bɑ̀ po lě biŋ mkwinthɛ mɔk.

¹¹A biŋ shyə m̀ po'o tə pyə pɑ́ shwyɛ'nyə Si nə po gùŋ mcwə awɛ, shwyɛ'nyə e gɑ e yɔ wɔ pa' pɔ pyə wap ku'nyə nə ke yə e lə nə ŋkhe wɔ a; biŋ shyə́ m nə tʉɔ é hɑ nə ghə ywə́ pɑpúŋ yə pu shəŋ a bi po, gə piŋnthʉm yɔ pɑ fǎ'.

¹²A pɑ́ po'o a tsǒ Cyəpɔ yɔk pɑ pɑ gu'tə ghǔ' nə po, ba tsɔ tso nə e, shyə m̀ nə gho' Si yɔk pɑ, ba m nə́ Cyəpɔ Yeso Kristo.