Read Ghomala New Testament 1 TIMOTIO 4 Bible Online

1 TIMOTIO 4 - Ghomala New Testament bible

1 TIMOTIO 4

¹Zhwenyə gɔm sɔsɔ̌ gɑ: A gɔ sɔ' pɑ́ nə mcwə jʉm shɑ́ pɔ kə́ŋnyə́ piŋnthʉm, pɑ la nɑ́ tsap pɑ nə mzhwenyə fʉ́tə̀ pu a nə mnwə myə́ a fɑ m̀ bi msata a,

²bɑ mcwanwə, pɑ labǔ pyə a bɑ pu lə tʉɔ mɔk gə mtiŋ nə pu nə mtʉm map ghə wap pitə̀.

³Wap gɔ sɔ' pɑ̀ kɔ lɔmdyə́, pɑ co' nə tsʉ shɑ́ potsə́, tə́ bɑ Si lə nyaptə tsə́ bɔ bi pɑ piŋ, wap pyə wap bɑ wap cəŋtə jyə́ nwə nyənyɔ a pɑ nə tsʉ̌ bɑ go'tə.

⁴Nə pa' guŋ tsə́ awɛ tsyə Si lə́ nyaptə á bɑ ǎ púŋ, la' sɔm pɑ́ yə gwa'wǎ', nə cwə yə mǒ lɑ fa' gho'tə tə́ nə dzʉ́ a.

⁵Nə pa' ghɔm Si pu a mcwyɛ'nyə̀ dɔnyə́ ywə bɔ.

⁶La'tə guŋ nwə bɔ awɛ bi mfɑ̌mfɑ́: tə́ a pɑ́ po'o o pɑ kwa' gɛfa' Kristo Yeso yə pɑpúŋ yə a bɑ pú lɑ ghɔm piŋnthʉm ŋkhim e ba nwə pɑpuŋ yə o lə́ lɑ lo'nyə ji'tə a.

⁷Sɔ' m nə tsə pomkəfeli nə kheŋnyə Si, mghɔm mbvo pɑ jwǐ, o wa' má. Pɑ ji'tə nə lɑ mku' biŋ.

⁸Nə zhi'tə ywə m̀ nə nɑ́ mo na' ŋkwitə́, da' gɑ nə zhi'tə nə lɑ mku' bíŋ ŋkwitə nə guŋ ywə awɛ. A bɑ ǎ ghə mka'nyə vɔk, vɔk cwəlɔ ba yə vɔk yə a gɔ tə́ sɔ' a.

⁹Ghɔm tsɔ̌ bɑ ǎ ku' pɑ bi a pɑ mo yap tʉ̌m nə a, ba m pa' bi a pɑ́ guŋ pɔ awɛ kwi a.

¹⁰Nə pa' a bi a pɑ gɑ pyə̌ wə́ jɔgo' biŋ bɑwə do'shù, ba a bɑ gɑ́ pyə̌ jap yɔk mɔktə̀ nə Si yə e bɑ nthʉɔ, yə e bɑ gɛvɔk guŋ pɔ awɛ a, tə bɑ te'te' bɑ gɛvɔk pɑ piŋ a.

¹¹Yɔ ywə yə o gɔ yap piŋ zhi'tə a yɑ.

¹²A sɔmmo kɑ wak o shyə m̀ nə gu'dzʉ́ tsǔ. O gɔ pɑ̀ cəcɑ̌ pɑpiŋ pɑ́ pɑ fo' nə ghɔ̀m, nə ghìŋ, nə ŋkhùŋnyə̀, nə piŋnthʉm ba nə pɑ dɔlɔ̌.

¹³Nə pyap cwə yə gɑ̌ gɔ sɔ' a, bɑ nyəŋ nɑ o pɑ nə ke Ŋwa'nyə, nə səso nə ke pɔ, nə zhi'tə ywə.

¹⁴Kɑ wak ywə gho' yə ǎ nə o, bɑ pu lə shyə m nə gɔmnwə pa' gɔm ghɔm Si a hɑ bu, bɑ m nə yap bǔ thə o yə mghətso lə yap a.

¹⁵Yɔ ywə yə o gɔ cəŋtə́ yap nthʉm tʉm o a yɑ; yɔ ywə yə a gɔ ghə tə́ o pɑ ŋkhaktʉɔ a yə̌ŋ; po'o gɑ mnyə guŋ pɔ awɛ yɔ yu nə́ kaktʉɔ gɔ dzə̀.

¹⁶Pɑ shəŋtə́ de nɑ o, ba ywə yə o ji'tə bi pɔmnəŋ a. Nyə́ŋ kaktʉɔ nə́. O gɔ pɑ́ ghə m po'o tə vɔk thə́ nɑ o ba pɔ pyə wap ju' o a.