Read Ghomala New Testament 2 TIMOTIO 2 Bible Online

2 TIMOTIO 2 - Ghomala New Testament bible

2 TIMOTIO 2

¹Wə mú a, kaktʉɔ nthʉm gho' yə a bɑ nə́ Kristo Yeso a.

²Ywə yə o lə yu' bəm dzə̌ mkwǐnthɛ́ jɔmyɔ̌m a, siŋ ywə bɔ bi pɔ nyənyɔ, pɔ pyə wap ku' nə piŋ ji'tə yap ywə bɔ bi shɑ pɔ a.

³Yɔ yù gǒ' pa' sə́ŋwi Yeso yə pɑpúŋ a.

⁴Sɔmmo tə ŋkho nə fa' səŋwi, biŋ bɑ gi'nyə mnwə pyə shɑ pɔ pɑ nə cwə yə e wə shəŋ nə fa' bi mo yə e dɑ é fa' a pɑpuŋ a.

⁵A biŋ bɑ dəŋdəŋ po'o nə pɑ khʉdʉ̌; nə pa' mo nə khʉ tə ghə mcwɔ'fa' bɑ ě khʉ̀ m nə ŋkhɛ̀.

⁶A biŋ bɑ po'o tə nthɔmmthə́ dəŋdzə bɑ myə dzʉ'né yə e jɔgo' nə né a.

⁷Yu' ywə yə gɑ̌ gɔm bu a. Tə́ Cyəpɔ gɔ ghə o yu' guŋ é awɛ.

⁸Pɑ́ ŋkhamtə́ Yeso Kristo ye e lə́ yǎm nə vʉ̌, yʉ́ yə e bɑ ŋkhənyə David shyə́ m̀ nə Cuŋ pɑpuŋ yə gɑ̌ siŋ,

⁹biŋ bɑ jɔgo' nə́ tə pú cə̀ŋ a pa' mo cwəpuŋ a. Da' gɑ́ ghɔm Si tə bɑ pu cə̀ŋ pɑ.

¹⁰A po'o tə gɑ̌ bi' guŋ ywə awɛ shyə m̀ nə pɔ pyə a bɑ pu lě shi wap a, po'o gɑ ba wap yap sɔ' ŋkwi ywə vɔk yə a bɑ nə Kristo Yeso a, ba ghu'tə mama.

¹¹Ghɔm tsɔ̌ bɑ ǎ ku' pɑ́ bi a pɑ́ mo yap tʉ̌m nə a gɑ: Pa pú pəmtə pfʉ́ bɑ pɑ pú gɔ sɔ' pəmtə́ vɔk.

¹²Pa pú pəmtə jɔgo' bɑ pa pu gɔ sɔ' pəmtə́ sa'. Pɑ kəŋnyə é bɑ ba yʉ gɔ sɔ' kəŋnyə wɔk pɑ̀.

¹³A pɑ̀ gɑ́ pɑ ka pɑ́ nyənyɔ bɑ e bɑ̀ pɑ́ nyənyɔ nə pa' pɑ̀ e lə kəŋnyə thə́ nɑ é

¹⁴Pɑ Khamtə́ guŋ ywə bǎ awɛ, gə wap zhyə dzə̌ Si nə pɔmtə̀ tɛshwə nə ghɔ̀m: Nə pa' a tə́ ŋkwitə́ sɔmywə pɑ́, tə nə̌ da' nə́ ghə pɔ pyə́ wap ju' ma a hɔjyə.

¹⁵Kaktʉɔ nə pɑ dzə̌ Si bɑ mo nthʉɔ, gɛfa' yə pɑ e lə ghə tsə kuso a, yə e dɑ nyənyɔ siŋ ghɔm a.

¹⁶Kɑ pɑ̌ nə́ nə fa mghɔm tə piŋ Si. Pɔ pyə wap hɑ nɑ tsap nə a gə pɑ cwəpuŋ.

¹⁷Ghɔm tsap bɑ pa' shwəfiŋ dzʉ̌nyə tsʉ̌nyə a. Himeneo pu Filito dzə pɑ̌ po'o.

¹⁸Wap lě fɑ nə məjyə nyənyɔ dǔ, nə pa' wap lə bɑ gɔm gɑ́ nə yám nə vʉ̌ bɑ a lě da' bɑwə; wap gə po'o nə bɔptə piŋnthʉm bo'gwyə pɔ.

¹⁹Tə́ ba tə po'o, mcyədyə́ nthʉɔtʉɔ myə Si jap a bɑ pɑwə. Stam é bɑ ghɔm tsɔ gɑ: Cyəpɔ jyə pɔ pyə, ŋkwi' gə gɑ: Mo yə e ŋkhe tso Cyəpɔ a ŋkhʉ́ mnwə cwəpùŋ.

²⁰A bɑ nthʉ́m dyə gwyə pe' e tə da' tsə dyə tʉɔ́ gɔl kə tʉɔ̌ ŋkhap lə nə pɑ dyə pɑ́. Shɑ bɑ bɑ̀ pu lə ŋkwyə nə ŋkhəm, shɑ piŋ bɑ bɑ̀ pu lə pɑ ca' nə bəm. Shɑ pɑ nə nwə msəm, shɑ piŋ bɑ nə sobo nwə.

²¹Mo yə ě lɔnyə nɑ e nə mviŋ myə́ a gɔ sɔ' pɑ nthu' msəm, nthu' dɔlɔ̌ yə a gɔ kwitə Tá, pɑ nə guŋ mfa' pɑpuŋ a.

²²Khʉ́ mnwə cwəpuŋ myə ŋkhɛmo ŋkhuŋ ma a, cə́ŋ nwə dəŋdəŋ, shəŋ piŋnthʉm, ba ŋkhuŋnyə, ba hwitə pu a pɔ pyə wap dɑ tʉ̀m dɔlɔ̌ ŋkhe Cyəpɔ a.

²³Pwɔk mfəŋnyə něné o kɑ pɑ̌ nə́. Ǒ zhyə gɑ á dzə́ mshɛ́.

²⁴Gɛfa' Cyəpɔ tə nəŋ bɑ sa'shɛ pɑ, e gɔ kuŋ guŋ pɔ awɛ, ku'nyə nə zhi'tə mo ywə, pɑ piŋ gɑ pu tenwə nə e.

²⁵E gɔ lɑ pɑ hwitə nə tɔk pɔ pyə wap gə fəŋnyə a, nə pa' mo ka zhyə: Pɑ́ Si ghə wap pʉɔtʉm tsap jyə nwə nyənyɔ,

²⁶gəm nɑ tsap, nthəm nə ŋkhə vʉm sata yə e lə bɑ ě nə gəm wap pa' mkwɔ a, wap pɑ gə pɑ ywə yə e kùŋ à.