Read Ghomala New Testament EBRAIKA 12 Bible Online

EBRAIKA 12 - Ghomala New Testament bible

EBRAIKA 12

¹Po'o lə, ba wɔk pɑ pyə a bɑ pɑ̌ ghə kwa' du vəŋ mkwinthɛ giŋnyə̌ pɑ pa' pɑ gɔm a, pɑ wa' guŋ pi' ba guŋ mhɔ awɛ myə a bɑ a tsam wɔk pɑ a, biŋ ŋkhaktʉɔ nə khʉdʉ̌ yə pu hɑ gɑ pɑ ŋkhʉ a tə pwa.

²Pɑ nə khʉdʉ bɑ nthʉ mnyə mɔk pɑ nə Yeso Kristo, mo yə e hɑ piŋnthʉm biŋ gə a pəmtə a. Yʉ́ Yeso yə e lə kəŋnyə ŋwɛnyə yə a lə bɑ yə a, jɔgo' bɛnyəpɛnyə, tə kuso, biŋ shwə nə ghəŋ tʉɔ leŋfo Si a.

³Əŋ, po kamtə mo yə e lə yɔ yəŋ nthi gǒ' nə thə mghɛ mhɔ a, tə a ghə po kɑ pwa.

⁴Pǒ bɑ po ka wuŋ sɔk nthʉm go' tə ŋkhəm nə mcyə nə nə lo'shù nə mhɔ,

⁵biŋ bɑ bɑ̀ pǒ tʉɔnyə nthɔk myə pu hɑ bi po pa' bi pǒ a gɑ: Mu a, pɔm tə wak bya Yə Cyəpɔ nthe nə o a. Kə pwa nə cwə yə E shɔktə o a.

⁶Nə pa' Cyəpɔ shɔktə Mo yə e ŋkhúŋ e a. E shwɔ mu yə e sɔ' bi e a.

⁷Pǒ jɔgo' pa' a a pɑ́ pɑ nə da'tə wɔ jyə pɑpuŋ. Si gə nə po pa' nə po pyə a. A bɑ ya mu yə tap e tə shɔktə e a pɑ?

⁸Mo pɑ tə cɔktə wɔ pa' bǎ ya mu a, bɑ pǒ bɑ pó ghɔ́, po lə pɑ pó mò.

⁹Pɑ bɑ pɑ̌ ghə mta pɔk pɑ dəmca', wap pɑ́ nthɔk wɔk pɑ, a pɑ buŋ wɔk pɑ. Tə mcʉ̌m sʉ' nə pa' pɑ gɔ fi'nɑ hɑ si bi Ta mzhwenyə tə e hɑ vɔk bi pɑ?

¹⁰Wap nthebya nə pɑ pɑ́ nə mú kam cwə dzʉ̌; tə sɔ' m nə Ta bɔ, e pɑ nthɔk wɔk pɑ bɑ nə ŋkhuŋ pɑ wɔk pɑ po'o gɑ e hɑ dɔlɔ́ e bi pɑ.

¹¹Pu tə bɑ shɔk mo cwə o bɔ o ŋwɛnyə pɑ. O ŋiŋtə pɑ sə o. Da' gɑ a sɔ' jʉm, pɔ pyə a lě siŋ wap a, a yam nthɔm ŋwɛnyə, nthɔm dəŋdəŋ nə pú.

¹²Po ghə bǔ myə a pwa a ba mkwə myə ǎ wə səŋsəŋ a a tiŋnyə dəŋdəŋ.

¹³Po piŋ gə məjyə dəŋdəŋ nə mkwə mɔ po'o gɑ ŋkho'tə̀ kɑ vʉsi, e yɛ̌.

¹⁴Po cəŋ gɑ́ hwitə pɑ́ cəcɑ̌ po pu a guŋ pɔ awɛ, biŋ shəŋ ba nə pɑ dɔlɔ̌ yə mo pɑ tə ghə yá bɑ pɑ e lə yɔ Cyəpɔ a.

¹⁵Po pɔmtə gɑ sɔmmo kɑ tə̌m nə gho' Si, bɔmtə gɑ sɔm gɛ́ dzəzə kɑ sa' nthʉm cu'tə, dɑ paknyə sɔ̌' biŋ gə gɑ cu'tə yɔ pǐ tə dǎm.

¹⁶Po pɔmtə gɑ sɔm gəgəm kɑ bɔptə mco' lə kɑ pɑ cəcɑ̌ po pa' Esau yə e lə cyə m nə ta' kɛ̌ ywətsʉ fiŋ nwə shyədzə a.

¹⁷Nə pa' po zhyə gɑ e lə tǐ biŋ bɑ shəŋ nə tsʉ mcʉ̌' byanyə, pu te e nə, tə e piŋ dɔ̌ bǎ gɑ kɑ lə, sɔm nə kwyəpnyə̀ lə pɑwə.

¹⁸Po lě tə ghɔ bəŋ ywə yə pɑ mo kwak pǔ nə a, mɔk gəm ghəm, tsʉ' sosǒ, jʉ̌m, fəfa,

¹⁹gi nthɛ nthuŋtǔŋ ba gi mo. Pɔ pyə wap lə yǔ' tsə bɔ a lě ŋkhəŋnyə nə yu' ghɔm.

²⁰Nə pa' a lə bɑ wap ka ku'nyə nə tɔm mco' gɑ: Mo yə ě kwak kuŋgo a kə nɔm lə yə e kwak kuŋg a, bɑ pu gɔ lɑ mwɔ' tamtə é.

²¹Nə nəŋ jɔ ywə bɔ lə bɑwə gə mo pwɔk tə Mosɛ ghɔm gɑ: Gɑ wə shwɔ̌' biŋ sə́ŋ.

²²Da' gɑ kwa' wɔ bɑ pǒ sɔ bəŋ kúŋ Sion ba m bə̌ŋ tisuŋ Si nthʉɔtʉɔ, yə Yerusalɛm kɛbəŋ, ba mbə̌ŋ pɑ aŋgəle sha'shǔ' bɑ wap cu'tə bɑwə ŋwɛnyə.

²³Pǒ bɑ po sɔ' bəŋ cu'tə mthəsə po pyə a bɑ pu və mtso map thə̀ kɛbəŋ a, bəŋ Si gɛ sa' guŋ dzʉ́ awɛ, ba m bəŋ mzhwenyə pɔ dəŋdəŋ pyə a bɑ wap lɔ a.

²⁴Pǒ bɑ po sɔ' bəŋ Yeso, giŋjyə̀ kɔ sə́ ba m bə̌ŋ mcyə nə shi' myə a bɑwə gɔm nwə tə shyə myə Abɛ a.

²⁵Po pɔmtə nə cyətə yu' mo yə ě wə gɔmnwə bi po a! Nə pa' a pɑ gɑ́ pɔ pyə wap lě ŋkhəŋnyə nə yu' nthɔ̌k mo yə e lə bɑwə gɔmnwə bi pu dəmca' a lě tə vɔk shɔ̀m, bɑ ba wɔk pɑ yɔk pɑ, bɑ pɑ tə gɔ sɔ' vɔk nə pɑ́, a pɑ yə pɑ ka yu' mo yə e gɔmnwə bi pɑ kɛbəŋ a.

²⁶Yʉ́ yə gi e lə ghə cǎ' cʉ'nyə a wə cwəlɔ bɑwə shyanyə gɑ: nə mu' jʉɔjʉm cʉ̌m gɑ gɔ ghə cǎ' ba kɛbəŋ cu'nyə.

²⁷Nə ghɔm gɑ jʉɔjʉm cʉ̌m po'o bɑ da'tə gɑ guŋ tsə awɛ tsyə a bɑ a ka cwə ŋkwi tsʉ' nə tsə tsyə Si lə nyaptə a gɔ sɔ' mi, a ywə nə yɑwə bɑ pɑ ywə yə pɑ́ a lə ŋaknyə a.

²⁸Pa' pɑ ŋkwi nəfo tsyə pɑ a lə ŋaknyə a, pɑ tɔm gho' bɔ pɑpuŋ. Pɑ cyə m̀ nə́ fa' bi Si kwa' nə nthi pa' a gɔ puŋ e a, nə fa' bɑ ju'nyə e biŋ bɑ bwɔk e.

²⁹Nə pa' Si yɔk pɑ bɑ mɔk yə a nkhə guŋ ywə awɛ a.