Read Ghomala New Testament 1 TIMOTIO 6 Bible Online

1 TIMOTIO 6 - Ghomala New Testament bible

1 TIMOTIO 6

¹Guŋ pɔ pyə wap wə bɑ mkwɔ a yɔ mtá pap pa' pɔ pyə pɑ́ pu lɑ msə́m jɔ wap a, po'o gɑ tsǒ Si pu a ywə ji'tə mcap kɑ pɑ̌ nə́.

²Pɔ pyə mta pap wə bɑ wap ghə piŋnthʉm a pɔm tə cyətə pwɔk wap, bɑ gɔm m gɑ pu a pú mfɑ̌. Wap gɔ cəŋtə́ fa' bi pu nə ghɔ pɑ́ m dzə̀, nə pa' wap bɑ pɑ pìŋ, biŋ bɑ́ mfɑ́ ŋkhùŋnyə̀ pyə mta pap gə pɑpuŋ nə pú a. Yə̌ŋ bɑ ywə yə o gɔ zhi'tə piŋ ghɔm gɑ́ pu ghiŋ nə a.

³Mo zhi'tə mu' nwə dyɛ', e lə la nɑ́ e m̀ nə mghɔm dɔlɔ̌ Cyəpɔ yɔk pɑ Yeso Kristo ba nə ywə yə pu ji'tə, a pɑ nə nə lɑ mku' biŋ a

⁴bɑ a bɑ ŋa'nɑ tamfʉm mnyə mo bǎ. Mo bǎ bɑ ŋkhəŋkhʉɔ, bɑ gɛ gho, bɑ shəŋ yə pɑ mfəŋnyə pu a mshɛ nə mshwə́ ghɔ̀m. Ywə yə a nthəm nə tsʉ' bɔ á bɑ ghi'nyə, fəŋnyə, mcaptə Si, nə tɔmtə́ nwə cwəpúŋ

⁵mtɛshwə tə dhə cəcɑ̌ pɔ pyə wap bɑ wap ghə zhwenyə mfʉm a, wap lə pɑ́ jyə nwə nyənyɔ, bɑ ŋkwɛ yap gɑ nə lɑ mku' biŋ bɑ nwə fʉ'.

⁶Əŋ nə lɑ mku' biŋ bɑ ǎ ghə mɑ fʉ' gwyə́ bi mo yə́ e ŋwɛnyə nə ywə yə ǎ bi a.

⁷Nə pa' pɑ la tə lɑ́ sɔmywə sɔ' nthʉm dzʉ́; pɑ lə nəŋ bɑ gɔ ti lɑ sɔmywə nə ghɔ.

⁸A bi a pɑ ghə dzə ŋkwakwǎ ba ywə tsʉ́, pɑ ŋwɛnyə̀ nə́.

⁹Sɔ' m̀ nə pɔ pyə́ wap shəŋ nə zhi a, wap bvʉ́ nə yo' mləŋtə, nə nthinthi mghi'nyə cwəpùŋ myə a nyəŋ pɔmnəŋ nthʉm msa'tə pu a nə pi a.

¹⁰Guŋ mnwə cwəpuŋ awɛ nthəm nə́ nə kúŋ ŋkhǎp. Shɑ pɔ pyə wap lə hɑ̌ nɑ́ tsap nə a wap lě bi tə gʉə sʉəsʉə nə piŋnthʉm, dɑ nthinthi mɛnyə swɔp mtʉm map.

¹¹Wə yə o bɑ mo Si a, khʉ̌ mnwə bǎ. Cəŋ nwə dəŋdəŋ pú nə lɑ mku' biŋ ba piŋnthʉm, shəŋ ŋkhuŋnyə̀, shəŋ nə kaktʉɔ pu byanyə.

¹²Lo'shù pɑpúŋ, shù piŋnthʉm, lo' vɔk mama yə pu lə ké o nə a, pa' o jyə́ nə nə la'tə piŋnthʉm pɑpúŋ yə o gɔm dzə̌ mkwǐnthɛ jɔmyɔ̌m a.

¹³Gɑ̌ wə gɔm bu dzə̌ Si yə e nyəŋ vɔk nə guŋ tsə awɛ a, ba m̀ dzə̌ Kristo Yeso yə e lə kwǐnthɛ dzə̌ Pontio Pilato nə nə la'tə piŋnthʉm pɑpúŋ a gɑ:

¹⁴Tɔ́m mco', giŋ tə viŋ nɑ o, tə ghə sɔmywə yə́ pu gɔ pya o nə a tə ŋkhəm nə cwə yə nə ghə pu yɔ Cyəpɔ yɔk pɑ Yeso Kristo,

¹⁵yə a gɔ sɔ' təm nə cwə yə Si lə yap a: Fo lɑpʉə, Fo mfo mfo, Cyəpɔ mcyəpɔ,

¹⁶da' yʉ yə e bɑ tə pfʉ́, bɑ shwə nə́ ŋkha' yə pɑ mo lə cyə bəŋ o a, yə sɔm mò la m jɔ, bi a pɑ e lə nəŋ jɔ a. A ghu'tə pu tʉ̀ɔ pɑ́ bi e mama. Amɛn.

¹⁷Ghɔm bi mghɛ ywə nə yəŋ dzʉ̌ gɑ ka wap ŋa' nɑ tsap, wap kɑ yáp yap nə mɔktə nə tsə fʉ' tsyə mo tə jyə́ pa' a gɔ ti yó pɑ a; wap yáp m̀ nə Si, yʉ́ yə e hɑ tsə fʉ' bi pɑ tə dhə̀, gɑ pɑ nə́ bvɔk a.

¹⁸Ghɔm bi pú gɑ́ wap ghə nwə pɑpúŋ, ji nə mfa' pɑpuŋ, hɑ ywə tə sɛ, bɑ dzʉnyə pu a pyə́ shɑ̀ pɔ.

¹⁹A pɑ po'o tə́ wap cu'tə kwa' tsə fʉ' nthʉɔ tsyə pɑpuŋ tsyə a tsap a, nə cwə dzʉ̌ yə a gɔ tə sɔ' a, po'o gɑ wap sɔ' gə vɔk nyənyɔ.

²⁰Wə Timotio tɔm ywə yə pú dwɔ' bu a, kɑ cyə nə zhwya mghɔm tɑ pǐŋ Si pu fəŋnyə̀ yə a hwə zhyənwə tə pɑ̌ ya a.

²¹Shɑ pɔ lə pɑ̌ gɔm mthi po'o, hɔ məjyə nə piŋnthʉm. Gho' pɑ́ bi po!