Read Ghomala New Testament EBRAIKA 10 Bible Online

EBRAIKA 10 - Ghomala New Testament bible

EBRAIKA 10

¹Mco' da'tə pɑ ciŋnyə mnwə pɑpuŋ myə a bɑwə sɔ' a. A tə́ da'tə kwa' mnwə pɑpuŋ bɔ pɑ; ba tə́ pa' pu nuŋpwɔ' guŋ mcwə awɛ, nə guŋ gu'dzʉ awɛ a, mco' bɑ a ka ku' nə ghə a pəmtə nə pɔ pyə wap gə yá a ŋkwicʉ̌m, wap lə piŋ sɛ sɔm mhɔnwə nthʉm tʉm pu.

²A lə pe' bɑ po'o bɑ pu lě da' nthak nə núŋ pwɔ' nə́ŋ, nə pa' bɑ a lě da' dɔnyə pɔ pyə wap gə yá a ŋkwicʉ̌m, wap lə piŋ sɛ sɔm mhɔnwə nthʉm tʉm pu.

³Da' gɑ̀ a shyə m̀ nə yəŋ nə nuŋpwɔ' pu pɑ ŋkhamtə mhɔnwə guŋ mgu' awɛ.

⁴Nə pa' mcyə́ mpɔp na ba myə́ mpɔp dzə ka ku' nə té mhɔnwə.

⁵A po'o tə́ Kristo nə kǒ nthʉm dzʉ́ gɔm gɑ: O lě tə cəŋ pwɔ' pu ywə hɑhɑ̌, da' gɑ o lě bə́m nɑ́ a.

⁶Pwɔ' nthoto ba pwɔ' nə mhɔnwə lě tə púŋ o.

⁷A pɑ́ po'o ŋ gɔm gɑ: Gɑ̌ yə̌ŋ, nə pa' ywə yə pu bvə̀ nthʉ̀m ŋwa'nyə dzʉm tsʉ̌m a, pu bvə nə m̀. Ywə bɔ pɑ̀ gɑ: Gɑ̌ sɔ' m Si nə ghə ywə yə o shəŋ a.

⁸E də́ŋdzə gɔm gɑ: Pwɔ', ywə hɑhɑ̌, pwɔ' nthoto, ba pwɔ' nə mhɔnwə o lě tə cə́ŋ, a lě tə́ púŋ o. A po'o bɑ ywə yə mco' jap a.

⁹E biŋ gɔm gɑ: Yɔ, gɑ̌ sɔ' nə ghə ywə yə o shəŋ a. E bi dzə fa' nə sé Si, biŋ jap mu' batə yɑpʉə.

¹⁰A po' tə a bɑ pɑ lě dɔnyə shyə m nə pwɔ' nɑ́ Yeso Kristo tsyə pu lə nuŋ ŋkwi cʉ̌m mama a.

¹¹Bǎ ya ŋkhamsi lə́ nthiŋnyə nə tsʉ' fa' é guŋ mtyɛ'dzʉ́ awɛ bɑ fa' fà' tsyə́, bɑ nuŋpwɔ' tsyə a ka ku' nə la' nthe mhɔnwə mo a.

¹²Da' gɑ́ kwa' yʉ́ le shwə́ tə nuŋpwɔ' ŋkwi cʉ̌m mama nə mhɔnwə, shwə nə ghə́ŋ tʉɔ Si mama.

¹³E bɑwə byap cwəlɔ gɑ mghɛ bò pyə́ cʉ' tsʉ' tʉ́ mkwə myə́.

¹⁴E lě shyə m̀ nə ŋkwi' nuŋpwɔ', dɔnyə pɔ pyə e dɔnyə wap a mama.

¹⁵A ywə yə ba Zhwenyə Dɔlɔ̌ da'tə yə́ bi pɑ a. Nə pa' e lə pɑ̌ tə gɔm gɑ:

¹⁶Yɔ kɔ tsyə gɑ̀ gɔ sɔ' nə tamtə́ nə pu tyɛ' o bɔ a tsǒ, Cyəpɔ ghɔm gɑ: Gɑ̌ gɔ nə hɑ mco' mə̌ və pɑ nthʉ́m mtʉ́m map ba nthʉ́m mkwɛnyə̀ map.

¹⁷Ǎ dɑ la' biŋ ŋkhamtə mhɔnwə map ba mnwə cwəpuŋ map pɑ́.

¹⁸A nəŋ bɑ po'o, tsʉ' yə nə lɑ mhɔ shwyɛ' mo nə a, nə piŋ nuŋpwɔ' nə mhɔ tə bɑwə pɑ.

¹⁹A po'o mfɑmfɑ́ tə́ a bɑ pɑ́ cəŋtə gə nə ko cwyəp shyə m nə mcyə́ Yeso.

²⁰A bɑ məjyə sə́, məjyə nthʉɔ yə Yeso nthú bi pɑ nə dzə nə sam tsʉ' Dyə Si, yəŋ la'tə gɑ́ nə bapnɑ e a.

²¹Pɑ̌ biŋ bɑ́ bɑ̀ pɑ̌ ghə mɑ ŋkhamsi gwyə bɑ pu yap e nə dyə Si.

²²Pɑ lɑ tʉm dəŋdəŋ gɔ bəŋ é, m nthʉ̌m piŋnthʉm tə bya, ba tʉm tsyə a bɑ ǎ lɔ nə guŋ mhɔ tʉm awɛ, ba nɑ yə pu lɑ shyə́ dɔlɔ̌ sɔk a.

²³Ká pɑ pwá, pɑ pɑ́ biŋ mɔktə yɔk pɑ nə gɔ pɑ m dzə̀, nə pa' mo yə e hɑ mka'nyə bi pɑ a bɑ́ nyənyɔ.

²⁴Pɑ kɑ́ ti cəcɑ̌ pɑ nə nə pɑ nthənyə wɔk wɔk pɑ nə ŋkhùŋnyə bɑ nə mfa' pɑpúŋ.

²⁵Ka pɑ pɑ̀ ŋkhʉ́ mcu'tə mɔk pɑ̀ pa' shɑ pɔ gə ma nə pɑ ŋkhʉ́ a. Pɑ pɑ́ ŋkhak pɑ tʉɔ nə pa' pǒ wə́ jɔ pa' tyɛ'dzʉ́ wə sɔ' a.

²⁶Nə pa' pɑ hɔnwə bɑ jyə́, nə cwə yə a bɑ pɑ̌ tsə zhyə nwə nyənyɔ a, bɑ sɔm pwɔ' nuŋnuŋ nə mhɔnwə tə yɑ̌wə pɑ́.

²⁷Da' nə pyap fyɛ' cwəpùŋ pu mɑ mɔk yə a gɔ sɔ' khə mtʉɔthə́ a.

²⁸Mo yə ě bvʉ̀ mco' Mosɛ a, pu jwə é tə cɔmmtso, nə cwə yə pɔ pɑpʉə kɑ pɑtá lɑ pɑ́ pɑ kwinthɛ́ nə a.

²⁹Tə́ mcʉ̌m sʉ'ʉ nə dəŋ go' yə pu gɔ hɑ bi mo yə́ ě nəŋtə Mu Si, jəmtə́ mcyə kɔ myə e lə cyə m nə́ tə́ dɔ, biŋ jəmtə Zhwenyə gho'?

³⁰Nə pa' a bɑ pɑ̌ zhyə mo yə e gɔm gɑ: Nə pa' bo bɑ bəm myə nə gap mcwɔ'fà'. Biŋ ŋkwi gɔm gɑ: Cyəpɔ gɔ sɔ' fyɛ' pɔ pyə́.

³¹A bɑ kwa' mɑ bɔkbɔk nwə nə vʉ nə bu Si nthʉɔtʉɔ.

³²Da' gɑ́ po kamtə́ pa' po lə nə jitə a. Nə pa' po lə wuŋ nə kwi ŋkha' guŋ ŋkho pɑ nə shù yə po lə lǒ' nthʉ́m go' a.

³³Pu pɑ jəmtə wɔ, bɑ shwɔ' mkwə mɔ cwəpùŋ sɔsɔ̌ dəm sim nə mu' ghəŋ biŋ bɑ nə yə́ mu' ghə̌ŋ bɑ pǒ tamtə̀ nə pɔ pyə wap lə jɔ yəŋ nthi go'o a.

³⁴Po lě biŋ gə yɔ tsʉ' nə ghəghʉɔ mghɛ cɛ́, da' gɑ́ biŋ dɑ ŋwɛ́nyə biŋ gɑ pu lɑ tsə tsɔ, nə pa' po lə bɑwə jyə́ gɑ pǒ ghə mu' fʉ' pɑpuŋ yə a shwə mama a.

³⁵Ka po pi yɔ nə nə cəŋtə biŋ, a gɔ sɔ' ghə kwa' mcwɔ'fa'.

³⁶A bɑwə shəŋ gʉ' kaktʉɔ bi po tə po nə gə ywə yə Si shəŋ a, biŋ ŋkwi ywə yə e ŋkhá' bi po a.

³⁷Nə pa' a cu' kwa' muywə, muywə́ cwə, a mo yə e gɔ sɔ' a sɔ'. E tə gɔ pìŋ cwə pɑ́.

³⁸Mo a yə dəŋdəŋ gɔ sɔ' vɔk pɑ nə piŋnthʉm, da' gɑ e wa' piŋnthʉm e bɑ tʉm tsɑ̌ tə gɔ piŋ ŋwɛ́nyə nə e pɑ́.

³⁹Pɑ tə́ bɑ pɔ pyə wap gɔ wa' piŋnthʉm yap sɔ' pi a pɑ́. Pɑ bɑ pɔ pyə a bɑ wap ghə piŋnthʉm nə nə bvɔk mtʉm mɔk pɑ a.