Read Ghomala New Testament TITO 3 Bible Online

TITO 3 - Ghomala New Testament bible

TITO 3

¹Kamtə́ bi guŋ pɔ awɛ gɑ wap gɔ pɑ yu'nyə pɑ fyɛ', yu'nyə pɑ sa' guŋ, gɑ wap gɔ pɑ yu'shwə̀, pɑ nə cwə̌ pɑ pyap nə ghə fa' pɑpuŋ,

²wap lə yəmtə́ sɔmmo, pɑ wɛ́tə́ msa'shɛ, pɑ la'tə nə yɔ mo pɑpúŋ, pɑ la'tə nə guŋ mcwə awɛ hwitə nə guŋ pɔ awɛ.

³Nə pa' ba wɔk pɑ̌, pɑ lə́ bɑ dzə̀ bɑ mfʉmnyə́ pɔ, bɑ mtʉɔthə́, pɔ bipǐ, bɑ mkwɔ ŋwɛnyə̀ bap nɑ́ nthinthi, bɑ bvɔk nə tʉm shɔkcɔ̌k ba ghi'nyə, bɑ̀ pɔ bɔkpɔk, bɑ bɔ́nyə cəcɑ̌ pɑ̀.

⁴Da' gɑ nə yɔ puŋthʉm Si gɛvɔk wɔk pɑ̀ ba ŋkhùŋnyə e nə pɔmnəŋ lě gə

⁵e vɔk wɔk pɑ̀, la' e vɔk wɔk pɑ m nə mfa' dəŋdəŋ myə pɑ̀ gə a pɑ̀, e lə bvɔk wɔk pɑ m nə cɔ̌mmtso e, shyə m nə́ nə sɔk wɔk pɑ, m nə tsə nə tsə sə ba nə kwyəpnyə yə a shyə m nə zhwenyə Dɔlɔ̌ a.

⁶Si bɑ ě sɛ Zhwenyə bɔ pɑ dú e nə pɑ shyə m nə Yeso Kristo gɛvɔk wɔk pɑ;

⁷po'o gɑ́ a cyə m nə gho' e pɑ pɑ́ pɔ dəŋdəŋ biŋ shyə m̀ nə́ nə mɔktə bɑ pɑ tsʉ́ mcʉ̌' vɔk mama.

⁸Ghɔm tsɔ gɑ bɑ ǎ ku' pa' pɑ mo yap tʉ̌m nə a, biŋ bɑwə shəŋ gɑ o cəŋtə jyə tsa bɔ, po'o gɑ guŋ pɔ awɛ pyə a bɑ wap yap piŋnthʉm yap nə Si a kaktʉɔ nə fa' mfà' pɑpuŋ nə gɔ dzə̀. Yɔ ywə yə a pùŋ biŋ ŋkwitə bi pɔmnəŋ a yɑ̌.

⁹Da' gɑ wɛtə́ mcə̌ŋnwə pɔpɔ ba nə sɛ nwə ŋkhənyə̀ pu a msa'shɛ́ pu a mfəŋnyə nə nwə mco', a bɑ a ka kwitə biŋ bɑ pɑ̀ pɔpɔ.

¹⁰Mo yə e shəŋnyə yə pɑ́ da' nə ta' nwə yɑmu' a, pak e, da' gɑ̀ nə pak e bɑ ǒ ləŋdzə nthɔk ta' cʉ̌m ba mcʉ̌m bʉ́ə.

¹¹O zhyə gɑ́ mo bɔ bɑ ě hɔ məjyə, bɑ hɔnwə, bɑ m̀ pɑ̌ nyəŋ shɛ thə e pɑ yʉ́.

¹²Cwə yə́ gɑ̌ gɔ təm Artema kɑ Tikiko bu a, o kaktʉɔ nə sɔ' ŋkwyatə a Nikopoli. A tsʉ' yə gɑ jap gɑ́ gɑ gɔ cwə wə́ nə kap ŋʉ́m a.

¹³Cəŋtə́ dé nwə nə nwə ghiŋ Zena gɛ zhyə mco' pu Apolos po'o gɑ sɔmywə kɑ yak bi pú.

¹⁴Ba pɔ pɔk pɑ̀ gɔ zhi'tə nə pɑ fa' mfà' pɑpúŋ po'o gɑ wap yap pu nə mfa' myə ǎ wə do'nyə a. Po'o gɑ wap kɑ pɑ tə ghə nthɔm.

¹⁵Guŋ pɔ pyə pyə a pu bɑ a ca'tə o. Ca'tə pɔ pyə wap ŋkhuŋ wɔk pɑ nthʉ́m piŋnthʉm a. Gho' pɑ̀ bi guŋ yɔ awɛ.