Read Ghomala New Testament 2 TESALONIKA 3 Bible Online

2 TESALONIKA 3 - Ghomala New Testament bible

2 TESALONIKA 3

¹Po'o lə́ mfɑ́mfɑ́, po cwyɛ'nyə Si nə pyə, po'o gɑ ghɔm Cyəpɔ ghɔ dzə̀, gɑ pú ghu'tə ghɔm bɔ pa' pu gu'tə e wə po a.

²Po cwyɛ'nyə Si nə pyə gɑ pɔ shɔk cɔk, pɔ cwəpùŋ kɑ ghə sɔmywə nə pyə nə pa' guŋ yap awɛ bɑ wap ka ghə piŋnthʉm.

³Cyəpɔ bɑ nyənyɔ: e gɔ pɑ kwyətə́ wɔ piŋ pɑ pɔmtə́ wɔ nə cwəpùŋ.

⁴Sɔ' m̀ nə́ po, bɑ pyə̌ zhyə́ shyə́ m nə́ Cyəpɔ gɑ́ ywə yə pyə̌ gɔm a, pǒ gə pɑ́ po'o, biŋ bɑ gə po'o nə gɔ pɑ́ dzə̀.

⁵A Cyəpɔ lɑ́ mtʉ́m mɔ gɔ nə ŋkhuŋnyə Si ba nə kaktʉɔ Kristo.

⁶Pyə wə gɔm bi po mfɑmfɑ́ shyə m̀ nə́ tsǒ Cyəpɔ Yeso Kristo gɑ po tiŋnyə tə́ gʉə sʉəsʉə nə mfɑ̌ pyə wap bvɔk vɔ̀k va', vɔk yə a tə́ bɑ́ pa' ma yə po lə yǔ' bi pyə a pɑ́.

⁷Po bɑ pǒ cəŋtə́ jyə́ nə pa' po gɔ fo' wɔk a: pyə lě tə vɔ́k cəcɑ̌ po m̀ nə vɔ̀k va'.

⁸Pyə lě tə hə́ŋtə́ bi sɔmmo gɑ́ e hɑ ywətsʉ yə pyə lə dzʉ́ a bi pyə; da' gɑ nthʉ́m ghəghʉɔ pu a pwa, mtsʉ̌' pa' mɔkcʉ a, pyə lə́ fa' po'o gɑ́ pyə kɑ́ pɑ pi' bi sɔm mò.

⁹A lə́ nə pɑ̌ po'o bɑ pyə̌ ku' kwa' gɑ pɑ́ pú hɑ ywə bɔ bi pyə, da' gɑ pyə lə́ gə po'o gɑ pyə pɑ́ bi po bɑ ywə yə pɑ́ po fo' a.

¹⁰Nə pa' cwə yə pyə lə́ bɑ bəŋ po a, pyə pɑ́ gɔm bi po gɑ̀: a pɑ́ gɑ́ mo ka kúŋ nə fa', ba nə tsʉ ywə́ e kɑ tsʉ́!

¹¹A nə pɑ̌ po'o pyə pɑwə ju' pu ghɔm gɑ́ shɑ́ pɔ cəcɑ̌ po bɑwə bvɔ́k pɑ vɔk va': bɑwə fa' te' tə tə̀ pɑwə gə sɔmywə.

¹²Pyə̌ wə gɔm bi pɔ bɔ, shyə́ m nə́ Cyəpɔ Yeso Kristo, biŋ bɑwə səso wap gɑ́ wap fa' gɑ zhyə̀, bɑ dzʉ́ kwa' ywə yə wap nə fa' a.

¹³Tə́ sɔ' m̀ nə́ po mfɑmfɑ́, ka po pwa nə ghə pɑpúŋ.

¹⁴Mo pɑ tə yu'nyə nə ywə yə pyə gɔm bi po nthʉm ŋwa'nyə yə̀ŋ á, po yɔ é, po a pú kɑ pɑ̌ nə sɔmywə, sɔ̌ kú e;

¹⁵da' gɑ̀ ka po yɔ é pa' gɛ bo a, po tɔk é pɑ́ pa' ta' fɑ a.

¹⁶A Cyəpɔ hwitə́ hɑ hwitə bi po pɑ́ kwa' yʉ́ nə gúŋ mcwə awɛ, nə gúŋ nthinthi məjyə awɛ. A Cyəpɔ pɑ bi gúŋ yɔ awɛ.

¹⁷Ca'tə yə̌ŋ bɑ pɑ́ kwa pu a, myə Polo; gɑ̌ nthʉ pu a nə bǎ ya ŋwa'nyə a lə pɑ po'o: myə nə bvə.

¹⁸A gho' Cyəpɔ yɔk pɑ Yeso Kristo pɑ́ bi gùŋ yɔ awɛ.