Read Ghomala New Testament 2 TESALONIKA 2 Bible Online

2 TESALONIKA 2 - Ghomala New Testament bible

2 TESALONIKA 2

¹Sɔ' m nə nwə nə pa' Cyəpɔ yɔk pɑ Yeso Kristo gɔ sɔ' nə sɔ', ba yɔk pɑ nə cu'tə́ bəŋ e a, pyə pɑ̀wə həŋ bi po mfɑ́mfɑ́ gɑ:

²Ka thə́ yɔ wuŋ bi mgʉ̌', kɑ nə pwɔk shyə m̀ nə mu' ywə yə pu gə po zhyə́ pa' ywə yə a gɔ ti tə́ pɑ a, kɑ m nə́ mu' ŋwa'nyə yə pu da'tə wɔ gɑ a fɑ́ m bi pyə, bɑwə gə po kwɛ gɑ̀ tyɛ'dzʉ́ Cyəpɔ sɔ' a lə.

³Sɔmmo kɑ́ fʉtə wɔ́ nə sɔm məjyə. Nə piŋkhəŋ nyə Si gɔ ləŋdzə sɔ', Mo mnwə shɔkcɔk la'tə nɑ́ e, Mú bi pǐ,

⁴mo yə e bɔ guŋ ywə yə pu ŋkhe gɑ́ Si kɑ ywə gamtə ghamtə lə, gə po'o tə cwə ba m̀ Dyə́ Si, ghɔm gɑ́ e bɑ́ Si.

⁵Po ka kamtə́ gɑ ŋ də́ gɔm nwə nə ywə bɔ cwə yə ŋ də́ jɑ bəŋ po a?

⁶Cwəlɔ, pǒ zhyə ywə yə a nthɔm é tə̌ é la' gə pu zhyə́ e pɑ́ nə yə cwə a.

⁷Nə pa' nwə cyə zhyənwə nə nə kəŋnyə Si dzə́ pɑwə́ fǎ'; a bɑwə shʉ' da' nə cʉɔ mo yə é bɑwə nthɔm é cwəlɔ a.

⁸A pɑ po'o pu zhyə shɔkcɔk yə Cyəpɔ Yeso gɔ lɑ shwə e fɔk é nə sa'tə e, piŋ lɑ nthi ləŋnyə pa' e gɔ nə sɔ' a nə simnyə e a.

⁹Sɔ' m nə yə nə sɔ' shɔkcɔk yə pu gɔ sɔ' yɔ nə mfa' sata a, yə nə sɔ' bɔ gɔ sɔ' pɑ nə nthinthi mfa' mtʉɔ, pɑ nə msya nwə ba tsə kɛ̀ nə fʉ́tə mo,

¹⁰ba nə guŋ nə fəŋtə nwə tə pɑ dəŋdəŋ bi pɔ pyə wap bɑ pɔ bipǐ, shyə m pa' wap lě ŋkhəŋnyə nə kwi ŋkhùŋnyə nyənyɔ yə a lə bɑ gɔ vɔk wap a.

¹¹A ywə yə a gə tə Si hɑ ta' tʉɔ yə a gə mo hɔ məjyə̀ a bi pú gɑ́ a ghə wap pɑ biŋ cwanwə

¹²po'o tə pu fyɛ' guŋ pɔ awɛ pyə́ wap lě tə́ piŋ nwə nyənyɔ a, bɑ̀ ŋwɛnyə yap pɑ nə mcwanwə a.

¹³Tə sɔ' m̀ nə pyə, pyə̌ gɔ pɑ gho'tə Si nə po guŋ mcwə awɛ, wɔ mfɑ́ pyə Cyəpɔ ŋkhuŋ wɔ a, nə pa' a bɑ Si lě shwɔ' wɔ tə fɑ̀ nə nə́ to', shwɔ' wɔ gɑ po vɔ̌k, shyə m nə Zhwenyə yə a dɔnyə mò, ba m̀ nə piŋnthʉm nə nwə nyənyɔ.

¹⁴A ywə yə e lə kě wɔ nə́, shyə m̀ nə Cuŋ pɑpuŋ yɔk gɑ po sɔ' gə ghu' Cyəpɔ yɔk pɑ, Yeso Kristo.

¹⁵Pa' ǎ pɑ po'o a mfɑmfɑ, po tɔm a púŋ, ŋkhyəp ma yə́ pyə lə zhi'tə wɔ, dɑ shwə siŋ wɔ kɑ bvə və bi po lə a tʉ̌ɔ.

¹⁶A Cyəpɔ yɔk pɑ̀ Yeso Kristo, pɑ́ kwa' yʉ́, ba Si, Tá yɔk pɑ̀ yə é lě ŋkhuŋ wɔk pɑ̀ biŋ shyə m nə gho' hɑ zhwyətə mama, ba mɔktə pɑpuŋ a,

¹⁷zhwyətə́ wɔ biŋ nyəŋ gʉ' nə po nə guŋ ywə awɛ yə pǒ gə, ba yə pǒ gɔm, a pɑ́ nwə pɑpúŋ a.