Read Ghomala New Testament 2 TIMOTIO 1 Bible Online

2 TIMOTIO 1 - Ghomala New Testament bible

2 TIMOTIO 1

¹Myə Polo, gɛ nthə̌m Kristo Yeso, shyə m̀ pa' Si nə jap a, shyə m̀ nə mka'nyə vɔk myə a bɑ nə Kristo Yeso a,

²bi Timotio, mu a yə gɑ̌ ŋkhuŋ e te' a: Gho', cɔ̌mmtso ba hwitə pɑ bu shyə́ m nə́ Si Tá, ba m̀ nə Kristo Yeso, Cyəpɔ yɔk pɑ.

³Gɑ̌ go'tə Si yə gɑ̌ fa' bi e pa' mta pɑ̌ a, fa' bi e nə tʉm dɔlɔ̌, nə pa' mtsʉ̌' ba mɔkcʉ, gɑ̌ ŋkhe tso tsǔ guŋ mcwə awɛ nthʉm mcwyɛ'nyə mə̌.

⁴Gɑ̌ nə kamtə́ shyətsə o, bɑ shəŋtə́ sʉ́m nə piŋ jɔ́ o po'o tə ŋwɛnyə̀ o ló nə m̀.

⁵Gɑ̌ ŋkhamtə piŋnthʉm yə nyənyɔ yə a bɑ nə o, piŋnthʉm yə a lə ləŋdzə shwə́ nə Lois má mɔ̌ ɔ ba m nə Eʉnik mɔ̌ ɔ a, biŋ bɑwə shəŋtə́ jyə́ gɑ piŋnthʉm bɔ shwə ba m̀ nə o a.

⁶A po'o tə́ gɑ̌ wə ŋkhamtə́ bu gɑ o vyə̌ ywə fʉ' yə́ Si hɑ bi mo, a pɑ bu tə fɑ pa' ŋ də yǎp bu nə o a.

⁷Nə pa' Si tə bɑ ě hɑ pɑ́ zhwenyə pwɔk bi pɑ pɑ̀; a bɑ ě hɑ zhwenyə gʉ', zhwenyə ŋkhuŋnyə ba zhwenyə nə nthɔm nɑ bi pɑ̀.

⁸Ka sǒ kú o nə kwinthɛ̌ nə Cyəpɔ, o kɑ nə̌ŋ ŋkhú so ba m nə m̀ gɛ cɛ̌ shyə m nə é. Da' gɑ pu pəmtə́ jɔgo' nə Cùŋ pɑpuŋ, bɑ dɑ tʉɔ Si nə byap, Si

⁹yə e lə vɔk wɔk pɑ̀, biŋ ŋkhe wɔk pɑ m ke dɔlɔ̌, la' e ké wɔk pɑ̀ po'o shyə m̀ nə mfa' pɑpúŋ mɔk pɑ pɑ̀, ŋkhe wɔk pɑ̀ shyə m nə pa' e lə́ yǎp pɑ kwa' yʉ a ba m̀ nə gho' e. Gho' bɔ yə e lə lǎ' gə nə pɑ tə tyɛ̌' mama nə́ Kristo Yeso a,

¹⁰a bɑ pú la'tə ya cwəlɔ bi pɑ shyə m̀ nə pa' gɛvɔk wɔk pɑ̀ Kristo Yeso sɔ' a. Yʉ́ nə sa'tə vʉ́' biŋ kyɛ' vɔk ba nə cyətə pfʉ̌ shyə m̀ nə Cuŋ pɑpúŋ;

¹¹yə pu lə lɑ a gə gɛ cyanyə nə́, bɑ gɛ nthə̌m biŋ bɑ tadyə̌ nə a.

¹²Yə̌ŋ bɑ ywə yə a gə tə́ bɑwə biŋ yəŋ ghəghʉɔ a. Sǒ tə bɑwə ŋkhú a nə pɑ, nə pa' a bɑ gɑ̌ zhyə mo yə gɑ̌ bɑ gɑ̌ yap piŋnthʉm a nə e a, biŋ shəŋtə́ jyə gɑ́ a bɑ ě ghə tʉɔ nə nə dwɔ' ywə yə a bɑ pu hɑ bəm nə tyɛ'dzʉ́ bɔ.

¹³Lɑ mghɔm pɑpúŋ myə́ o ju' bəm nthʉm piŋnthʉm a, ba ŋkhuŋnyə̀ yə a bɑ nə Kristo Yeso a, nə gə yu fo' nə fǒ' ywə́.

¹⁴Tɔ́m ywə pɑpuŋ yə pu lə hɑ bu shyə m̀ nə Zhwenyə Dɔlɔ̌ yə a shwə nə o a pɑpúŋ.

¹⁵O zhyə gɑ̀ guŋ pɔ pyə wap bɑ Azia a bɑ wap wa' á, tə ba Figəlo pú Hemogene.

¹⁶A Cyəpɔ sɛ cɔmmtso e nə tuŋdyə Onesiforo nə pa' e lə́ nthəmtə̀ a mcʉmmcʉ̌m la' é nəŋ ŋkhuso nə mgwɑ mtʉɔ myə́ pu lə nə shəŋ a lə.

¹⁷Gɛ̌, e lə ŋwak Roma, shəŋ a tə jɔ a.

¹⁸A Cyəpɔ ghə gɑ́ e sɔ' gə cɔmmtso Cyəpɔ nə tyɛ̌'dzʉ́ bɔ. A bɑ ǒ nəŋ jyə guŋ mfa' myə e lə fa' nə m̀ a tə shyə bǎ wɑ̌lə́.