Read Ghomala New Testament 2 TIMOTIO 3 Bible Online

2 TIMOTIO 3 - Ghomala New Testament bible

2 TIMOTIO 3

¹Cəŋtə́ jyə́: A gɔ sɔ' pɑ nə mtyɛ'dzʉ́ jʉm, mcwə dzʉ́ nthʉɔtʉɔ pɑwə́.

²Pɔmnəŋ gɔ sɔ' pɑ́ nám, pɑ zhə́ŋ fʉ', pɑ cəŋ gɑ pu yɔ wap, pɑ ghə ŋǎ'nɑ́, pɑ́ cap Si, tʉɔthə́ bi pɑ tsə wap, wap lə pɑ jyə nwə pɑpuŋ yə pu ghə bi pu a, wap pɑ bviŋ tso Si.

³Pɔmnəŋ gɔ sɔ' wap lə ghə tʉm, wap lə ghə cɔmmtso, pɑ ghɔ́m ghɔ̀m cwəpùŋ wap lə ghə ŋkhɛ nwə, bɑ wap ghə tʉm shɔkcɔ́k. Pɑ mghɛ bo nwə pɑpúŋ.

⁴Pɔmnəŋ gɔ sɔ' pɑ́ pɑ tɛ́mnɛ́, bɑ ŋa'nɑ lɑ wap, ntham fʉ̀ mnyə́ pú. Wap pɑ̀ pɑ msǒ ŋwɛnyə bapnɑ, bɑ mghɛ bo Si.

⁵Wap gɔ sɔ' pɑ ghə pa' pɑ lɑ mku' bíŋ a, da' gɑ bɑ wap kəŋnyə́ tʉɔ piŋnthʉm. Fɛ mnyə́ mǔ nə́ pɔ bɔ́!

⁶Nə pa' a bɑ̀ wap ghə pɔ pap. Pɔ pyə́ wap ŋkho dyədyə̌ biŋ bɑ dɑ mkhə vʉm map gəm pwa jwǐ pyə̌ mnwə cwəpuŋ bɑ də̌m pu, ŋwɛnyə bapnɑ nə pɑ dɑ wap giŋ.

⁷Wap bɑ guŋ m cwə awɛ bɑwə ji'tə pɑ ywə, da' gɑ́ bɑ wap ka ku'nyə̀ nə zhyə nwə nyənyɔ.

⁸Dəŋdəŋ pa' Yannɛs pu Yambrɛs lə kəŋnyə Mosɛ a, a dəŋdəŋ po' tə́ pɔ bɔ ŋkhəŋnyə nwə nyənyɔ; a bɑ pɔ bɑ zhwenyə yap pɔptə, ywə lə pɑ nə piŋnthʉm yap.

⁹Da' gɑ wap tə gɔ sɔ' ghɔ tə̌ a sak pɑ́, nə pa' guŋ pɔ awɛ gɔ sɔ' yɔ nə pʉə yap dəŋdəŋ pa' pu lə yɔ yə nə pʉ̌ə pɔpɔ gɑ pɑpʉə a.

¹⁰Da' gɑ sɔ' m̀ nə o, a bɑ o lě dɑ ŋwɛnyə jap jʉ̌m m nthʉ́m nə́ zhi'tə, nə ghiŋ tsǔ, nə mka'nyə, nə piŋnthʉm, nə nə kaktʉɔ,

¹¹nə nə́ cwɔ'mkwə cwəpuŋ, nə ghəghʉɔ yə ŋdɑ yɔ̌ Antiokia, ba m̀ Ikonya pu Listra a. Pu lə cyə̌tə́ cwɔ mkwə mə̌ nə yá nthi? Da' gɑ nə gúŋ e awɛ Cyəpɔ lě bvɔk a.

¹²Ba tə po'o, guŋ pɔ awɛ pyə wap shəŋ nə vɔk vɔ̀k nə lɑ mku' biŋ nə Kristo Yeso a, pu gɔ cwɔ'tə́ mkwə map.

¹³Tə sɔ' m̀ nə pɔ cwəpùŋ pu a pɑ cap, wap gɔ pɑ lɑ nwə cwəpuŋ ghɔ pɑ dzə̀, pɑ fʉ́tə pyə shɑ́ pɔ, ba nɑ̀ tsap.

¹⁴Tə sɔ' m nə o, cwə nthʉm ywə́ yə o lə zhi'tə biŋ bíŋ nyənyɔ a, nthɔm a tʉɔ: O zhyə́ mo yə e lə zhi'tə o.

¹⁵O lə jyə ŋwa'nyə dɔlɔ̌ tə fɑ mukhʉ̌. A bɑ ǎ ghə tʉɔ nə hɑ fʉ́ yə a dɑ mo gɔ nə ywə vɔk shyə m̀ nə piŋnthʉm nə Kristo Yeso a bu.

¹⁶Guŋ ywə yə a bɑ pu və nthʉ́m ŋwa'nyə a fɑ m bi Si, biŋ bɑ bɑ ǎ kwitə́ nə zhi'tə̀, nə́ nə ba' ghɔm, nə nə gə ywə tiŋnyə dəŋdəŋ, nə nə nthɔk mo nə nwə dəŋdəŋ,

¹⁷po'o gɑ mo Si pa mo bɑ ě ku'nyə, biŋ gə guŋ ywə nə fa' fà' pɑpúŋ awɛ.